ජාතික ජන බලවේගය යටතේ පාර්ලිමේන්තුවට තේරී පත්වූ මන්ත්රීවරුන්ට එරෙහිව දූෂණ විරෝධී පනත යටතේ විමර්ශනයක් සිදුකරන ලෙස ඉල්ලා දිනන දකුණ සහ ෆ්රී ලෝයර්ස් ඇතුලු සංවිධානවලින් සැදුම්ලත් ‘නිදහස් සටන් මධ්යස්තානය’ වෙනුවෙන් දර්ශන තන්ත්රීගේ සහ ලෙෂාන් විදානගමාච්ච් යන මහත්වරුන් අද (02) අල්ලස් හෝ දූෂණ චෝදනා විමර්ශන කොමිෂන් සභාව වෙත පැමිණිල්ලක් ඉදිරිපත් කර තිබේ.
පාර්ලිමේන්තු මන්ත්රීවරුන්ට ඔවුන්ගේ පාර්ලිමේන්තු වරප්රසාද යටතේ ලැබෙන දීමනා ජනතා ප්රයෝජනය සඳහා යොදා ගැනීම වෙනුවට ජනතා විමුක්ති පෙරමුණේ බැංකු ගිණුමකට බැර කිරීම සම්බන්ධයෙන් මෙම පැමිණිල්ල ඉදිරිපත් කර ඇතැයි එම සංවිධානය සඳහන් කරයි.
එම ක්රියාව 2023 අංක 9 දරන දූෂණ විරෝධී පනත යටතේ වරදක් විය හැකි බවට නිදහස් සටන් මධ්යස්ථානය සිය පැමිණිල්ල මගින් චෝදනා කර තිබේ.
මන්ත්රීවරුන්ට පාර්ලිමේන්තුවෙන් හිමිවන දීමනා සහ අනෙකුත් වරප්රසාද ජනතා නියෝජිතයන් ලෙස ඔවුන්ගේ කාර්යභාරය ඉටු කිරීම සඳහා ලබාදෙන ප්රතිලාභ වන අතර එම මුදල් පක්ෂයේ ගිණුමකට බැර කිරීමේ ක්රියාව සම්බන්ධයෙන් විධිමත් විමර්ශනයක් අවශ්ය බව නිදහස් සටන් මධ්යස්ථානය පෙන්වා දී ඇත.
මෙම සිද්ධිය සම්බන්ධයෙන් කඩිනම් විමර්ශනයක් සිදුකරන ලෙස නිදහස් සටන් මධ්යස්ථානය අල්ලස් කොමිසමෙන් ඉල්ලා ඇති අතර ඒ සඳහා එම පැමිණිල්ල තුළ ඉල්ලීම් පහක් ඉදිරිපත් කර තිබේ.
ඒ අනුව ජාතික ජන බලවේගය නියෝජනය කරමින් පාර්ලිමේන්තුවට තේරී පත්ව සිටින මන්ත්රීවරුන් 159 දෙනාම කැඳවා මේ සම්බන්ධයෙන් ප්රකාශ සටහන් කරගැනීම සහ විධිමත් විමර්ශනයක් පැවැත්වීම එම ඉල්ලීම් අතර ප්රධාන වේ.
එමෙන්ම අදාළ මුදල් බැර කර ඇති බවට චෝදනා කෙරෙන ජනතා විමුක්ති පෙරමුණේ බැංකු ගිණුම් පරීක්ෂා කර මන්ත්රීවරුන්ගෙන් ලැබුණු බව කියන මුදල් පිළිබඳ තොරතුරු අනාවරණය කරගන්නා ලෙසද සංවිධානය ඉල්ලා තිබේ.
මෙහිදී මන්ත්රීවරුන්ට ලැබුණු දීමනා, ඒවා ලබාදුන් ආකාරය, එම මුදල් පක්ෂයේ ගිණුම් වෙත මාරු කළේද යන්න සහ එසේ සිදුකර ඇත්නම් ඒ සඳහා අදාළ වූ ක්රමවේදය පිළිබඳව විමර්ශනයක් අවශ්ය බව නිදහස් සටන් මධ්යස්ථානයේ ස්ථාවරය වී තිබේ.
කෙසේ වෙතත් අදාළ චෝදනා සම්බන්ධයෙන් අල්ලස් කොමිසම විසින් විමර්ශනයක් සිදුකර වරදක් සිදුවී ඇත්ද යන්න තහවුරු කර නොමැති අතර පැමිණිල්ලේ සඳහන් චෝදනා මේ වන විට චෝදනා පමණක් වේ.
2023 අංක 9 දරන දූෂණ විරෝධී පනත යටතේ කඩිනම් පරීක්ෂණයක් පවත්වා පැමිණිල්ලේ සඳහන් කරුණු සම්බන්ධයෙන් නීතිමය පියවර ගන්නා ලෙස නිදහස් සටන් මධ්යස්ථානය අල්ලස් හෝ දූෂණ චෝදනා විමර්ශන කොමිෂන් සභාවෙන් වැඩිදුරටත් ඉල්ලා තිබේ.
