පවතින එල්නිනෝ තත්ත්වය හේතුවෙන් ආහාර සහ ජලය සොයා වන අලි ජනාවාස ආසන්නයට පැමිණීමේ අවදානම ඉහළ යා හැකි බව වනජීවී අධ්යක්ෂ ජනරාල් රංජන් මාරසිංහ මහතා අනතුරු අඟවයි.
පවතින කාලගුණික තත්ත්වය වනජීවීන්ට බලපෑම් එල්ල කරමින් ඇති අතර, ඒ හේතුවෙන් වන අලි ජනාවාස වෙත සමීප වීමේ හැකියාව ඉහළ යා හැකි බව ඔහු පවසයි. විශේෂයෙන් රාත්රී කාලයේ ගමන් කිරීමේදී අවධානයෙන් කටයුතු කරන ලෙසත් අලි – මිනිස් ගැටුම් පවතින ප්රදේශවලදී වැඩි අවධානයක් යොමු කරන ලෙසත් වනජීවී අධ්යක්ෂ ජනරාල්වරයා ජනතාවගෙන් ඉල්ලා ඇත.
එල්නිනෝ තත්ත්වයේ බලපෑම් සාගර පරිසර පද්ධති කෙරෙහිද දක්නට ලැබෙන බව පැවසූ මාරසිංහ මහතා එම තත්ත්වය හේතුවෙන් කොරල්පරවල තත්ත්වය සම්බන්ධයෙන්ද අවධානය යොමුව ඇති බව සඳහන් කරයි.තවද පාරිසරික වෙනස්කම් හේතුවෙන් හානියට පත්ව ඇති කොරල්පර සංරක්ෂණය සහ ප්රතිස්ථාපනය සඳහා වැඩසටහනක් දැනටමත් ආරම්භ කර ඇති බවද ඔහු පැවසීය.
පවතින කාලගුණික තත්ත්වය හේතුවෙන් යාල ජාතික වනෝද්යානයේ කලාප කිහිපයක් තාවකාලිකව වසා දැමීම සම්බන්ධයෙන්ද සලකා බලමින් සිටින බව වනජීවී අධ්යක්ෂ ජනරාල්වරයා සඳහන් කළ අතර මේ වසරේ ජනවාරි මාසයේ සිට මේ දක්වා මියගොස් ඇති වන අලි සංඛ්යාව පසුගිය වසරේ එම කාලසීමාවේ වාර්තා වූ සංඛ්යාවට වඩා අඩු බව මේ දක්වා සකස් කර ඇති සංඛ්යාලේඛන අනුව පෙනී යන බවද ඔහු සඳහන් කළේය.
පවතින දේශගුණික තත්ත්වයන් වනජීවීන්ට සහ ඔවුන්ගේ වාසස්ථානවලට එල්ල කරන බලපෑම් අඛණ්ඩව නිරීක්ෂණය කරමින් සතුන්ට සහ ඔවුන්ගේ වාසස්ථානවලට සිදුවිය හැකි තර්ජන අවම කිරීමට අවශ්ය පියවර ගනිමින් සිටින බව වනජීවී දෙපාර්තමේන්තුව පවසයි.
