මීගමුව බන්ධනාගාරයේ ඇති වූ ගැටුමෙන් මියගිය පුද්ගලයින් 28 දෙනාගෙන් 17 දෙනෙකුගේ මරණයට හේතුව වෙඩි වැදීම වන අතර අනෙක් 11 දෙනා මියගොස් ඇත්තේ මොට ආයුධවලින් පහර දීම හේතුවෙන් බව පශ්චාත් මරණ පරීක්ෂණවලින් තහවුරු වී ඇතැයි මීගමුව ප්රධාන මහේස්ත්රාත් ශිලනි පෙරේරා මහත්මිය අධිකරණයේදී ප්රකාශ කර ඇත.
මීගමුව අධිකරණ වෛද්ය නිලධාරීවරයා විසින් අධිකරණය වෙත ඉදිරිපත් කර තිබුණු පශ්චාත් මරණ පරීක්ෂණ වාර්තා 28 සලකා බැලීමෙන් අනතුරුව මහේස්ත්රාත්වරිය මෙම කරුණු අනාවරණය කළේ මීගමුව බන්ධනාගාර ගැටුමට අදාළ නඩුව බ්රහස්පතින්දා ජුලි 23 වන දින මීගමුව ප්රධාන මහේස්ත්රාත් අධිකරණය හමුවේ යළි කැඳවූ අවස්ථාවේදීය.
පශ්චාත් මරණ පරීක්ෂණවල ප්රතිඵල සලකා බැලූ මහේස්ත්රාත්වරිය සඳහන් කර ඇත්තේ මෙම සිද්ධිය තුළ අපරාධයක් සිදුව ඇති බවට මූලික කරුණු අනාවරණය වන බවය. එමෙන්ම මියගිය අය නිලධාරීන්ද රැඳවියන්ද යන්නෙන් අධිකරණය කිසිදු වෙනසක් නොකරන බවත් සියලු දෙනාගේ ජීවිත නීතිය ඉදිරියේ එක හා සමාන වටිනාකමක් ඇති බවත් ඇය අවධාරණය කර ඇත.
ඒ අනුව සිද්ධිය සම්බන්ධයෙන් සම්පූර්ණ විමර්ශනයක් සිදුකර වාර්තාවක් අධිකරණයට ඉදිරිපත් කරන ලෙස මහේස්ත්රාත්වරිය අපරාධ පරීක්ෂණ දෙපාර්තමේන්තුවට නියෝග කර ඇත.
නඩුව කැඳවූ අවස්ථාවේදී පැමිණිලි පාර්ශ්වය වෙනුවෙන් අපරාධ පරීක්ෂණ දෙපාර්තමේන්තුවේ නිලධාරීන් පෙනී සිටි අතර මියගිය සහ තුවාල ලැබූ රැඳවියන්ගේ අයිතිවාසිකම් වෙනුවෙන් ජ්යෙෂ්ඨ නීතිඥවරුන් වන අරවින්ද හබක්කල සහ සේනක පෙරේරා ඇතුළු නීතිඥ මණ්ඩලයක් අධිකරණයේ පෙනී සිටියහ.
නීතිඥවරුන් අධිකරණයට දන්වා සිටියේ පශ්චාත් මරණ පරීක්ෂණ අනුව 17 දෙනෙකු වෙඩි වැදී ඇති අතර 11 දෙනෙකු මොට ආයුධ ප්රහාරවලින්ත් මියගොස් ඇති බවත් බන්ධනාගාරය තුළ බරපතළ අපරාධයක් සිදුව ඇති බව නීතිමය වශයෙන් පෙනී යන බවය. එමෙන්ම වෙඩි තැබීමට නියෝග ලබාදුන් පුද්ගලයින් ඇතුළු වගකිවයුත්තන් හඳුනාගෙන ඉදිරියේදී සැකකරුවන් ලෙස නම් කිරීමට සිදුවනු ඇති බවද ඔවුන් අවධාරණය කළහ.
මෙහිදී බන්ධනාගාර ආඥා පනතේ 54 වැනි වගන්තිය සම්බන්ධයෙන්ද කරුණු දැක්වූ නීතිඥවරුන් සඳහන් කළේ එම වගන්තිය ප්රායෝගිකව ක්රියාත්මක කිරීමට අපහසු බැවින් බන්ධනාගාරවල දැඩි තදබදයක් ඇති වී ඇති බවත් එවැනි පීඩනයන් මෙවැනි ඛේදජනක සිදුවීම්වලට හේතු විය හැකි බවත්ය.
මේ අතර විමර්ශනවල ප්රගතිය පිළිබඳ වැඩිදුර වාර්තාවක් ඉදිරිපත් කළ අපරාධ පරීක්ෂණ දෙපාර්තමේන්තුවේ වාණිජ අපරාධ විමර්ශන අංශය අධිකරණයට දැනුම් දී ඇත්තේ සිද්ධිය සම්බන්ධයෙන් මේ වන විට පුද්ගලයින් 969 දෙනෙකුගෙන් ප්රකාශ සටහන් කරගෙන ඇති බවත් එම සංඛ්යාවට බන්ධනාගාර නිලධාරීන් 200 දෙනෙකු, රැඳවියන් 563 දෙනෙකු, පොලිස් විශේෂ කාර්ය බලකායේ නිලධාරීන් 130 දෙනෙකු, පොලිස් නිලධාරීන් 11 දෙනෙකු සහ සිවිල් පුද්ගලයින් 65 දෙනෙකු ඇතුළත් බව බවය.
තවද විමර්ශන අතරතුර සැකකරුවන් 40 දෙනෙකු භාවිත කළ අන්වර්ථ නාම (aliases) හඳුනාගෙන ඇති බවත් ඉදිරි නඩු දිනයකදී නීතිපති දෙපාර්තමේන්තුව වෙනුවෙන් නීතිපතිවරයා අධිකරණය හමුවේ කරුණු දැක්වීමට අපේක්ෂා කරන බවත් අපරාධ පරීක්ෂණ දෙපාර්තමේන්තුවේ නිලධාරීන් අධිකරණයට කරුණු දක්වමින් පවසා ඇත.
තවද නඩු භාණ්ඩ ලෙස ඉදිරිපත් කළ ගිනිඅවි, ජීව උණ්ඩ, හිස් කොපු, පොලු, මුගුරු, ගල්, කොන්ක්රීට් කැබලි සහ තියුණු ආයුධ රජයේ රස පරීක්ෂකවරයා වෙත යොමු කර වාර්තාවක් කැඳවන ලෙස ද මහේස්ත්රාත්වරිය නියෝග කර ඇති අතර විමර්ශනවල ප්රගතිය පිළිබඳ වැඩිදුර වාර්තාවක් මීළඟ නඩු දිනයේදී අධිකරණයට ඉදිරිපත් කරන ලෙසද අපරාධ පරීක්ෂණ දෙපාර්තමේන්තුවට නියෝග කර ඇත.
