විධායක බලතල පුළුල් කිරීම සහ සිවිල් නිදහස සීමා කිරීම පිළිබඳ බරපතළ ගැටලු
ත්‍රස්තවාදය වැළැක්වීමේ පනත (PTA) වෙනුවට හඳුන්වා දීමට නියමිත යෝජිත “ත්‍රස්තවාදයෙන් රාජ්‍යය ආරක්ෂා කිරීමේ පනත් කෙටුම්පත”ඉල්ලා අස්කර ගන්නා ලෙස ට්‍රාන්ස්පේරන්සි ඉන්ටර්නැෂනල් ශ්‍රී ලංකා (TISL) ආයතනය නිවේදනයක් නිකුත් කරමින් රජයෙන් ඉල්ලා ඇත.
2026 සැප්තැම්බර් 22 වැනිදා ගැසට් කරන ලද මෙම පනත් කෙටුම්පත තුළ ත්‍රස්තවාදය පිළිබඳ පුළුල් අර්ථ දැක්වීම්, විධායකයේ බලතල පුළුල් කිරීම, පරිපාලනමය රඳවා තබා ගැනීම් සහ මූලික නිදහස සීමා කිරීම සම්බන්ධයෙන් බරපතළ ගැටලු පවතින බව එම ආයතනය නිවේදනය හරහා පෙන්වා දී ඇත.
ජාතික ආරක්ෂාව තහවුරු කිරීමේදී රාජ්‍යයට වගකීමක් ඇති බව පිළිගන්නා ට්‍රාන්ස්පේරන්සි ඉන්ටර්නැෂනල් ශ්‍රී ලංකා ආයතනය නිවේදනය මඟින් අවධාණය කර ඇත්තේ, ත්‍රස්තවාදය මර්දනය කිරීම සඳහා සකස් කරන නීති මඟින් මූලික අයිතිවාසිකම්, නිසි නීතිමය ක්‍රියාපටිපාටිය, අධිකරණයේ ස්වාධීනත්වය සහ ප්‍රජාතන්ත්‍රවාදී අවකාශය අඩපණ නොකළ යුතු බවය.
පනත් කෙටුම්පතේ ත්‍රස්තවාදය පිළිබඳ අර්ථ දැක්වීමට දේපළ, පරිසරය, සංස්කෘතික දේපළ සහ ඉලෙක්ට්‍රොනික පද්ධතිවලට හානි කිරීම මෙන්ම මහජන සෞඛ්‍යයට අවදානම් ඇති කරන ක්‍රියාකාරකම් ද ඇතුළත් කර ඇති බව ට්‍රාන්ස්පේරන්සි ඉන්ටර්නැෂනල් ශ්‍රී ලංකා පෙන්වා දී ඇති අතර ප්‍රමාණවත් ආරක්ෂණ විධිවිධාන නොමැති වීම හේතුවෙන් සාමාන්‍ය අපරාධ නීතිය යටතේ විසඳිය යුතු ක්‍රියාකාරකම් පවා ත්‍රස්තවාදී වැරදි ලෙස සැලකීමේ අවදානමක් පවතින බව එම ආයතනයේ අදහසයි.
එමෙන්ම නීතිය ක්‍රියාත්මක කිරීමේදී සන්නද්ධ හමුදාවන්ට සහ වෙරළාරක්ෂක දෙපාර්තමේන්තුවට අත්අඩංගුවට ගැනීම, සෝදිසි කිරීම, දේපළ අත්පත් කර ගැනීම සහ ප්‍රශ්න කිරීම සම්බන්ධයෙන් පුළුල් බලතල ලබාදීම පිළිබඳව ද ට්‍රාන්ස්පේරන්සි ඉන්ටර්නැෂනල් ශ්‍රී ලංකා සිය කනස්සල්ල පළ කර ඇති අතර එවැනි බලතල ක්‍රියාත්මක කිරීමේදී වගවීම සහ පුද්ගලයන් අත්තනෝමතික ක්‍රියාමාර්ගවලින් ආරක්ෂා කිරීම සම්බන්ධයෙන් ගැටලු මතු විය හැකි බව එහි සඳහන් කර ඇත.
යෝජිත පනත් කෙටුම්පත අනුව, මුල් මාස දෙකක කාලයක් සඳහා රඳවා තබා ගැනීමේ නියෝග නිකුත් කිරීමට ආරක්ෂක අමාත්‍යාංශයේ ලේකම්වරයාට බලය ලැබෙන අතර, එම රඳවා තබා ගැනීමේ අවශ්‍යතාව ස්වාධීනව තක්සේරු කිරීමට මහේස්ත්‍රාත්වරයාට ඇති හැකියාව සීමා වන බව ද එම ආයතනය පෙන්වා දී ඇති අතර යෝජිත සමාලෝචන කමිටුවේ බලතල සීමිත වීම සහ එහි නිර්දේශ අමාත්‍යවරයාට ප්‍රතික්ෂේප කළ හැකි වීම ද අධිකරණ අධීක්ෂණය දුර්වල කර විධායක බලතල සංකේන්ද්‍රණය වීමට හේතු විය හැකි බවත් ට්‍රාන්ස්පේරන්සි ඉන්ටර්නැෂනල් ශ්‍රී ලංකා පවසා ඇත.
සංවිධාන තහනම් කිරීමට ජනාධිපතිවරයාට ලබාදීමට යෝජිත අභිමතානුසාරී බලතල සම්බන්ධයෙන් ද එම ආයතනය අවධානය යොමු කර තිබේ. එවැනි තහනම් කිරීම් මඟින් සංවිධානවලට සිය කටයුතු පවත්වාගෙන යාම, අරමුදල් රැස් කිරීම, රැස්වීම් පැවැත්වීම සහ ප්‍රතිපත්තිමය කරුණු සම්බන්ධයෙන් පෙනී සිටීම සීමා විය හැකි බව එහි අදහසයි.
ඒ අනුව යෝජිත ත්‍රස්තවාදයෙන් රාජ්‍යය ආරක්ෂා කිරීමේ පනත් කෙටුම්පත ඉල්ලා අස්කර ගන්නා ලෙසත්, ත්‍රස්තවාදය වැළැක්වීමේ පනත තවදුරටත් ප්‍රමාදයකින් තොරව අහෝසි කරන ලෙසත් ට්‍රාන්ස්පේරන්සි ඉන්ටර්නැෂනල් ශ්‍රී ලංකා ආයතනය රජයෙන් ඉල්ලා ඇති අතර ත්‍රස්තවාදය වැළැක්වීමේ පනත වෙනුවට හඳුන්වා දෙන ඕනෑම නව නීතියක විධායක බලතල සඳහා පැහැදිලි සීමා, ඵලදායී වගවීමේ යාන්ත්‍රණ සහ අත්තනෝමතික රඳවා තබා ගැනීම් වැළැක්වීමේ ප්‍රමාණවත් ආරක්ෂණ විධිවිධාන තිබිය යුතු බව ද එම ආයතනය අවධාරණය කරයි.
