සෞදි අරාබියේ ශ්‍රේෂ්ඨාධිකරණය අනෝජන් සිවරාසා මහතාට මීට පෙර නියම කර තිබූ මරණ දඬුවම අවලංගු කර නඩුව නැවත විභාග කිරීම සඳහා යොමු කිරීමෙන් පසු, එරට ශ්‍රී ලංකා තානාපති ඕ.එල්. අමීර් අජ්වාඩ් මහතා ඔහු හමුවී තිබේ.
සෞදි අරාබියේ ශ්‍රී ලංකා තානාපතිවරයා 2026 ඔක්තෝබර් 26 වැනිදා දම්මාම් මධ්‍යම බන්ධනාගාරයේදී අනෝජන් සිවරාසා මහතා හමුවී ඇති බව රියාද්හි ශ්‍රී ලංකා තානාපති කාර්යාලය නිවේදනය කර ඇත.
ඉදිරියේදී පැවැත්වීමට නියමිත අධිකරණ කටයුතු සම්බන්ධයෙන් සිවරාසා මහතාට අවශ්‍ය කොන්සියුලර් සහ නීති සහාය ලබාදීම පිළිබඳව එහිදී සාකච්ඡා කර තිබේ. ඉදිරි අධිකරණ ක්‍රියාදාමය පිළිබඳ ඔහුට නිසි අවබෝධයක් ලබාදීම සහ අදාළ කරුණු නීතිමය ක්‍රියාවලිය තුළ නිසි පරිදි ඉදිරිපත් කිරීමේ වැදගත්කම ද එහිදී අවධානයට ලක්ව ඇත.
සිවරාසා මහතාට අඛණ්ඩව කොන්සියුලර් සහාය ලබාදීමට ශ්‍රී ලංකා තානාපති කාර්යාලය කැපවී සිටින බව තානාපති අමීර් අජ්වාඩ් මහතා යළිත් තහවුරු කර තිබේ. ඉදිරි නඩු කටයුතු අතරතුර අවශ්‍ය සහාය ලබාදීම සඳහා සිවරාසා මහතා, ඔහුගේ නීතිඥයන් සහ තානාපති කාර්යාලය අතර සමීප සම්බන්ධීකරණයක් පවත්වාගෙන යාමේ වැදගත්කම ද තානාපතිවරයා අවධාරණය කර ඇත.
එමෙන්ම, සෞදි අරාබියේ අධිකරණයේ ස්වාධීනත්වයට සහ නීතියේ නියමිත ක්‍රියාපටිපාටියට ගරු කරමින් අදාළ නීතිමය හා කොන්සියුලර් සහාය ලබාදෙන බව ද තානාපතිවරයා සඳහන් කර තිබේ.
මෙම සංචාරයේදී තානාපතිවරයා බන්ධනාගාර බලධාරීන් ද හමුවී ඇති අතර, සිවරාසා මහතා රඳවා සිටින කාලය තුළ ඔහුගේ සුබසාධනය පිළිබඳ සැලකිලිමත් වීම සහ ශ්‍රී ලංකා තානාපති කාර්යාලයට අඛණ්ඩව සහාය ලබාදීම සම්බන්ධයෙන් ඔවුන්ට ස්තුතිය පළ කර ඇත.
මෙම සංචාරයට රියාද්හි ශ්‍රී ලංකා තානාපති කාර්යාලයේ පළමු ලේකම් හා කොන්සියුලර් කටයුතු භාර නිලධාරී වින්දන මුණසිංහ මහතා සහ භාෂණ පරිවර්තක සහුල් හමීඩ් මහතා ද එක්ව සිටියහ.
