අනුරාධපුර රඹෑව ප්‍රදේශයේදී නොවැම්බර් 10 දින සිදුවූ මාරක බස් රථ අනතුර සම්බන්ධයෙන් පුළුල් විමර්ශනයක් සිදුකර සවිස්තර වාර්තාවක් අධිකරණයට ඉදිරිපත් කරන ලෙස අනුරාධපුර අතිරේක මහේස්ත්‍රාත්වරිය මිහින්තලේ පොලිසියට නියෝග කර තිබේ.
මිහින්තලේ පොලිසිය විසින් බී වාර්තාවක් මගින් කරුණු ඉදිරිපත් කිරීමෙන් අනතුරුව අතිරේක මහේස්ත්‍රාත් ඩී.එල්. සමරසිංහ මහත්මිය අනතුර සිදුවූ ස්ථානයට ගොස් පරීක්ෂා කර ඇති අතර අනතුරට සම්බන්ධ බස් රථ තුන ද නිරීක්ෂණය කර තිබේ.
එහිදී අනතුරට සම්බන්ධ එක් එක් බස් රථය පිළිබඳව මෝටර් රථ පරීක්ෂකවරයාගෙන් වෙන වෙනම විමර්ශන වාර්තා ලබාගෙන අධිකරණයට ඉදිරිපත් කරන ලෙස මහේස්ත්‍රාත්වරිය පොලිසියට නියෝග කර ඇත.
අනතුරින් මියගිය පුද්ගලයන්ගේ මෘතදේහ පරීක්ෂා කිරීම සඳහා මහේස්ත්‍රාත්වරිය අනුරාධපුර ශික්ෂණ රෝහලට ද ගොස් තිබේ. එහිදී පශ්චාත් මරණ පරීක්ෂණ පවත්වා අදාළ වාර්තා අධිකරණයට ඉදිරිපත් කරන ලෙස රෝහලේ අධිකරණ වෛද්‍ය විශේෂඥවරයාට උපදෙස් ලබාදී ඇත.
පශ්චාත් මරණ පරීක්ෂණ අවසන් කිරීමෙන් අනතුරුව මෘතදේහ පවුල්වල සාමාජිකයන් වෙත භාරදීමට ද මහේස්ත්‍රාත්වරිය නියෝග කර තිබේ.
අනුරාධපුර රඹෑව ප්‍රදේශයේ ඒ-9 මාර්ගයේදී ශ්‍රී ලංකා ගමනාගමන මණ්ඩලයට අයත් බස් රථ දෙකක් සහ පෞද්ගලික බස් රථයක් එකිනෙක ගැටීමෙන් මෙම අනතුර සිදුවිය. අනතුරින් පුද්ගලයන් සිව්දෙනෙකු මියගොස් තවත් 71 දෙනෙකු තුවාල ලබා තිබේ. පොලිසිය පවසන පරිදි මූලික විමර්ශනවලදී අනාවරණය වී ඇත්තේ එක් බස් රථයක රියදුරුගේ අනතුරුදායක හා නොසැලකිලිමත් රිය ධාවනය අනතුරට හේතුවන්නට ඇති බවයි.
වවුනියාවේ සිට රඹෑව දෙසට ධාවනය වූ ලංගම බස් රථයක් එම දිශාවටම ධාවනය වූ පෞද්ගලික බස් රථයක් ඉස්සර කිරීමට උත්සාහ කිරීමේදී ප්‍රතිවිරුද්ධ දිශාවෙන් පැමිණි තවත් ලංගම බස් රථයක මුහුණට මුහුණ ගැටීමෙන් අනතුර සිදුව ඇති බවට මූලික විමර්ශනවලදී අනාවරණය වී තිබේ.
