හිටපු රාජ්‍ය බුද්ධි සේවා අධ්‍යක්ෂ මේජර් ජෙනරාල් (විශ්‍රාමික) සුරේෂ් සලේ මහතා කොළඹ ජාතික රෝහලෙන් මුදාහැරීම සඳහා වෛද්‍ය මණ්ඩලය නිර්දේශ කිරීමෙන් අනතුරුව අද (6) පස්වරුවේ අපරාධ පරීක්ෂණ දෙපාර්තමේන්තුව (CID) වෙත රැගෙන යාමට නියමිත බව නීතිපතිවරයා විසින් අධිකරණයට දැනුම් දී තිබේ.
කොළඹ කොටුව මහේස්ත්‍රාත් අධිකරණය හමුවේ අද නඩුව කැඳවූ අවස්ථාවේදී අතිරේක සොලිසිටර් ජනරාල් දිලීප පීරිස් මහතා මේ බව දැනුම් දී ඇත.
සලේ මහතාට ප්‍රතිකාර කරන වෛද්‍යවරුන් 10 දෙනෙකු විසින් ඉදිරිපත් කළ වාර්තාවකින් ඔහු රෝහලෙන් මුදාහැරීමට නිර්දේශ කර ඇති බව අතිරේක සොලිසිටර් ජනරාල්වරයා සඳහන් කර ඇති අතර රෝහලෙන් මුදාහැරීමෙන් අනතුරුව ඔහු CIDයට රැගෙන යන බවත් එහිදී අදාළ නඩුව සම්බන්ධ විමර්ශන යළි ආරම්භ කිරීමට නියමිත බවත් අධිකරණයට දැනුම් දී තිබේ.
මේජර් ජෙනරාල් සලේ මහතා පසුගිය ජුනි 7 වැනිදා සිට කොළඹ ජාතික රෝහලේ ප්‍රතිකාර ලබන අතර හෘද රෝග ඒකකයට අනුබද්ධ හදිසි ප්‍රතිකාර ඒකකයේද ප්‍රතිකාර ලබා තිබේ.
මීට පෙර අධිකරණයට ඉදිරිපත් කළ වෛද්‍ය විශේෂඥයන් නව දෙනෙකුගෙන් සමන්විත මණ්ඩලයක වාර්තාවක සඳහන්ව තිබුණේ සලේ මහතාගේ හෘදය විශාල වී ඇති බවත්, එම තත්ත්වය පාලනය කිරීම සඳහා වෛද්‍ය උපකරණයක් සවි කර ඇති බවත්ය. එම උපකරණය සඳහා රුපියල් මිලියන 4කට ආසන්න මහජන මුදලක් වැය කර ඇති බවද පැමිණිල්ල අධිකරණයට දැනුම් දී තිබිණි.
සලේ මහතාට ප්‍රතිකාර කරන වෛද්‍යවරුන් 10 දෙනාට අද කොටුව මහේස්ත්‍රාත් අධිකරණය හමුවේ පෙනී සිටින ලෙස මීට පෙර නොතීසි නිකුත් කර තිබිණි. අපරාධ පරීක්ෂණ දෙපාර්තමේන්තුව විසින් මෝසමක් මගින් අධිකරණයට කරුණු වාර්තා කිරීමෙන් අනතුරුව එම නොතීසි නිකුත් කර තිබිණි.
සලේ මහතාගේ හෘද හා මානසික සෞඛ්‍ය තත්ත්වය ස්ථාවර මට්ටමක පවතින බවත්, දන්ත ගැටලුව විසඳීමෙන් අනතුරුව ඔහු රෝහලෙන් මුදාහැරිය හැකි බවත් අධිකරණයට දැනුම් දී තිබේ.
2019 පාස්කු ඉරිදා ත්‍රස්ත ප්‍රහාර සම්බන්ධයෙන් කොටුව මහේස්ත්‍රාත් අධිකරණය හමුවේ නඩු කටයුතු සිදුවන සැකකරුවන් තිදෙනා අතර සලේ මහතාද සිටී.
මීට පෙර පැවති නඩු විභාගයකදී සලේ මහතාගේ ලැප්ටොප් පරිගණකය සහ ජංගම දුරකථනවල මුරපද ලබාදී නොමැති බවට පැමිණිල්ල අධිකරණයට කරුණු ඉදිරිපත් කර තිබිණි. අධිකරණ නියෝගයක් තිබියදීත් එම මුරපද ලබාදී නොමැති බව පැමිණිල්ල සඳහන් කළ අතර, ආරක්ෂක හේතු මත හමුදා බුද්ධි අංශ නිලධාරීන් මුරපද නිරන්තරයෙන් වෙනස් කරන බව විත්තිය පවසා තිබේ.
විමර්ශනවල ප්‍රගතිය සම්බන්ධයෙන් වාර්තාවක් ඔක්තෝබර් 21 වැනිදා අධිකරණයට ඉදිරිපත් කරන ලෙසද අධිකරණය නියෝග කර ඇත.
