හිටපු නාවික හමුදාපති වසන්ත කරන්නාගොඩ සහ හිටපු ජනාධිපති මහින්ද රාජපක්ෂගේ පුත් යෝෂිත රාජපක්ෂ යන මහත්වරුන්ට එරෙහිව අල්ලස් හෝ දූෂණ චෝදනා විමර්ශන කොමිෂන් සභාව විසින් ගොනුකර ඇති දූෂණ නඩුව නොවැම්බර් 23 වැනිදා විභාගය සඳහා කැඳවීමට කොළඹ මහාධිකරණය අද (28) නියෝග කර තිබේ.
අදාළ නඩුවේ පූර්ව නඩු විභාග සම්මන්ත්‍රණය අවසන් කිරීමෙන් අනතුරුව කොළඹ මහාධිකරණ විනිසුරු රවීන්ද්‍ර ප්‍රේමරත්න මහතා විසින් මෙම නියෝගය නිකුත් කර ඇත.
යෝෂිත රාජපක්ෂ මහතා අවශ්‍ය සුදුසුකම් සපුරා නොතිබියදී, ඔහු බ්‍රිතාන්‍යයේ රාජකීය නාවික හමුදා විද්‍යාලයේ පුහුණුවක් සඳහා යොමු කිරීම මගින් දූෂණය නමැති වරද සිදුකර ඇති බවට චෝදනා කරමින් අල්ලස් හෝ දූෂණ චෝදනා විමර්ශන කොමිෂන් සභාව මෙම නඩුව පවරා තිබේ.
2006 වසරේදී යෝෂිත රාජපක්ෂ මහතා අවශ්‍ය සුදුසුකම් නොමැතිව ශ්‍රී ලංකා නාවික හමුදාවේ විධායක අංශයට කැඩෙට් නිලධාරියකු ලෙස බඳවාගෙන, නියමිත ක්‍රියාපටිපාටියෙන් බැහැරව මහජන මුදල් වැය කරමින් විදේශීය පුහුණුවකට යොමු කළ බවද අල්ලස් කොමිසම ගොනුකර ඇති අධිචෝදනාවල සඳහන් වේ. ඒ අනුව, නඩුවේ ඉදිරි විභාග කටයුතු නොවැම්බර් 23 වැනිදා ආරම්භ කිරීමට නියමිතය.
