නීතිවිරෝධී ලෙස උපයාගත් මුදල් යොදා ගනිමින් මාතර ප්රදේශයේ අක්කර එකහමාරක ඉඩමක් මිලදී ගත් බවට චෝදනා එල්ල වී ඇති නඩුවට අධිකරණය හමුවේ පෙනී නොසිටීම හේතුවෙන් හිටපු අමාත්ය බැසිල් රාජපක්ෂ මහතා තැන්පත් කර තිබූ ඇප මුදල් රාජසන්තක කිරීමට මාතර මහේස්ත්රාත් අධිකරණය අගෝස්තු 18 නියෝග කර ඇත.
මාතර, එළියකන්ද පාර, බ්රවුන්හිල් ප්රදේශයේ පිහිටි අදාළ දේපළ සම්බන්ධයෙන් පොලිස් මූල්ය අපරාධ විමර්ශන කොට්ඨාසය විසින් පවරා ඇති නඩුව මාතර ප්රධාන මහේස්ත්රාත් චතුර දිසානායක මහතා හමුවේ කැඳවනු ලැබීය.
නඩුවේ තුන්වැනි විත්තිකරු වන බැසිල් රාජපක්ෂ මහතා දීර්ඝ කාලයක සිට අධිකරණය හමුවේ පෙනී සිටීම මඟහැර ඇති බව මූල්ය අපරාධ විමර්ශන කොට්ඨාසය විසින් අධිකරණයට දැනුම් දැනුම් දී තිබුණු අතර අධිකරණය හමුවේ පෙනී නොසිටීමට හේතු දක්වමින් බැසිල් රාජපක්ෂ මහතා විසින් අධිකරණයට පිළිගත හැකි වෛද්ය වාර්තාවක්ද ඉදිරිපත් කර නොමැති බවත් සඳහන් විය.
ඒ අනුව බැසිල් රාජපක්ෂ මහතා වෙනුවෙන් ඇපකරුවන් ලෙස අත්සන් කළ පුද්ගලයන් තිදෙනාට දඩ නියම කිරීමටද මහේස්ත්රාත්වරයා නියෝග කළේය. එම දඩ මුදල් නොගෙවන්නේ නම් ඔවුන් බන්ධනාගාරගත කිරීමටද අධිකරණය නියෝග කර තිබේ.
බැසිල් රාජපක්ෂ මහතාට එරෙහිව මීට පෙර නිකුත් කර තිබූ අත්අඩංගුවට ගැනීමේ වරෙන්තුව 2026 ඔක්තෝබර් 27 වැනිදා දක්වා තවදුරටත් දීර්ඝ කිරීමටද අධිකරණය නියෝග කළේය.
අදාල නඩුව කැඳවූ අවස්ථාවේදී පළමු සහ දෙවැනි විත්තිකරුවන් අධිකරණය හමුවේ පෙනී සිටියහ.
