මෙවර එල් නිනෝ දේශගුණික තත්ත්වය ඉදිරි මාසවලදී තවදුරටත් තීව්‍ර වී දෙසැම්බර් මාසයේදී උච්චතම අවස්ථාවට පත්වීමෙන් පසු 2027 පෙබරවාරි දක්වා පැවතීමට ආසන්න වශයෙන් සියයට 100ක සම්භාවිතාවක් පවතින බව ලෝක කාලගුණ විද්‍යා සංවිධානය පවසයි.
ලෝක කාලගුණ විද්‍යා සංවිධානය විසින් නිකුත් කළ මාසික දේශගුණික බුලටින්හි මේ බව සඳහන් කර ඇති අතර, මෙවර එල් නිනෝ තත්ත්වය 1950න් පසු වාර්තා වූ ප්‍රබලතම එල් නිනෝ තත්ත්වයන් අතරින් එකක් විය හැකි බව එහි මහලේකම් සෙලෙස්ටේ සවුලෝ සඳහන් කර තිබේ.
එල් නිනෝ තත්ත්වයේ කේන්ද්‍රස්ථානය වන මධ්‍යම හා නැගෙනහිර නිවර්තන පැසිෆික් සාගරයේ මුහුදු මතුපිට උෂ්ණත්වය ඔක්තෝබර් සිට දෙසැම්බර් දක්වා කාලය තුළ සාමාන්‍ය අගයට වඩා සෙල්සියස් අංශක 3.7කින් ඉහළ යනු ඇතැයි ලෝක කාලගුණ විද්‍යා සංවිධානය පුරෝකථනය කරයි.
එය 2015 නොවැම්බර් සිට 2016 ජනවාරි දක්වා වාර්තා වූ සෙල්සියස් අංශක 2.6ක පෙර වාර්තාවද ඉක්මවා යන අගයක් බව එම සංවිධානය සඳහන් කරයි.
“එල් නිනෝ බලපෑම ලබාගන්නා සාගරය අප මෙතෙක් මැන ඇති උණුසුම්ම සාගරයයි. එහි මුදාහැරීමට ඇති තාප ප්‍රමාණය විශාලයි” යනුවෙන් ලෝක කාලගුණ විද්‍යා සංවිධානයේ මහලේකම්වරිය සඳහන් කර ඇත.
එල් නිනෝ යනු ස්වභාවිකව සිදුවන ‘එල් නිනෝ–දකුණු දෝලනය’ හෙවත් ENSO දේශගුණික චක්‍රයේ උණුසුම් අවස්ථාවයි. එය ලොව පුරා කාලගුණ රටාවන්ට බලපෑම් කරන අතර ඇතැම් ප්‍රදේශවල නියඟ තත්ත්ව ඇති කිරීමටත් තවත් ප්‍රදේශවල අධික වර්ෂාපතනය ඇති කිරීමටත් හේතු විය හැකිය. එල් නිනෝ තත්ත්වයක් සාමාන්‍යයෙන් වසර දෙකත් හතත් අතර කාල පරාසයකදී ඇතිවන අතර, ගෝලීය උෂ්ණත්වය ඉහළ යාමටද එය බලපායි.
මේ අතර යුරෝපා සංගමයේ කොපර්නිකස් දේශගුණික විපර්යාස සේවයට අනුව, අගෝස්තු මාසයේ ගෝලීය සාමාන්‍ය උෂ්ණත්වය සෙල්සියස් අංශක 16.96ක් දක්වා ඉහළ ගොස් ඇති අතර එය 2023 ජූලි මාසය සමඟ සමව මෙතෙක් වාර්තා වූ උණුසුම්ම මාසය බව සඳහන් වේ.
චිකාගෝ විශ්වවිද්‍යාලයේ Climate Impact Lab ආයතනයේ පර්යේෂකයන් පසුගිය මාසයේ සිදුකළ පුරෝකථනයකට අනුව, මෙම ප්‍රබල එල් නිනෝ තත්ත්වය හේතුවෙන් 2027 පෙබරවාරි දක්වා කාලය තුළ ලොව පුරා අතිරේක මරණ 451,000ක් පමණ සිදුවිය හැකි බවටද අනාවැකි පළ කර තිබේ.
