ඉස්ලාම් දහමට අපහාසාත්මක ප්රකාශයක් සිදු කළ බවට චෝදනා කරමින් පූජ්ය ගලගොඩඅත්තේ ඥානසාර හිමියන්ට එරෙහිව කොළඹ මහාධිකරණය හමුවේ පවරා ඇති නඩුවට අදාළව ඒ හිමියන් අත්අඩංගුවට ගෙන අධිකරණයට ඉදිරිපත් කරන ලෙස කොළඹ මහාධිකරණය අද (30) වරෙන්තු නිකුත් කර ඇත.
කොළඹ මහාධිකරණ විනිසුරු බුද්ධික සී. රාගල මහතා විසින් අදාල නියෝගය නිකුත් කර ඇති අතර අදාල නඩුව අධිකරණය හමුවේ කැඳවූ අවස්ථාවේදී විත්තිකාර ඥානසාර හිමියන් අධිකරණය හමුවේ පෙනී සිට නොමැත.
ඒ හිමියන් අසනීප තත්ත්වයෙන් පසුවන බව සඳහන් කරමින් වෛද්ය වාර්තාවක් අධිකරණයට ඉදිරිපත් කර තිබුණද, ඥානසාර හිමියන්ගේ ඇපකරුවන් අධිකරණය හමුවේ පෙනී සිය නොමැත.
ඥානසාර හිමියන් වෙනුවෙන් පෙනී සිටි නීතිඥ අසෝක වීරසූරිය මහතා අධිකරණය හමුවේ කරුණු දක්වමින් සඳහන් කර ඇත්තේ නඩු කටයුත්ත කෙටි ක්රමයකින් අවසන් කර ගැනීමට සිය සේවාදායක හිමියන් අපේක්ෂා කරන බවත් ඒ සම්බන්ධයෙන් නීතිපතිවරයා වෙත නියෝජන ඉදිරිපත් කර ඇති බවත්ය.
කෙසේ වෙතත් ඉදිරිපත් වූ කරුණු සලකා බැලීමෙන් අනතුරුව මහාධිකරණ විනිසුරුවරයා අධිකරණය හමුවේ දන්වා ඇත්තේ ඥානසාර හිමියන් අසනීප තත්වයෙන් පසුවන බවට ඉදිරිපත් කළ වෛද්ය වාර්තාව සම්බන්ධයෙන් සෑහීමකට පත්විය නොහැකි වීම සහ ඇපකරුවන් අධිකරණය හමුවේ පෙනී නොසිටීම හේතුවෙන් ඥානසාර හිමියන් අත්අඩංගුවට ගෙන අධිකරණයට ඉදිරිපත් කරන ලෙස වරෙන්තු නිකුත් කර ඇත.
ඉස්ලාම් ආගමිකයන්ගේ ශුද්ධ වූ කුරාණය සම්බන්ධයෙන් ඥානසාර හිමියන් සිදු කළ බව කියන ප්රකාශ මගින් ඉස්ලාම් දහමට අපහාසයක් සිදුවී ඇති බවට චෝදනා කරමින් දණ්ඩ නීති සංග්රහයේ ප්රතිපාදන යටතේ නීතිපතිවරයා විසින් මෙම නඩුව පවරා ඇත.
මීට පෙර අධිකරණයට අපහාස කිරීමේ චෝදනාවකට සිරදඬුවම් නියම වී සිටි ඥානසාර හිමියන්ට ලබාදී තිබූ ජනාධිපති සමාව බලරහිත බව ශ්රේෂ්ඨාධිකරණය තීරණය කර තිබූ අතර එම තීන්දුවෙන් අනතුරුව උන්වහන්සේ අත්අඩංගුවට ගෙන අධිකරණයට ඉදිරිපත් කරන ලෙස අභියාචනාධිකරණය ඔක්තෝබර් 29 වෙනිදා නියෝග කර තිබිණි.
