VIP ගුවන්සේවා, Chartered Flight හෝ විශේෂ ගුවන් යානා භාවිතා කර නැහැ
අග්රාමාත්ය හරිනි අමරසූරියගේ විදේශ නිල සංචාර සඳහා 2024 නොවැම්බර් 18 සිට 2026 මැයි 06 දක්වා කාලය තුළ අග්රාමාත්ය කාර්යාලය රුපියල් 12,280,334.61ක මුදලක් වැය කර ඇති බව තොරතුරු දැනගැනීමේ අයිතිවාසිකම යටතේ ලබාදුන් තොරතුරුවලින් අනාවරණය වේ.
මාධ්යවේදිනි රේඛා නිලුක්ෂි විසින් 2026 මැයි 06 වැනිදා අග්රාමාත්ය කාර්යාලය වෙත ඉදිරිපත් කරන ලද තොරතුරු ඉල්ලීමකට අනුව 2026 ජුනි 18 වැනිදා අදාල තොරතුරු ලබා දී ඇත.
ලේඛනවලට අනුව අග්රාමාත්යවරිය සහ දූත පිරිස ජර්මනිය, ප්රංශය හා නෙදර්ලන්තය, කැනඩාව, චීනය, තායිලන්තය, ඉන්දියාව, ස්විට්සර්ලන්තය සහ පිලිපීනය ඇතුළු රටවල නිල සංචාරවල නිරත වී ඇති අතර අදාල සංචාර අතරින් ඇතැම් සංචාර සඳහා අග්රාමාත්ය කාර්යාලය විසින් වියදම් දරා නොමැති බවද එම තොරතුරුවල සඳහන් වේ.
අග්රාමාත්ය හරිනි අමරසූරිය සහභාගි වූ සංචාර අතරින් වැඩිම වියදමක් දරා ඇත්තේ ස්විට්සර්ලන්ත සංචාරය සඳහා වන අතර ඒ සඳහා අග්රාමාත්ය කාර්යාලය වැය කර ඇති මුදල රුපියල් 5,719,167.04කි. අග්රාමාත්යවරිය 2026 ජනවාරි 19 සිට 23 දක්වා ස්විට්සර්ලන්තයේ පැවති ලෝක ආර්ථික සමුළුවට සහභාගී වීම සඳහා මෙම සංචාරයේ නිරත වී තිබුණු අතර එම සංචාරය සඳහා අග්රාමාත්යවරිය සමඟ නිලධාරීන් කිහිපදෙනෙකුද සහභාගී වී ඇත.
ජර්මනිය, ප්රංශය සහ නෙදර්ලන්තය ආවරණය කරමින් 2025 මාර්තු 26 සිට අප්රේල් 02 දක්වා සිදුකළ සංචාරය සඳහා අග්රාමාත්ය කාර්යාලයෙන් රුපියල් 2,208,308.73ක් වැය කර තිබේ. එම සංචාරයට ජර්මනියේ පැවති 102 වැනි ජාත්යන්තර කම්කරු සංවිධාන සමුළුව ඇතුළු වැඩසටහන් කිහිපයක් සම්බන්ධ වී තිබූ අතර ප්රංශයේ පැවති වැඩසටහන්වලටද අග්රාමාත්යවරිය සහභාගී වී ඇත.
චීනයේ නිල සංචාරය සඳහා රුපියල් 3,582,597.61ක් වැය කර ඇති අතර එම සංචාරය 2025 ජුනි 25 සිට 26 දක්වා සිදුකර තිබේ. අදාළ ලේඛනයේ එම සංචාරයේ අරමුණ ලෙස ආසියානු හා සම්බන්ධතා සම්බන්ධ වැඩසටහනක් සඳහන් කර ඇති අතර, අග්රාමාත්යවරිය සමඟ නිලධාරියෙකු සහභාගී වී තිබේ.
අග්රාමාත්යවරිය 2025 ඔක්තෝබර් 11 සිට 15 දක්වා ඉන්දීය සංචාරය සඳහා රුපියල් 547,087.25ක් වැය කර ඇති අතර එම වසරේ ඔක්තෝබර් 16 සිට 18 දක්වා නැවත ඉන්දියාවේ සංචාරයක නිරත වී තිබේ. එම දෙවැනි ඉන්දීය සංචාරය New Delhi Television Ltd. විසින් සංවිධානය කළ NDTV World Summit 2025 වැඩසටහනට සම්බන්ධ වූවකි.
2025 අප්රේල් 02 සිට 04 දක්වා තායිලන්තයේ පැවති හයවැනි BIMSTEC සමුළුව සඳහාද අග්රාමාත්යවරිය සහභාගී වී තිබේ. එමෙන්ම 2026 මාර්තු 09 සිට 11 දක්වා පිලිපීනයේ සංචාරයකද නිරත වී ඇති අතර පිලිපීන සංචාරය සඳහා අග්රාමාත්ය කාර්යාලයෙන් වැය කර ඇති මුදල රුපියල් 223,173.98කි.
කෙසේ වෙතත් 2025 ජුනි 25 සිට 26 දක්වා සිදුකළ කැනඩා සංචාරය සඳහා අග්රාමාත්ය කාර්යාලය විසින් කිසිදු වියදමක් දරා නොමැති බව ලේඛනයේ පැහැදිලිව සඳහන් කර තිබේ.
අග්රාමාත්ය කාර්යාලයේ වියදම් ලේඛනය අනුව ජර්මනිය, ප්රංශය සහ නෙදර්ලන්ත සංචාරය සඳහා රුපියල් 2,208,308.73ක්ද, චීන සංචාරය සඳහා රුපියල් 3,582,597.61ක්ද, ඉන්දීය සංචාරයක් සඳහා රුපියල් 547,087.25ක්ද, ස්විට්සර්ලන්ත සංචාරය සඳහා රුපියල් 5,719,167.04ක්ද සහ පිලිපීන සංචාරය සඳහා රුපියල් 223,173.98ක්ද වැය කර ඇත. මෙම මුදල් එකතුව රුපියල් 12,280,334.61කි.
ජර්මනිය, ප්රංශය හා තායිලන්ත සංචාරයේ ගුවන් ටිකට් පත් සඳහා 2,183,100ක්ද, චීනය සංචාරයේ ගුවන් ටිකට් පත් සඳහා 3,205,000ක්ද, ස්විස්ටර්ලන්ත සංචාරයේ ගුවන් ටිකට් පත් සඳහා 1,086,900ක්ද වියදම් කර ඇති බව සඳහන් කර ඇති අතර නවාතැන් සඳහා 1,590,933ක්ද හා ප්රවාහන වියදම් සඳහා 2,518,729ක්ද වියදම් කර ඇති බවට තොරතුරු ලබා දී ඇත.
තවද දෛනික දීමනා ලෙස 368,661.03ක මුදලක් සහ මාධ්ය නියෝජිත කණ්ඩායමේ වියදම් ලෙස 449,500ක්ද වෙනත් වියදම් ලෙස 877,510ක්ද වන අතර ඇතැම් සංචාර සඳහා වෙනත් රාජ්ය ආයතන හරහා වියදම් දරා තිබේද යන්න පිළිබඳව තොරතුරු කිසිවක් ලබා දී නොමැත.
අග්රාමාත්යවරිය විසින් සිදු කළ සියලු විදේශ සංචාර සඳහා අමාත්ය මණ්ඩලයේ පූර්ව අනුමැතිය ලබාගෙන ඇති බව දැක්වෙන ජනාධිපති ලේකම් කාර්යාල ලේඛනද තොරතුරු සමඟ ලබාදී තිබේ.
ඒ අනුව කැනඩා සංචාරය සඳහා 2025 ජුනි 23 සිට 29 දක්වාද, චීනය සහ ඉන්දියාව සම්බන්ධ සංචාර සඳහා 2025 ඔක්තෝබර් මාසයේද, ස්විට්සර්ලන්ත සංචාරය සඳහා 2026 ජනවාරි මාසයේද, පිලිපීන සංචාරය සඳහා 2026 මාර්තු මාසයේද මෙසේ පූර්ව අනුමැතිය ලබාදී ඇති බව එම ලේඛනවලින් දැක්වේ.
