නාවික හමුදා සේවා කාලය තුළ වැටුප් ලෙස රුපියල් මිලියන 5.15ක් ගෙවා ඇති බව අධිකරණයේදී හෙළි වෙයි
හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ මහතාට එරෙහිව ගොනු කර ඇති මුදල් විශුද්ධිකරණ නඩුවේ වැඩිදුර සාක්ෂි විභාගය ලබන ඔක්තෝබර් 30 වැනිදා දක්වා කල් තැබීමට කොළඹ මහාධිකරණය අද (15) නියෝග කර තිබේ.
කොළඹ මහාධිකරණ විනිසුරු උදේෂ් රණතුංග මහතා ඉදිරියේ අද නඩුව කැඳවූ අවස්ථාවේදී පැමිණිල්ලේ සාක්ෂිකරුවන්ගෙන් සාක්ෂි සටහන් කරගැනීම සිදු කර ඇත. ඉන් අනතුරුව වැඩිදුර සාක්ෂි විභාගය ඔක්තෝබර් 30 වැනිදා දක්වා කල් තැබීමට අධිකරණය නියෝග කළේය.
මේ අතර යෝෂිත රාජපක්ෂ මහතා ශ්‍රී ලංකා නාවික හමුදාවේ සේවය කළ කාලය තුළ වැටුප් වශයෙන් රුපියල් 5,150,626ක පමණ මුදලක් ගෙවා ඇති බව අද අධිකරණයේදී අනාවරණය වී තිබුණු අතර මුදල් විශුද්ධිකරණය වැළැක්වීමේ පනත යටතේ යෝෂිත රාජපක්ෂ මහතාට එරෙහිව පවරා ඇති නඩුවේ සාක්ෂි ලබාදෙමින් නාවික හමුදා නිලධාරියකු මේ බව ප්‍රකාශ කර ඇති බව සඳහන් වේ. අදාළ මුදලට දීමනා ඇතුළත් නොවන බව ද සාක්ෂිකරු වැඩිදුරටත් අධිකරණයට දැනුම් දී තිබුණු අතර නඩුවේ වැඩිදුර සාක්ෂි විභාගය ඔක්තෝබර් 30 වැනිදා පැවැත්වීමට නියමිතය.
