හිටපු නියෝජ්‍ය අමාත්‍ය සරණ ගුණවර්ධන මහතාගේ බිරිඳ, අධිකරණ සේවකයෙකු සහ රෙජිස්ට්‍රාර්වරයෙකු අල්ලස් සිද්ධියක් සම්බන්ධයෙන් තවදුරටත් රක්ෂිත බන්ධනාගාරගත කිරීමට කොළඹ මහේස්ත්‍රාත් අධිකරණය නියෝග කර තිබේ.
ඒ අනුව සැකකරුවන් ඔක්තෝබර් 20 වැනිදා දක්වා රක්ෂිත බන්ධනාගාරගත කිරීමට කොළඹ ප්‍රධාන මහේස්ත්‍රාත් අසංග එස්. බෝදරගම මහතා නියෝග කර ඇත.
අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් සහ සැකකරුවන් වෙනුවෙන් පෙනී සිටි නීතිඥවරුන් ඉදිරිපත් කළ කරුණු සලකා බැලීමෙන් අනතුරුව මහේස්ත්‍රාත්වරයා මෙම නියෝගය නිකුත් කර ඇත.
හිටපු නියෝජ්‍ය අමාත්‍ය සරණ ගුණවර්ධන මහතාට එරෙහිව කොළඹ මහාධිකරණ අංක 11 හි විභාග වන තවත් අල්ලස් නඩුවකදී ලිහිල් දඬුවමක් ලබාගැනීම සඳහා රුපියල් 50,000ක අල්ලසක් ලබාදීම, ලබාගැනීම සහ ඊට ආධාර අනුබල දීම සම්බන්ධයෙන් සැකකරුවන් අත්අඩංගුවට ගෙන තිබේ.
සරණ ගුණවර්ධන මහතා මේ වන විට එම නඩුවකට අදාළව සිරදඬුවමක් විඳිමින් සිටින බවද සඳහන් වේ.
