මත්ද්‍රව්‍ය සම්බන්ධ චෝදනාවක් මත අත්අඩංගුවට ගෙන සිටියදී මියගිය 29 හැවිරිදි පුද්ගලයාගේ මරණයට වගකිව යුතු බවට චෝදනා එල්ල වන පොලිස් නිලධාරීන්ට එරෙහිව නීතිමය පියවර ගන්නා ලෙස ඉල්ලා ඔහුගේ පවුලේ සාමාජිකයෝ පොලිස් මූලස්ථානයට පැමිණිල්ලක් ඉදිරිපත් කර තිබේ.
මියගිය පුද්ගලයාගේ බිරිඳ සඳහන් කර ඇත්තේ තම සැමියාට යුක්තිය ඉටු කරගැනීම සහ සිද්ධියට සම්බන්ධ බවට චෝදනා එල්ල වන නිලධාරීන්ට එරෙහිව සුදුසු නීතිමය ක්‍රියාමාර්ග ගන්නා ලෙස ඉල්ලා මෙම පැමිණිල්ල ඉදිරිපත් කළ බවයි.
මෙතෙක් අදාළ පොලිස් නිලධාරීන් සම්බන්ධයෙන් ගෙන ඇති පියවර ප්‍රමාණවත් නොවන බවත් සිද්ධිය සම්බන්ධයෙන් නිසි නීතිමය ක්‍රියාමාර්ග ගෙන, වගකීම තහවුරු වන පුද්ගලයන්ට සුදුසු දඬුවම් ලබාදෙන ලෙස ද ඇය ඉල්ලා ඇත.
මත්ද්‍රව්‍ය සම්බන්ධ චෝදනාවක් මත හෝමාගම පොලිසිය විසින් අත්අඩංගුවට ගනු ලැබූ කිරවත්තුඩුව ප්‍රදේශයේ පදිංචි 29 හැවිරිදි ඉෂාර හර්ෂ කුමාර පොලිස් අත්අඩංගුවේ සිටියදී මියගිය බව ඔක්තෝබර් 25 වැනිදා වාර්තා විය.
ඔහු හෝමාගම පොලිස් ස්ථානයේ රඳවා සිටියදී පොලිස් නිලධාරීන් විසින් පහරදෙනු ලැබූ බවට ඔහුගේ ඥාතීන් චෝදනා කරන කළ අතර පසුව ඥාතීන්ගේ ඉල්ලීම මත පොලිස් නිලධාරීන් ඔහු හෝමාගම මූලික රෝහලට ඇතුළත් කර ඇති අතර, එහිදී ඔහු මියගොස් තිබේ.
