අධිකරණයට අපහාස කිරීම සම්බන්ධයෙන් ගොනුකර ඇති පෙත්සමකට අදාළව අධිකරණය හමුවේ පෙනී සිටීමට ගලගොඩඅත්තේ ඥානසාර හිමියන් අද (29) අධිකරණයට පැමිණ නොසිටීම හේතුවෙන්, ඒ හිමියන්ට අධිකරණය හමුවේ පෙනී සිටින ලෙස දැනුම් දෙන ලෙස ඒ හිමියන්ට වෙනුවෙන් පෙනී සිටි ජනාධිපති නීතිඥ අනුර මැද්දේගොඩ මහතාට අභියාචනාධිකරණය නියෝග කර ඇත.
මයාදුන්න කොරෙයා සහ ලක්මාලි කරුණානායක යන විනිසුරුවරුන්ගෙන් සමන්විත ද්විපුද්ගල විනිසුරු මඬුල්ලක් හමුවේ මෙම පෙත්සම් විභාගය කැඳවා තිබිණි.
අධිකරණය හමුවේ කරුණු දක්වමින් ඥානසාර හිමියන් වෙනුවෙන් පෙනී සිටි ජනාධිපති නීතිඥ අනුර මැද්දේගොඩ අධිකරණයට දැනුම් දී ඇත්තේ තම සේවාදායකයා ශල්යකර්මයකට භාජනය වීමට නියමිතව ඇති බැවින් අධිකරණය හමුවේ පෙනී නොසිටි බවය. කෙසේ වෙතත්, ඥානසාර හිමියන් අද අධිකරණයේ පෙනී නොසිටීමට හේතුව සනාථ කිරීම සඳහා කිසිදු වෛද්ය සහතිකයක් අධිකරණයට ඉදිරිපත් කර නොමැති බව වාර්තා වේ.
නීතිපතිවරයා වෙනුවෙන් පෙනී සිටි රජයේ නීතිඥවරයා අධිකරණයට දැනුම් දුන්නේ අධිකරණයට අපහාස කිරීමේ නඩු කටයුත්තකදී වගඋත්තරකරුගේ පෙනී සිටීම අත්යවශ්ය බවය. ඒ අනුව වගඋත්තරකරුට එරෙහිව වරෙන්තුවක් නිකුත් කරන ලෙස හෝ හැකිනම් අදම අධිකරණය හමුවේ පෙනී සිටින ලෙස ඔහුට නියෝග කරන ලෙස රජයේ නීතිඥවරයා ඉල්ලා තිබිණි.
ඉදිරිපත් වූ කරුණු සලකා බැලූ අභියාචනාධිකරණය, ඥානසාර හිමියන්ට අධිකරණය හමුවේ පෙනී සිටින ලෙස දැනුම් දෙන ලෙස ජනාධිපති නීතිඥ අනුර මැද්දේගොඩ මහතාට නියෝග කළ අතර අනතුරුව වගඋත්තරකාර පාර්ශ්වයට අධිකරණය හමුවේ පෙනී සිටීමට අවස්ථාව ලබාදීම සඳහා මෙම කරුණ පසුව කැඳවීමට නියම කෙරිණි.
