22 වැනි ආණ්ඩුක්රම ව්යවස්ථා සංශෝධනය ආණ්ඩුක්රම ව්යවස්ථාවට අනුකූල බවත්, පාර්ලිමේන්තුවේ තුනෙන් දෙකක මන්ත්රී ඡන්දයෙන් පමණක් එය සම්මත කළ හැකි බවත් ශ්රේෂ්ඨාධිකරණය කථානායකවරයා වෙත දන්වා තිබේ. සැප්තැම්බර් 22 වැනිදා උදේ පාර්ලිමේන්තුව රැස්වූ අවස්ථාවේදී කථානායක ජගත් වික්රමරත්න, එම තීරණය පාර්ලිමේන්තුවට දැනුම් දුන්නේය.
22 වැනි සංශෝධනයට එරෙහිව ඉදිරිපත් වුණු පෙත්සම් විභාග කළ පංච පුද්ගල ශ්රේෂ්ඨාධිකරණ විනිසුරු මඬුල්ල ඒකමතිකව මෙම තීරණයට එළැඹී තිබේ. ආණ්ඩුක්රම ව්යවස්ථාවේ 83 වැනි ව්යවස්ථාව යටතේ මෙම සංශෝධනය සම්මත කරගැනීම සඳහා ජනමත විචාරණයක් අවශ්ය නොවන බව ශ්රේෂ්ඨාධිකරණය කියයි.
22 වැනි සංශෝධන කෙටුම්පතේ සඳහන් ‘(වයස අවුරුදු) 67ට එළඹෙන දිනය’ වෙනුවට ‘67 සම්පූර්ණ කළ දිනය’ යනුවෙන් යෙදිය යුතු බවද ශ්රේෂ්ඨාධිකරණ තීරණයේ සසඳහන් වෙයි. එසේම 22 සඳහන් ‘වයස 67ට එළඹීම හෝ අවුරුදු 6ක් අගවිනිසුරුධුරයේ කටයුතු කිරීම යන දෙකෙන් පළමුව එළඹෙන දිනයේ අගවිනිසුරුවරයා විශ්රාම යා යුතු’ බවට වන ප්රතිපාදනය, වර්තමාන අගවිනිසුරුවරයාට අදාළ නොවන බවට සංශෝධනයට ඇතුළත් කළ යුතු බවද ශ්රේෂ්ඨාධිකරණය සිය තීරණයෙහි දක්වා ඇති බව කථානායකවරයා නිවේදනය කළේය.
මේ වසරේ දෙසැම්බර් 1 වැනිදා වයස අවුරුදු 65 සම්පූර්ණ වූ විට විශ්රාම යාමට නියමිතව සිටි අගවිනිසුරු ප්රීති පද්මන් සූරසේන තවත් අවුරුදු දෙකක් එම ධුරයේ තබාගැනීමට ආණ්ඩුවට තිබුණු වුවමනාව නිසා 22 වැනි සංශෝධනය ගෙන ඒමට පියවර ගත් අතර, අගවිනිසුරුවරයාගේ පමණක් විශ්රාම වයස දීර්ඝ කළ නොහැකි නිසා, සියලු ශ්රේෂ්ඨාධිකරණ විනිසුරුවරුන්ගේද, ඊට පසුව අභියාචනාධිකරණ විනිසුරුවරුන්ගේද විශ්රාම වයස දීර්ඝ කිරීම සඳහා 22 වැනි සංශෝධනය පුළුල් කරනු ලැබීය.
22 සංශෝධනය ගෙනෙන්නේ අගවිනිසුරුගේ විශ්රාම වයස දීර්ඝ කිරීම සඳහාය යනුවෙන් ගොඩනැගුණු සමාජ විරෝධය නිසා, අවසානයේ මහාධිකරණ විනිසුරුවරුන්ගේ විශ්රාම වයසද දීර්ඝ කිරීමට අධිකරණ සංවිධාන පනත සංශෝධනය කරන්නට ආණ්ඩුවට සිදුවිය. 22 ගෙනෙන්නේ අධිකරණවල ගොඩගැසී ඇති නඩු ප්රමාණය අවසන් කිරීමට යැයි ව්යාජ ප්රවාදයක්ද ආණ්ඩුව විසින් ඒ අතර සමාජගත කරන ලදි. එහෙත්, 22 වැනි සංශෝධනය හා අධිකරණවල ගොඩගැසී ඇති නඩු ඉක්මනින් විසඳීම අතර කිසිම සම්බන්ධයක් නැත.
22 වැනි සංශෝධනයේ ආණ්ඩුක්රම ව්යවස්ථානුකූලභාවය ප්රශ්න කරමින් පෙත්සම් 67ක් ශ්රේෂ්ඨාධිකරණය වෙත ඉදිරිපත් කෙරුණු අතර, සැප්තැම්බර් 1 හා 2 දිනවල එම පෙත්සම් පිළිබඳ විමසීම පැවැත්විණි. ඒ සඳහා මෙම සංශෝධනයේ වැඩිම ප්රතිලාභියා වන අගවිනිසුරු ප්රීති පද්මන් සූරසේන මූලාසනය දරන, ඔහු විසින්ම නම් කරන ලද පංච පුද්ගල විනිශ්චය මණ්ඩලයක් පත්කෙරුණු අතර, ඊට ශ්රේෂ්ඨාධිකරණයේ ජ්යෙෂ්ඨතම විනිසුරුවරුන් තිදෙනකු ඇතුළත් කිරීමෙන් වැළකීම විශේෂ කාරණයක් විය.
ඒ, 22හි වැඩිම ප්රතිලාභියා වන අගවිනිසුරුවරයා නම් කරන විනිසුරු මඬුල්ලක් වෙනුවට ශ්රේෂ්ඨාධිකරණයේ සියලුම විනිසුරුවරුන් සහභාගි වන විනිසුරු මඬුල්ලක් නම් කරන ලෙස පෙත්සම්කරුවන් වෙනුවෙන් ඉල්ලා සිටියදීය.
පෙත්සම්කරුවන්ගේ එම ඉල්ලීම ශ්රේෂ්ඨාධිකරණය විසින් ප්රතික්ෂේප කරන ලදි.
මේ සංශෝධනයෙන් සියලු ශ්රේෂ්ඨාධිකරණ විනිසුරුවරුන්ගේ ධුරකාලය වැඩි වන බැවින්, තමන්ගේ නඩුව තමන් ඇසීමක් සිදුවන නිසා, ජනමත විචාරණයකට සංශෝධනය යොමු කරන ලෙස පෙත්සම්කරුවන්ගෙන් ඉදිරිපත් වුණු ඉල්ලීමද ශ්රේෂ්ඨාධිකරණය විසින් ප්රතික්ෂේප විය.
ආණ්ඩුව බලාපොරොත්තු වුණේ, ශ්රේෂ්ඨාධිකරණ තීරණයෙන්, ජනමත විචාරණයකින් තොරව 22 වැනි සංශෝධනය සම්මත කරගැනීම සඳහා අනුමැතිය ලැබේවිය කියාය. දැන් එම තීරණය ලැබී තිබේ. 22 සඳහා ජනමත විචාරණයක් අවශ්ය නොවන බව අධිකරණ ඇමතිවරයා ඇතුළු ආණ්ඩුවේ නායකයන් කිහිප දෙනෙකුම විවිධ අවස්ථාවලදී පවසා තිබිණ. පසුගියදා පැවැති මහජන රැස්වීමකදී ජනාධිපතිවරයාද, 22 වැනි සංශෝධනය පාර්මේන්තුවෙන් සම්මත කරගන්නා බව පැවසුවේය.
22 වැනි ව්යවස්ථා සංශෝධනය දෙවැනි වර කියවීම පිළිබඳ පාර්ලිමේන්තු විවාදය, සැප්තැම්බර් 24 වැනිදා පැවැත්වීමට නියමිතය.
