වැලිකඩ බන්ධනාගාරයේ රක්ෂිත බන්ධනාගාරගතව සිටින හිටපු ජනාධිපති මහින්ද රාජපක්ෂ මහතාගේ බිරිඳ වන ශිරන්ති රාජපක්ෂ මහත්මිය කොළඹ ජාතික රෝහලේ හෘද රෝග ඒකකයට ඇතුළත් කර තිබේ.
මීට පෙර ඔක්තෝබර් 9 වැනිදා විශේෂඥ වෛද්‍ය ප්‍රතිකාර ලබාගැනීම සඳහා ඇය ජාතික අක්ෂි රෝහලට රැගෙන ගොස් තිබූ අතර, ප්‍රතිකාරවලින් අනතුරුව නැවත බන්ධනාගාරයට භාර දෙනු ලැබීය. අක්ෂි රෝගී තත්ත්වයක් හේතුවෙන් ඔක්තෝබර් 8 වැනිදා ඇය බන්ධනාගාර වෛද්‍ය විශේෂඥවරයකු වෙත ද යොමු කර තිබිණි.
සිරිලිය සවිය අරමුදලට සම්බන්ධ ගිණුමක සිදුවූ බව කියන මූල්‍ය අක්‍රමිකතා සහ ගනුදෙනු සම්බන්ධයෙන් සිදු කෙරෙන විමර්ශනයකට අදාළව ශිරන්ති රාජපක්ෂ මහත්මිය ඔක්තෝබර් 7 වැනිදා කිරුළපන, පූර්වාරාම පාරේ පිහිටි ඇගේ නිවසේදී අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් අත්අඩංගුවට ගනු ලැබීය.
අදාළ විමර්ශනය සම්බන්ධයෙන් ඇගෙන් පැය දෙකකට ආසන්න කාලයක් ප්‍රකාශයක් සටහන් කරගැනීමෙන් අනතුරුව මෙම අත්අඩංගුවට ගැනීම සිදු කළ බව අල්ලස් කොමිසම සඳහන් කරයි. අනතුරුව කොළඹ මහේස්ත්‍රාත් අධිකරණය ඇය ඔක්තෝබර් 13 වැනිදා දක්වා රක්ෂිත බන්ධනාගාරගත කිරීමට නියෝග කළේය.
මේ අතර, සිරිලිය සවිය ගිණුම සම්බන්ධයෙන් මූල්‍ය අපරාධ විමර්ශන කොට්ඨාසය විසින් අත්අඩංගුවට ගැනීමට ඇති හැකියාව සලකා පූර්ව ඇප ලබාදෙන ලෙස ඇය ඉදිරිපත් කළ අයදුම්පත මාලිගාකන්ද මහේස්ත්‍රාත් අධිකරණය විසින් මීට පෙර ප්‍රතික්ෂේප කර තිබිණි. අතිරේක මහේස්ත්‍රාත් දර්ශිමා ප්‍රේමරත්න මහත්මිය, ශිරන්ති රාජපක්ෂ මහත්මියට කොළඹ පෞද්ගලික රෝහලකින් වෛද්‍ය ප්‍රතිකාර ලබාගැනීම සඳහා අවශ්‍ය කටයුතු සලසන ලෙස ද බන්ධනාගාර බලධාරීන්ට නියෝග කර තිබේ.
