හිටපු අගවිනිසුරු ශිරාණි බණ්ඩාරනායක මහත්මියගේ සැමියා වන ජාතික ඉතිරි කිරීමේ බැංකුවේ හිටපු සභාපති ප්‍රදීප් කාරියවසම් මහතා ඇප මත මුදාහැරීමට කොළඹ ප්‍රධාන මහේස්ත්‍රාත් අධිකරණය නියෝග කර තිබේ.
කොළඹ අතිරේක මහේස්ත්‍රාත් දර්ශිමා ප්‍රේමරත්න මහත්මිය නියෝග කර ඇත්තේ රුපියල් ලක්ෂ 100 බැගින් වූ ශරීර ඇප දෙකක් මත ඔහු මුදාහැරීමටයි.
එමෙන්ම සැකකරුගේ විදේශ ගමන් තහනම් කිරීමටද අධිකරණය නියෝග කර තිබේ.
අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් සහ සැකකරු වෙනුවෙන් පෙනී සිටි නීතිඥවරුන් ඉදිරිපත් කළ කරුණු සලකා බැලීමෙන් අනතුරුව අධිකරණය මෙම නියෝගය නිකුත් කර ඇත.
ජාතික ඉතිරි කිරීමේ බැංකුව විසින් රුපියල් මිලියන 10ක මුදලක් ‘සිරිලිය සවිය’ සංවිධානයේ බැංකු ගිණුමට බැර කිරීම සම්බන්ධයෙන් දූෂණය නමැති වරද සිදුකිරීම, ඊට ආධාර අනුබල දීම සහ සාපරාධී සාවද්‍ය පරිහරණය යන චෝදනා සම්බන්ධයෙන් සැකපිට ප්‍රදීප් කාරියවසම් මහතා අද (07) අල්ලස් කොමිසම විසින් අත්අඩංගුවට ගෙන අධිකරණයට ඉදිරිපත් කර තිබිණි.
