22 ආණ්ඩුක්රම ව්යවස්ථා සංශෝධනය ඉල්ලා අස්කර ගන්නා ලෙසත්, ව්යවස්ථාදායකයේ මූලික කාර්යය වන්නේ විධායකය පාලනය කිරීම බව මතක තබා ගන්නා ලෙසත්, මෙම සංශෝධනය මගින් අධිකරණය සහ එහි නායකත්වයේ කීර්තිනාමයට හා රටේ නීතියේ ආධිපත්යයට සිදුවන හානිය පිළිබඳව සැලකිලිමත් වන ලෙසත් ලංකා සභාව හෙවත් ඇංග්ලිකානු සභාව ජනාධිපතිවරයාගෙන් හා ඇමති මණ්ඩලයෙන් ඉල්ලා සිටියි.
ජුලි 30 වැනිදා නිකුත් කළ ලංකා සභාවේ කොළඹ රදගුරු දුෂාන්ත රොද්රිගෝ සහ කුරුණෑගල රදගුරු නිශාන්ත ප්රනාන්දුගේ අත්සන්වලින් යුක්ත නිවේදනයක් මගින් මේ ඉල්ලීම කර ඇත.
සභාවේ එම නිවේදනය සම්පූර්ණයෙන් පහත දැක්වෙයි.
විනිශ්චයකාරවරුන්ගේ විශ්රාම යාමේ වයස දීර්ඝ කිරීම සඳහා ආණ්ඩුක්රම ව්යවස්ථා සංශෝධනයක් යෝජනා කිරීමට අමාත්ය මණ්ඩලය ගත් තීරණය පිළිබඳ ලංකා සභාවේ ප්රකාශනය
උපරිමාධිකරණ විනිශ්චයකාරවරුන්ගේ විශ්රාම යාමේ වයස දීර්ඝ කිරීම සඳහා වන යෝජිත ආණ්ඩුක්රම ව්යවස්ථා සංශෝධනය ඉදිරියට ගෙන යාමට අමාත්ය මණ්ඩලය ගත් තීරණය පිළිබඳව ලංකා සභාව (ශ්රී ලංකාවේ ඇංග්ලිකානු සභාව) සිය කනගාටුව සහ අපේක්ෂා භංගත්වය ප්රකාශ කර සිටියි. මෙවැනි සංශෝධනයක් මගින් නීතියේ ආධිපත්යයට මෙන්ම අධිකරණයේ ස්වාධීනත්වය සහ අපක්ෂපාතීත්වය පිළිබඳ මහජන විශ්වාසයට එල්ල වන බරපතළ තර්ජනය පෙන්වා දෙමින් ශ්රී ලංකා නීතිඥ සංගමය, සමස්ත නීති ක්ෂේත්රය සහ සිවිල් සමාජය ඉදිරිපත් කළ ප්රබල තර්ක කෙරෙහි ජනාධිපතිවරයාගේ සහ අමාත්ය මණ්ඩලයේ අවධානය යොමු වනු ඇතැයි ලංකා සභාව අපේක්ෂා කළේය.
ගොඩගැසී ඇති නඩු ඵලදායී ලෙස ඉක්මනින් අවසන් කිරීමේ අවශ්යතාව දක්වමින් මෙම සංශෝධනය සාධාරණීකරණයට රජය ගන්නා උත්සාහය, කිසිදු තාර්කික හෝ මූලධර්මාත්මක පැහැදිලි කිරීමක් නොමැතිව උපරිමාධිකරණවල පුරප්පාඩු රාශියක් තවමත් පවතින බවට වන කරුණ නිසා දැඩි ලෙස පළුදු වී ඇත. එබැවින්, මෙම සංශෝධනයේ සැබෑ අරමුණ සද්භාවයෙන් යුක්ත එකක් නොවන බව නිගමනය කිරීමට අපට සිදු වේ.
විධායක ජනාධිපති ක්රමය අහෝසි කිරීම, වගවීම සහ සියලු දෙනාගේ නියෝජනය තහවුරු කරන මැතිවරණ ක්රමයක් හඳුන්වා දීම, ස්වාධීන ආයතන සහ මූලික අයිතිවාසිකම් ශක්තිමත් කිරීම මෙන්ම රටේ සුළුතර ජනකොටස්වල සාධාරණ ගැටලුවලට විසඳුම් ලබා දීම සඳහා ආණ්ඩුක්රම ව්යවස්ථා සංශෝධනයන්හි ඇති වැදගත්කම ලංකා සභාව විසින් පසුගිය ජනාධිපතිවරණයට සහ පාර්ලිමේන්තු මැතිවරණයට පෙර සිටම වසර ගණනාවක් පුරා පෙන්වා දී ඇත. එසේ කිරීමට පොරොන්දු වී තිබියදීත්, පුළුල් මහජන සංවාදයක් අවශ්ය වන මෙම අතිශය වැදගත් ජාතික ක්රියාවලිය ආරම්භ කිරීමට ජාතික ජන බලවේග රජය කිසිවක් පවසා හෝ කර නොමැත. ඒ වෙනුවට, මෑත කාලීන ආණ්ඩුක්රම ව්යවස්ථා සංශෝධන සංවාදවලදී හෝ පසුගිය ජාතික මැතිවරණ ප්රචාරණ සමයේදී මතු නොවූ කරුණක් වෙනුවෙන් ව්යවස්ථා සංශෝධනයක් කිරීමට තීරණය කිරීම මගින් නීත්යනුකූල වුවමනාවක් හෝ ව්යවස්ථාපිත ඡන්ද පදනමක් නොමැති බව පෙන්නුම් කරයි.
මෙම හදිසි, තාවකාලික සහ පුද්ගල කේන්ද්රීය ආණ්ඩුක්රම ව්යවස්ථා සංශෝධනය සඳහා වූ සැබෑ හේතුව කුමක්දැයි තේරුම් ගැනීමට ආණ්ඩුවේ ප්රධාන අංග තුන වන විධායකය, ව්යවස්ථාදායකය සහ අධිකරණයේ නායකත්වය අවංකව ස්වයං නිරීක්ෂණයක යෙදිය යුතු බව ලංකා සභාව විශ්වාස කරයි. විපක්ෂයේ සිටින විට ස්වාධීන ආයතනවල වැදගත්කම ගැන කතා කර, බලයට පත් වූ පසු විධායකයේ පහසුව සහ පෞද්ගලික වාසිය තහවුරු කරන ප්රතිපත්ති ක්රියාත්මක කරන දේශපාලනඥයන් සහ නායකයන් පිළිබඳව මහජනතාවට දැන් කලකිරී ඇත. මෙරට තුළ මෙම අවස්ථාපිත දේශපාලනය කොතරම් දුරට පැතිර ඇත්ද යත්, රටේ දේශපාලන සංස්කෘතිය තුළ ඉතා අහිතකර සැක සහිත බවක් නිර්මාණය වී තිබේ.
යෝජිත ආණ්ඩුක්රම ව්යවස්ථා සංශෝධනය ඉල්ලා අස්කර ගන්නා ලෙස ලංකා සභාව ජනාධිපතිවරයාගෙන් සහ අමාත්ය මණ්ඩලයෙන් ඉල්ලා සිටින අතර, ව්යවස්ථාදායකයේ මූලික කාර්යය වන්නේ විධායකය පාලනය කිරීම බව මතක තබා ගන්නා ලෙසත්, අධිකරණය සහ එහි නායකත්වය මෙම සංශෝධනය මගින් තම කීර්ති නාමයට සහ රටේ නීතියේ ආධිපත්යයට සිදුවන හානිය පිළිබඳව සැලකිලිමත් වන ලෙසත් ඉල්ලා සිටියි.
