ඉන්ටර්පෝල් රතු නිවේදනයක් ලබාගැනීමටත් අධිකරණයෙන් නියෝග
ඌව පළාත් සභා මැතිවරණ සමයේ ශ්‍රී ලංකා සංචාරක ප්‍රවර්ධන කාර්යාංශයේ මුදල් අවභාවිත කළ බවට එල්ල වී ඇති චෝදනා සම්බන්ධයෙන් හිටපු අමාත්‍ය බැසිල් රාජපක්ෂ මහතා අත්අඩංගුවට ගැනීම සඳහා කොටුව මහේස්ත්‍රාත් අධිකරණය වරෙන්තුවක් නිකුත් කර තිබේ.
එමෙන්ම, බැසිල් රාජපක්ෂ මහතා සම්බන්ධයෙන් ජාත්‍යන්තර පොලිසිය හරහා රතු නිවේදනයක් ලබාගැනීමට අවශ්‍ය පියවර ගන්නා ලෙස අපරාධ පරීක්ෂණ දෙපාර්තමේන්තුවේ නීති විරෝධී වත්කම් විමර්ශන අංශයට මහේස්ත්‍රාත්වරයා නියෝග කර ඇත.
අපරාධ පරීක්ෂණ දෙපාර්තමේන්තුව මෙම සිද්ධිය සම්බන්ධයෙන් අධිකරණයට ඉදිරිපත් කළ කරුණු සලකා බැලීමෙන් අනතුරුව අදාළ නියෝග නිකුත් කර තිබේ.
2014 වසරේදී ශ්‍රී ලංකා සංචාරක ප්‍රවර්ධන කාර්යාංශයට වෙන් කර තිබූ රුපියල් මිලියන 7.8ක මුදල එම කාර්යාංශයේ ප්‍රවර්ධන කටයුතු සඳහා භාවිත කර නොමැති බව නීති විරෝධී වත්කම් විමර්ශන ඒකකය අධිකරණයට දැනුම් දී ඇත.
ඒ වෙනුවට, ඌව පළාත් සභා මැතිවරණ සමයේදී ටී ෂර්ට් 12,000ක් ලබාදීම සඳහා එම මුදල් යොදාගෙන ඇති බවට චෝදනා එල්ල වී තිබේ. මෙම ගනුදෙනුව හේතුවෙන් රජයට මූල්‍ය පාඩුවක් සිදුව ඇති බව ද විමර්ශන අංශය අධිකරණයට වාර්තා කර ඇත.
