ඉන්දියාවේ ඡන්ද නාමලේඛන සංශෝධනය සම්බන්ධයෙන් මතුව ඇති මතභේදය හමුවේ, මැතිවරණ කොමිසමේ ප්‍රධාන මැතිවරණ කොමසාරිස් ග්‍යානේෂ් කුමාර් මහතාගේ ඉල්ලා අස්වීම ඉල්ලා තරුණ හා ශිෂ්‍ය සංවිධාන ඇතුළු කණ්ඩායම් අද (2) නවදිල්ලියේ සහ මුම්බායිහි විරෝධතා පැවැත්වීමට නියමිතය.
Gen Z නායකත්වයෙන් යුත් Cockroach Janata Party (CJP) මුම්බායිහි විරෝධතාවක් සංවිධානය කර ඇති අතර, ඉදිරි දිනවලදී එය රට පුරා ව්‍යාප්ත කිරීමට සැලසුම් කර ඇති බව විදෙස් මාධ්‍ය වාර්තා කර ඇත. මේ අතර ශිෂ්‍ය හා සිවිල් සමාජ සංවිධාන නවදිල්ලියේ ජන්තර මන්තර ප්‍රදේශයේ විරෝධතාවක් පැවැත්වීමට නියමිතය.
විරෝධතාකරුවන්ගේ ප්‍රධාන චෝදනාව වන්නේ අග්‍රාමාත්‍ය නරේන්ද්‍ර මෝදිගේ භාරතීය ජනතා පක්ෂයට (BJP) වාසි වන ආකාරයෙන් මැතිවරණ නාමලේඛන වෙනස් කර ඇති බවයි. කෙසේ වෙතත්, ඉන්දීය මැතිවරණ කොමිසම සහ රජය එම චෝදනා ප්‍රතික්ෂේප කර තිබේ.
පසුගිය වසරේ ආරම්භ කළ රටපුරා ඡන්දදායකයන්ගේ තොරතුරු සත්‍යාපනය කිරීමේ වැඩසටහන මෙම මතභේදයේ කේන්ද්‍රස්ථානය වී තිබේ. විවේචකයන් පවසන්නේ එම ක්‍රියාවලිය හේතුවෙන් ඡන්දය ප්‍රකාශ කිරීමට සුදුසුකම් ඇති මිලියන ගණනක පුද්ගලයන්ගේ නම් ඡන්ද නාමලේඛනවලින් ඉවත් කර ඇති බවයි.
කෙසේ වෙතත්, මැතිවරණ කොමිසම පවසන්නේ මෙම වැඩසටහනේ අරමුණ අනුපිටපත් ඡන්දදායකයන්, මියගිය පුද්ගලයන් සහ සුදුසුකම් නොමැති පුද්ගලයන් ඉවත් කරමින් ඡන්ද නාමලේඛනවල නිරවද්‍යතාව තහවුරු කිරීම බවයි.
මැතිවරණ කොමසාරිස් ග්‍යානේෂ් කුමාර් මහතා සම්බන්ධයෙන් පීඩනය තවදුරටත් ඉහළ ගොස් ඇත්තේ, ඡන්ද නාමලේඛන සංශෝධනය, ලියාපදිංචි කිරීමේ ක්‍රියාපටිපාටි සහ මැතිවරණ කොමිසමේ ඩිජිටල් පද්ධති සම්බන්ධයෙන් ඔහුගේ නියෝජ්‍ය මැතිවරණ කොමසාරිස්වරුන් දෙදෙනා පසුගිය මාස 10 තුළ අවම වශයෙන් අවස්ථා 14කදී කරුණු මතු කර ඇති බවට Indian Express පුවත්පත වාර්තා කිරීමෙන් අනතුරුවය.
එමෙන්ම කොමිසම පවසා ඇත්තේ අභ්‍යන්තර සාකච්ඡාවලදී විවිධ මත ඉදිරිපත් වීම සාමාන්‍ය තත්ත්වයක් බවත්, සියලු ක්‍රියාමාර්ග නීත්‍යනුකූලව සිදුකර ඇති බවත්ය.
මේ අතර, කොංග්‍රස් පක්ෂය ප්‍රමුඛ විපක්ෂ පක්ෂද ඔක්තෝබර් 6 වැනිදා සිට මැතිවරණ කොමසාරිස්වරයාගේ ඉල්ලා අස්වීම ඉල්ලා විරෝධතා ආරම්භ කිරීමට නියමිත බව වාර්තා වේ.
Cockroach Janata Party (CJP) යනු රැකියා හිඟය සහ විභාග ප්‍රශ්න පත්‍ර කාන්දු වීම සම්බන්ධයෙන් අන්තර්ජාලය ඔස්සේ මතුවූ තරුණ විරෝධතාවලින් මෙම වසරේ ආරම්භ වූ දේශපාලන ව්‍යාපාරයකි.
