ත්‍රස්තවාදය වැළැක්වීමේ පනත හෙවත් පීටීඒ අහෝසි කරන බවට පොරොන්දු වෙමින් බලයට පත් ජනාධිපති අනුර කුමාර දිසානායක, ත්‍රස්තවාදය වැළැක්වීමේ පනත යටතේ අත්අඩංගුවට ගෙන රැඳවුම් නියෝග මත තබාගන්නා පුද්ගලයන් රඳවා තැබීමට තවත් අලුත් රැඳවුම් ස්ථානයක් නම් කර තිබේ.
ඒ, කොළඹ 05, නාරාහේන්පිට, කම්කරු මහ ලේකම් කාර්යාලයේ 07 වන මහලෙහි පිහිටි මධ්‍යම අපරාධ විමර්ශන කාර්යාංශයයි. එම ස්ථානය රැඳවුම් ස්ථානයක් බව ප්‍රකාශයට පත්කරන 2026 ඔක්තෝබර් 06 දින අංක 2509/11 දරන අති විශේෂ ගැසට් පත්‍රය දැන් නිකුත් කර තිබේ.
1979 අංක 48 දරන ත්‍රස්තවාදය වැළැක්වීමේ (තාවකාලික) විධිවිධාන පනත යටතේ පැවරී ඇති බලතල අනුව ආරක්ෂක ඇමති වශයෙන් ජනාධිපති අනුර කුමාර දිසානායක එම නව රැඳවුම් ස්ථානය ප්‍රකාශයට පත්කර ඇත.
ත්‍රස්තවාදය වැළැක්වීමේ පනත යටතේ අත්අඩංගුවට ගන්නා සැකකරුවන් ආරක්ෂක ඇමතිවරයාගේ අත්සන සහිත රැඳවුම් නියෝගයක් යටතේ දීර්ඝ කාලයක් මෙවැනි රැඳවුම් ස්ථානයක රඳවාගත හැකිය.
සිය මැතිවරණ ප්‍රතිපත්ති ප්‍රකාශයෙන් ත්‍රස්තවාදය වැළැක්වීමේ පනත අහෝසි කරන්නට පොරොන්දු වුණු වත්මන් ජනාධිපතිවරයා විසින්ම තවත් අලුත් රැඳවුම් ස්ථානයක් ප්‍රකාශයට පත්කරනු ලැබීම විශේෂත්වයකි.
