අල්ලස් හෝ දූෂණ චෝදනා විමර්ශන කොමිෂන් සභාව විසින් අද (04) අත්අඩංගුවට ගත් හිටපු අමාත්‍ය ජොන්ස්ටන් ප්‍රනාන්දු මහතා ඇප මත මුදාහැර තිබේ.
අල්ලස් කොමිසම විසින් සිදුකරන විමර්ශනයකට අදාළව ප්‍රනාන්දු මහතා අද අත්අඩංගුවට ගෙන තිබූ අතර, රජයට රුපියල් මිලියන 7.9ක පමණ පාඩුවක් සිදු කළ බවට එල්ල වී ඇති චෝදනා මත මෙම අත්අඩංගුවට ගැනීම සිදුකර ඇත.
පොල්ගොල්ල මහින්ද රාජපක්ෂ ශ්‍රවණාගාරයට පුටු සැපයීම සඳහා නීත්‍යනුකූලව තෝරාගෙන තිබූ සමාගමක් ඉවත් කර, තමන්ට සම්බන්ධ බවට චෝදනා එල්ල වී ඇති වෙනත් සමාගමකට එම සැපයුම් කොන්ත්‍රාත්තුව ලබාදී ඇති බවට ජොන්ස්ටන් ප්‍රනාන්දු මහතාට චෝදනා එල්ල වී තිබේ.
ඒ හේතුවෙන් රජයට රුපියල් මිලියන 7.9කට ආසන්න මූල්‍ය පාඩුවක් සිදුවූ බවට අල්ලස් කොමිසම සිදුකරන විමර්ශනයේදී අවධානය යොමු කර ඇත. ප්‍රනාන්දු මහතා අද අල්ලස් කොමිසම හමුවේ ප්‍රකාශයක් ලබාදීම සඳහා පැමිණීමෙන් අනතුරුව අත්අඩංගුවට ගෙන තිබිණි.
