සෞදි අරාබියේදී මරණ දඬුවමට මුහුණ දී සිටින ශ්රී ලාංකිකයකු වන සිවරාසා අනෝජන් මහතාගේ ජීවිතය බේරා දෙන ලෙස ඉල්ලා ශ්රී ලංකාවේ මාධ්ය සංවිධාන කිහිපයක් සෞදි අරාබි රාජධානියේ නායකත්වයෙන් මානුෂීය ඉල්ලීමක් කර තිබේ.
ශ්රී ලංකා වෘත්තීය මාධ්යවේදීන්ගේ සංගමය, දකුණු ආසියානු කාන්තා මාධ්ය සංවිධානය, නිදහස් මාධ්ය ව්යාපාරය, දෙමළ මාධ්ය සන්ධානය සහ ශ්රී ලංකා මුස්ලිම් මාධ්ය සංසදය එක්ව මෙම ඒකාබද්ධ ඉල්ලීම 2026 සැප්තැම්බර් 22 වැනිදා නිකුත් කර තිබේ.
මාධ්ය සංවිධාන අදාල නිවේදනයේ සඳහන් කර ඇත්තේ සෞදි අරාබියේ අධිකරණ ක්රියාවලියට පූර්ණ ගෞරවය දක්වන අතරම, අනෝජන් මහතාගේ සිද්ධිය ගැඹුරු මානුෂීය පැතිකඩක් සහිත කරුණක් ලෙස සලකන බවය. සිංහල, දෙමළ සහ මුස්ලිම් ප්රජාවන් නියෝජනය කරන මාධ්ය සංවිධාන ලෙස සියලු ආගම්වලට ගරු කිරීම, ආගමික සහජීවනය, වගකීම් සහගත අදහස් ප්රකාශ කිරීම සහ සාමකාමී සහජීවනය වෙනුවෙන් තමන් කැපවී සිටින බවද එම ප්රකාශයේ සඳහන් කර ඇත.
සමාව, කරුණාව, පසුතැවීම සහ දයාව ඉස්ලාම් ආගමේ ගැඹුරින් ගරු කරන වටිනාකම් බව පෙන්වා දෙන මාධ්ය සංවිධාන, එම පසුබිම තුළ අනෝජන් මහතාට සමාව ලබාදී ඔහුගේ ජීවිතය බේරා දෙන ලෙස සෞදි නායකත්වයෙන් ඉල්ලා තිබේ.
මේ අතර ශ්රී ලංකා විදේශ කටයුතු අමාත්යාංශය අනෝජන් මහතාගේ නඩුව පිළිබඳ සමීප අවධානයෙන් පසුවන බවත්, රාජ්ය තාන්ත්රික මාර්ග ඔස්සේ අදාළ සෞදි බලධාරීන් සමඟ සම්බන්ධ වෙමින් ඔහුගේ අවශ්යතා ආරක්ෂා කිරීමට සහ හැකි සෑම සහායක්ම ලබාදීමට පියවර ගනිමින් සිටින බවත් එම මාධ්ය සංවිධාන සඳහන් කර තිබේ.
අනෝජන් මහතාගේ නඩුව සෞදි අරාබියේ ඉතිරි අධිකරණ ක්රියාමාර්ග ඔස්සේ ඉදිරියට යන අතරතුර ඔහුට සමාව ලබාදීම සලකා බලන ලෙසද මාධ්ය සංවිධාන ඉල්ලා ඇති අතර ශ්රී ලංකා රජය ඉහළම මට්ටමින් රාජ්ය තාන්ත්රික මැදිහත්වීම් අඛණ්ඩව සිදුකරමින්, මෙම සිද්ධියට මානුෂීය විසඳුමක් ලබා ගැනීම සඳහා පවතින සියලු නීතිමය සහ මානුෂීය මාර්ග භාවිත කරන ලෙසද ඔවුන් ඉල්ලා තිබේ.
