වාහනයක් මිලදී ගැනීමට සහ එහි කල්බදු වාරික ගෙවීමට යොදාගත් මුදල්වල මූලාශ්‍ර හෙළි කිරීමට හෝ තහවුරු කිරීමට අපොහොසත් වීම හේතුවෙන් රක්ෂිත බන්ධනාගාරගත කර සිටින කොටවිල පොලිස් ස්ථානයේ පාලන අංශයේ ස්ථානාධිපතිනිය ලෙස කටයුතු කළ ප්‍රධාන පොලිස් පරීක්ෂක වරුණි බෝගහවත්ත මහත්මියගේ වැඩ තහනම් කර තිබේ.
මාතර සහ හම්බන්තොට දිස්ත්‍රික් භාර නියෝජ්‍ය පොලිස්පති චමික වික්‍රමසිංහ මහතා විසින් මෙම වැඩ තහනම් කිරීමේ නියෝගය නිකුත් කර ඇත.
වාහනයක් මිලදී ගැනීමට සහ එහි කල්බදු වාරික ගෙවීමට යොදාගත් මුදල්වල මූලාශ්‍ර හෙළි කිරීමට හෝ තහවුරු කිරීමට අපොහොසත් වීම සම්බන්ධයෙන් බෝගහවත්ත මහත්මිය පසුගියදා රක්ෂිත බන්ධනාගාරගත කෙරිණි.
මේ අතර, අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන අංශයේ නිලධාරීන් විසින් ඇය සන්තකයේ තිබූ බව කියන Honda Vezel වර්ගයේ මෝටර් රථයක් ද අත්අඩංගුවට ගෙන තිබේ. මාතර සමුපකාර සමිතියේ රුපියල් බිලියනයකට අධික මුදලක් සම්බන්ධ මූල්‍ය වංචාවකට සම්බන්ධ බවට සැක කෙරෙන පුද්ගලයකු විසින් එම මෝටර් රථයේ කල්බදු වාරික ගෙවා ඇති බවට විමර්ශනවලදී අනාවරණය වීමෙන් පසු එම වාහනය අත්අඩංගුවට ගෙන ඇත.
