හිටපු එක්සත් ජාතීන්ගේ මානව හිමිකම් පිළිබඳ මහකොමසාරිස් නවනීදන් “නවී” පිල්ලේ මහත්මිය 2026 නොබෙල් සාම ත්‍යාගයේ ජයග්‍රාහිකාව ලෙස නම් කර තිබේ.
ජාත්‍යන්තර නීතිය සහ සාමය ප්‍රවර්ධනය කිරීම සඳහා ඇය දැක්වූ දායකත්වය වෙනුවෙන් මෙම ත්‍යාගය පිරිනමන බව නෝර්වේජියානු නොබෙල් කමිටුවේ සභාපති ජෝර්ගන් වාට්නේ ෆ්‍රයිඩ්නස් ප්‍රකාශ කර ඇත.
ෆ්‍රයිඩ්නස් සඳහන් කර ඇත්තේ නවී පිල්ලේ ජාත්‍යන්තර නීතියේ විෂය පථය සහ බලපෑම සැලකිය යුතු ලෙස පුළුල් කිරීමට දායක වී ඇති බවයි. එමෙන්ම, වඩාත් පුළුල් ගෝලීය නීතිමය පද්ධතියක් ගොඩනැගීම සඳහා ඇය සුවිශේෂී ධෛර්යයකින් යුතුව කටයුතු කර ඇති බවද ඔහු පවසා තිබේ.
නවී පිල්ලේ දකුණු අප්‍රිකාවේ ඩර්බන් නගරයේ, වර්ණභේදවාදී පාලන සමයේදී ඉන්දීය දෙමළ සම්භවයක් සහිත පවුලක උපත ලබා තිබේ. නීතිඥවරියක ලෙස වෘත්තීය ජීවිතය ආරම්භ කළ ඇය, වර්ණභේදවාදයට එරෙහිව කටයුතු කළ නෙල්සන් මැන්ඩෙලා ඇතුළු පිරිස වෙනුවෙන්ද පෙනී සිටියාය. පසුව දකුණු අප්‍රිකානු මහාධිකරණයේ විනිසුරුවරියක, රුවන්ඩා ජාත්‍යන්තර අපරාධ විනිශ්චය සභාවේ විනිසුරුවරියක සහ ජාත්‍යන්තර අපරාධ අධිකරණයේ විනිසුරුවරියක ලෙසද සේවය කර තිබේ.
එක්සත් ජාතීන්ගේ මානව හිමිකම් පිළිබඳ මහකොමසාරිස්වරිය ලෙසද කටයුතු කළ ඇය, ජාත්‍යන්තර නීතිය ශක්තිමත් කිරීම සහ යුද අපරාධ, මනුෂ්‍යත්වයට එරෙහි අපරාධ හා ජන සංහාර සම්බන්ධයෙන් වගවීම තහවුරු කිරීම සඳහා දායක වී ඇත.
2026 නොබෙල් සාම ත්‍යාගය නිල වශයෙන් පිරිනැමීමේ උත්සවය දෙසැම්බර් 10 වැනිදා පැවැත්වීමට නියමිතය
