විදේශ කටයුතු නියෝජ්‍ය අමාත්‍ය අරුණ් හේමචන්ද්‍ර දැනුම් දෙයි – රාජ්‍ය තාන්ත්‍රික හා නීතිමය මැදිහත්වීම්වල ප්‍රතිඵලයක්
ශ්‍රී ලාංකික අනෝජන් සිවරාසා මහතාට මරණ දඬුවම නියම කරමින් ලබාදී තිබූ තීන්දුව සෞදි අරාබියේ ශ්‍රේෂ්ඨාධිකරණය විසින් ඊයේ (13) අවලංගු කර ඇති බව විදේශ කටයුතු හා විදේශ රැකියා නියෝජ්‍ය අමාත්‍ය අරුන් හේමචන්ද්‍ර මහතා ප්‍රකාශ කර තිබේ.
මෙම තීරණය අනෝජන් සිවරාසා මහතාට විශාල සහනයක් වන බවත් ශ්‍රී ලංකා රජය අඛණ්ඩව සිදු කළ රාජ්‍ය තාන්ත්‍රික හා නීතිමය මැදිහත්වීම්වල ප්‍රතිඵලයක් ලෙස මෙම වර්ධනය සිදුව ඇති බව ද ඔහු සඳහන් කර ඇති අතර මෙම ක්‍රියාවලියේදී සහයෝගය ලබාදීම සම්බන්ධයෙන් සෞදි අරාබි රජයට නියෝජ්‍ය අමාත්‍යවරයා සිය කෘතඥතාව පළ කර ඇත.
එමෙන්ම ශ්‍රී ලංකා තානාපතිවරයාට, විදේශ කටයුතු අමාත්‍යාංශයේ ලේකම්වරයා ඇතුළු නිලධාරීන්ට, ශ්‍රී ලංකා විදේශ සේවා නියුක්ති කාර්යාංශයේ සභාපතිවරයා සහ සාමාජිකයන්ට මෙන්ම මේ සඳහා දායක වූ ශ්‍රී ලාංකික හා සෞදි නීති කණ්ඩායම්වලට ද ඔහු සිය ස්තුතිය පළ කර තිබේ. කෙසේ වෙතත් මරණ දඬුවම අවලංගු කිරීමෙන් පසු සිවරාසා මහතා සම්බන්ධයෙන් ගනු ලබන ඉදිරි නීතිමය ක්‍රියාමාර්ග පිළිබඳ වැඩිදුර තොරතුරු අදාළ ප්‍රකාශයේ සඳහන් කර නොමැත.
