අල්ලස් හෝ දූෂණ චෝදනා විමර්ශන කොමිෂන් සභාව විසින් අත්අඩංගුවට ගෙන අධිකරණයට ඉදිරිපත් කළ හිටපු අමාත්‍ය රෝහිත බෝගොල්ලාගම මහතා නඩු විභාගය අවසන් වන තෙක් රක්ෂිත බන්ධනාගාරගත කිරීමට කොළඹ මහාධිකරණය අද (07) නියෝග කර තිබේ.
මහාධිකරණ විනිසුරු රශාන්ත ගොඩවෙල මහතා විසින් මෙම නියෝගය නිකුත් කර ඇත. අදාළ නඩුව සම්බන්ධයෙන් අල්ලස් කොමිසම විසින් ඉදිරිපත් කළ කරුණු සලකා බැලීමෙන් අනතුරුව මෙම නියෝගය ලබාදී තිබේ.
කොළඹ මහාධිකරණය විසින් නිකුත් කර තිබූ විවෘත වරෙන්තුවකට අනුව බෝගොල්ලාගම මහතා අද පෙරවරුවේ අල්ලස් කොමිසමේ නිලධාරීන් විසින් අත්අඩංගුවට ගෙන තිබිණි. අල්ලස් කොමිසම විසින් බෝගොල්ලාගම මහතාට එරෙහිව පවරා තිබූ දූෂණ චෝදනා සම්බන්ධ නඩුවට ඔහු අවස්ථා කිහිපයකදී අධිකරණයේ පෙනී නොසිටීම හේතුවෙන් ඔහු අත්අඩංගුවට ගැනීම සඳහා විවෘත වරෙන්තු නිකුත් කර තිබූ බව සඳහන් වේ.
අත්අඩංගුවට ගැනීමෙන් අනතුරුව ඔහු අද කොළඹ මහාධිකරණය හමුවට ඉදිරිපත් කර තිබේ.
