පළාත් සභා මැතිවරණය පිළිබඳ පාර්ලිමේන්තු තේරීම් කාරක සභාවේ 10 වැනි රැස්වීම විපක්ෂයේ මන්ත්රීවරුන් සිව්දෙනෙකු විසින් අද (10) වර්ජනය කර තිබේ.
දීර්ඝ කාලයක් තිස්සේ කල් දමා ඇති පළාත් සභා මැතිවරණය පැවැත්වීම සඳහා අවශ්ය බැරෑරුම්භාවය සහ හදිසිභාවය තේරීම් කාරක සභාව විසින් පෙන්නුම් කිරීමට අසමත් වී ඇති බැවින් මෙම තීරණය ගත් බව එම මන්ත්රීවරු සඳහන් කරති.
ඒ අනුව රංජිත් මද්දුම බණ්ඩාර, මනෝ ගනේෂන්, ෂානක්යන් රාසමාණික්කම් සහ නිසාම් කාරියප්පර් යන මන්ත්රීවරුන් මෙලෙස රැස්වීම වර්ජනය කර තිබේ.
මන්ත්රීවරුන් සිව්දෙනා වෙනුවෙන් අදහස් දක්වමින් ෂානක්යන් රාසමාණික්කම් මහතා සඳහන් කර ඇත්තේ තේරීම් කාරක සභාවේ රැස්වීම් 10ක් පවත්වා තිබුණද පළාත් සභා මැතිවරණය පැවැත්වීම සම්බන්ධයෙන් අර්ථවත් ප්රගතියක් ලබා ගැනීමට නොහැකි වී ඇති බවයි. එවැනි ක්රියාවලියකට තවදුරටත් සහාය දිය නොහැකි බවද ඔහු තේරීම් කාරක සභාවට දැනුම් දී තිබේ. පළාත් සභා මැතිවරණය පැවැත්වීම සඳහා ප්රායෝගික සහ නීතිමය විකල්ප දැනටමත් පවතින බවද රාසමාණික්කම් මහතා පෙන්වා දී ඇත.
දැනට පවතින සමානුපාතික නියෝජන ක්රමය යටතේ පළාත් සභා මැතිවරණය පැවැත්විය හැකි ආකාරය පිළිබඳ යෝජනාවක් මැතිවරණ කොමිෂන් සභාව විසින් ඉදිරිපත් කර ඇති අතර එහි කාන්තාවන් සඳහා සියයට 25ක සහතික නියෝජනයක් ලබාදීමේ ක්රමවේදයක්ද ඇතුළත් බව ඔහු සඳහන් කර තිබේ.
රාසමාණික්කම් මහතා විසින් ඉදිරිපත් කරන ලද පෞද්ගලික මන්ත්රී පනත් කෙටුම්පතක්ද මේ වනවිට පාර්ලිමේන්තු න්යාය පත්රයට ඇතුළත් කර ඇති බව සඳහන් වේ. මන්ත්රීවරුන් බහුතරයක් එකඟ වන්නේ නම් එම පනත් කෙටුම්පත ඉදිරියට ගෙන ගොස් මැතිවරණය පැවැත්වීමට අවශ්ය නීතිමය පදනම සකස් කළ හැකි බවද ඔහු පෙන්වා දී ඇත.
තවදුරටත් ක්රියාවලිය දිග්ගැස්සීම වෙනුවට දේශපාලන තීරණයක් ගෙන පළාත් සභා මැතිවරණය පැවැත්වීමට කටයුතු කළ යුතු බව රාසමාණික්කම් මහතා අවධාරණය කර තිබේ. ජාතික ජන බලවේගය සිය 2024 ජනාධිපතිවරණ ප්රතිපත්ති ප්රකාශනයෙන් බලයට පත්ව වසරක් ඇතුළත පළාත් සභා සහ පළාත් පාලන මැතිවරණ පැවැත්වීමට පොරොන්දු වී තිබූ බවද ඔහු සඳහන් කර ඇත.
වසර ගණනාවක් තිස්සේ පළාත් සභා මහජන නියෝජිතයන්ගෙන් තොරව පවතින බැවින්, තම නියෝජිතයන් ප්රජාතන්ත්රවාදීව තෝරා ගැනීමට ජනතාවට ඇති අයිතිය තවදුරටත් අහිමි නොකළ යුතු බවද රාසමාණික්කම් මහතා පවසා ඇති අතර පළාත් සභා මැතිවරණය පැවැත්වීම සඳහා පැහැදිලි කාල රාමුවක් සහිත ක්රියාමාර්ග රජය සහ තේරීම් කාරක සභාව විසින් වහාම ගත යුතු බවද ඔහු අවධාරණය කර ඇත. එසේ නොවන්නේ නම් විපක්ෂ මන්ත්රීවරුන් සිව්දෙනාට “ඉතා බරපතළ තීරණයක්” ගැනීමට සිදුවනු ඇති බවද රාසමාණික්කම් මහතා සඳහන් කර ඇති අතර, එම තීරණය කුමක්දැයි මේ අවස්ථාවේ හෙළි නොකරන බවද පවසා තිබේ.
