පවතින දැඩි වියළි කාලගුණික තත්ත්වය හේතුවෙන් මේ වනවිට දිවයිනේ දිස්ත්රික්ක කිහිපයක ගොවීන් 7,000කට ආසන්න පිරිසකට අයත් අක්කර 8,000ක පමණ වගාබිම්වලට හානි සිදුව ඇති බව සෞඛ්ය අමාත්ය හා කැබිනට් ප්රකාශක වෛද්ය නලින්ද ජයතිස්ස මහතා පැවසීය.
ඒ මහතා මේ බව පැවසූවේ සැප්තැම්බර් 01 වන දින පැවැති කැබිනට් මාධ්ය හමුවේදීය.
වියළි කාලගුණය හේතුවෙන් වගාවන්ට සිදුව ඇති හානිය සම්බන්ධයෙන් රජය මේ වනවිට හඳුනාගත් තොරතුරු අනුව ගොවීන් 7,000කට ආසන්න පිරිසකට අයත් වගාබිම් මෙලෙස හානියට පත්ව ඇති බවත් එම වගා හානි සඳහා කඩිනම් වන්දි ලබාදීමේ වැඩසටහනේ පළමු අදියර ලෙස රුපියල් මිලියන 3,000ක මුදලක් රජය වෙන් කර ඇති බවත් ඔහු පැවසීය.
වී, බඩඉරිඟු, ලොකු ලූනු, අර්තාපල්, සෝයා සහ මිරිස් ඇතුළු වගාවන් සඳහා අදාල වන්දි ලබාදීමට නියමිත බවත් වන්දි ලබාදීමේදී හෙක්ටයාරයකට රුපියල් ලක්ෂයක මුදලක් ලබාදීමට නියමිත අතර එක් ගොවියකු සඳහා වන්දි ගෙවීමේදී උපරිම වශයෙන් අක්කර පහක වගා භූමි ප්රමාණයක් සලකා බලන බවත් අමාත්යවරයා පැවසීය.
මේ වනවිට වගා හානි වැඩිම ප්රමාණයක් වාර්තා වී ඇත්තේ අනුරාධපුර දිස්ත්රික්කයෙන් වන අතර එහි අක්කර 1,923ක පමණ වගාබිම් හානියට පත්ව ඇති බවත් මොනරාගල දිස්ත්රික්කයෙන් අක්කර 1,421ක්, පොළොන්නරුව දිස්ත්රික්කයෙන් අක්කර 1,259ක්, අම්පාර දිස්ත්රික්කයෙන් අක්කර 1,055ක් සහ හම්බන්තොට දිස්ත්රික්කයෙන් අක්කර 783ක පමණ වගා හානි සිදු වී ඇති බව වාර්තා වී ඇති බවත් ඒ මහතා පැවසීය.
