ව්‍යාජ ගිණුම් හරහා වෛරී ප්‍රකාශ පැතිරවීම සම්බන්ධයෙන් වසර 10කදී පැමිණිලි හයක් විමර්ශනය කරලා – මහජන ආරක්ෂක ඇමැති
ව්‍යාජ සමාජ මාධ්‍ය ගිණුම් භාවිත කරමින් ජනවර්ග හා ආගම් අතර ගැටුම්කාරී තත්ත්වයන් ඇති කිරීමට දරන උත්සාහයන් සම්බන්ධයෙන් රජය විශේෂ අවධානයක් යොමු කර ඇති බව මහජන ආරක්ෂක අමාත්‍ය ආනන්ද විජේපාල මහතා පාර්ලිමේන්තුවේදී ඔක්තෝබර් 21 දින පැවසීය.
ඒ සම්බන්ධයෙන් අපරාධ පරීක්ෂණ දෙපාර්තමේන්තුව සහ බුද්ධි අංශ විමර්ශන ආරම්භ කර ඇති බව ද අමාත්‍යවරයා සඳහන් කළේය.
පසුගිය වසර 10ක කාලය තුළ වෛරී ප්‍රකාශ සම්බන්ධ පැමිණිලි හයක් පිළිබඳව අපරාධ පරීක්ෂණ දෙපාර්තමේන්තුව සහ ත්‍රස්ත විමර්ශන කොට්ඨාසය විමර්ශන සිදුකර ඇති බව ද ඔහු පැවසීය.
ශ්‍රී ලංකාව තුළ සමාජ මාධ්‍ය භාවිතය වර්ධනය වීමත් සමඟ මෙරට සහ විදේශයන්හි සිටින පුද්ගලයන් ව්‍යාජ ගිණුම් භාවිත කරමින් ජනවර්ග හා ආගම් අතර නොසන්සුන්තාව ඇති කිරීමට කටයුතු කරන බව අමාත්‍යවරයා පෙන්වා දුන්නේය.
කෙසේ වෙතත්, ඇතැම් සිදුවීම් සම්බන්ධයෙන් විධිමත් පැමිණිලි ඉදිරිපත් නොවීම, ඇතැම් ගිණුම් හිමියන් විදේශයන්හි සිට ක්‍රියාත්මක වීම සහ පවතින නීතිමය විධිවිධානවල අඩුපාඩු හේතුවෙන් විමර්ශන කටයුතුවලදී නීතිය ක්‍රියාත්මක කරන ආයතනවලට දුෂ්කරතා මතුවන බව ද ඔහු සඳහන් කළේය.
එසේ වුවද, අදාළ ව්‍යාජ ගිණුම් පිටුපස සිටින පුද්ගලයන් හඳුනාගෙන සිද්ධීන් සම්බන්ධයෙන් විමර්ශන පැවැත්වීමට පොලිසිය පියවර ගනිමින් සිටින බව අමාත්‍යවරයා පැවසීය.
පාර්ලිමේන්තු මන්ත්‍රී එම්. එල්. ඒ. එම්. හිස්බුල්ලා මහතා යොමු කළ ප්‍රශ්නයකට පිළිතුරු දෙමින් අමාත්‍යවරයා වැඩිදුරටත් සඳහන් කළේ, මුස්ලිම් පුද්ගලයන්ගේ නම් භාවිත කරමින් ව්‍යාජ සමාජ මාධ්‍ය ගිණුම් හරහා වෛරී ප්‍රකාශ පැතිරවූ බවට චෝදනා එල්ල වූ ඉබ්බාගමුව ප්‍රදේශයේ 26 හැවිරිදි පුද්ගලයකු අත්අඩංගුවට ගෙන ඇති බවයි.
එම සැකකරු මුස්ලිම් නම් භාවිත කරමින් වට්ස්ඇප් කණ්ඩායම් නිර්මාණය කර තිබූ බවත්, නොවැම්බර් 11 වැනිදා දළදා මාලිගාව ඇතුළු බෞද්ධ ආගමික ස්ථානවලට ප්‍රහාරයක් එල්ල කිරීමට සැලසුම් කර ඇති බවට සඳහන් පණිවිඩ එම කණ්ඩායම් හරහා සංසරණය කර තිබූ බවත් අමාත්‍යවරයා පැවසීය.
