ජූලි මාසයෙන් පසු ගුරු විද්යාපීඨ 20ම වැහෙනවා
මැතිවරණ සමයේ මහජනතාව සහ දේශපාලනඥයන් ගහට පොත්ත මෙන් එකට බඳිනා වේදිකාව විපක්ෂ දේශපාලනයයි. එකල්හි ජනතාවගේ සටන් පාඨ පාර්ලිමේන්තුවට මතු නොව ලෝකයටම ගෙනයන්නේ විපක්ෂයේ හඬිනි. ආණ්ඩුව සමග ගැටී තිත්තවී සිටිනා මිනිසුන් තුළ විපක්ෂ දේශපාලනය ඇතිකරන්නේ සුබදායක බලාපොරොත්තුවකි. ඊළඟ වතාවේ විපක්ෂය ජවසම්පන්න කර බලයට ගෙනඑන්නේ එකී බලාපොරොත්තුවය. ඒ බලාපොරොත්තුව අන් කවරදාටත් වඩා හොඳින් දැකගත හැකි වූයේ පසුගිය මහා මැතිවරණයේදීය. වල් පැල ගලවා මල් පැලවලින් පාර්ලිමේන්තුව පුරවන්නට ජාතික ජනබලවේගය කළ ඉල්ලීමට ජනතාවගෙන් ඉහළ අනුකූලතාවක් ලැබෙන්නට හේතුව ඒකය. අලුත් ආණ්ඩුවකින් විසඳා ගන්නට සියලු ලාංකිකයන්ට අනේකවිධ ගැටලු තිබුණි. ශ්රී ලංකා අධ්යාපනඥසේවා කථිකාචාර්යවරුන්ගේ වෘත්තීය සමිතියද පසුවූයේ දීර්ඝ කාලයක් පැවති තම වෘත්තීය ගැටලු අලුත් ආණ්ඩුවෙන් විසඳා ගැනීමේ අරමුණිනි.
එහෙත් එම සංගමයේ ලේකම්, කථිකාචාර්ය එස්.එම්.පී. බණ්ඩාර පවසනුයේ තම සාමාජිකයන් අලුත් ආණ්ඩුව විසින්ද කබලෙන් ළිපට ඇද දමා ඇති බවකි.
ගුරු අධ්යාපනඥ සේවාව එස්එල් 1 වැටුප් කාණ්ඩයේ විධායක ශ්රේණියේ රැකියාවකි. මෙම වැටුප් කාණ්ඩයට හිමිකම් කියනා ගුරු අධ්යාපනඥයන් සේවය කරන්නේ විද්යාපීඨ කතිකාචාර්යවරුන් ලෙසය. ඔවුහු රට පුරා විහිදී ඇති ජාතික අධ්යාපන විද්යාපීඨ 20ක, ගුරු විදුහල් 8ක සහ ගුරු සංවර්ධන මධ්යස්ථාන 112ක සේවය කරති. ඔවුනගේ ප්රධාන අරමුණ විධිමත් පදනමින් වෘත්තීය නිපුණතා සහිත ගුරුවරයෙකු බිහිකිරිමය. මිලියන හතර ඉක්මවනා සිසු දරුවන්ට ඉහළ ගුණාත්මක බවකින් යුතු අධ්යාපනයක් සහතික කිරීම එහි අවසාන අරමුණ වෙයි. ජාතික ගුරු විද්යාපීඨ තුළ සේවය කරනා කථිකාචාර්යවරු පූර්ව සේවා ගුරු අධ්යාපනයෙන් 70% ආවරණය කරති. විද්යාපීඨයන්ගෙන් පිටවූ ඩිප්ලෝමාධාරී ගුරුවරුන්ට සේවාස්ථ පුහුණුව ලබදෙමින් අඛණ්ඩ ගුරු සංවර්ධනය උදෙසා මෙම පිරිස කරනුයේ විශාල මෙහෙයකි. මේ සියල්ල ඇත්තේ තිරයෙන් පිටුපසය. එහෙයින් බොහෝ දෙනෙකුට ගුරු අධ්යාපනඥයන් සහ ඔවුන් ඉටුකරනා මෙහෙය ගැන අවබෝධයක් නැත.
මෙකී අනවබෝධය පුරවැසියන් තුළ පමණක් නොව රට කරවන ආණ්ඩු තුළද ඇති බව පෙනෙන්නට තිබේ. ඒ හේතුවෙන් ගුරු අධ්යාපනඥ සේවය මෙන්ම පූර්ව සේවා ගුරු පුහුණුවද බරපතළ අර්බුදයකට ලක්වෙමින් තිබේ. ඒ පිළිබඳව ශ්රී ලංකා අධ්යාපනඥ සේවා කථිකාචාර්යවරුන්ගේ වෘත්තීය සංගමයේ ලේකම් බණ්ඩාර මෙසේ පවසන්නේය.
“ගුරු විද්යාපීඨ පිහිටුවන්නේ 1985. එවකට අධ්යාපන ඇමතිව සිටි රනිල් වික්රමසිංහ විසින් විෂය මාලා සංවර්ධනය උදෙසා ජාතික අධ්යාපන ආයතය පිහිටුවීමට සමගාමීව ගුරු විද්යාපීඨ ස්ථාපිත කරනවා. වෘත්තීය නිපුණතාවයෙන් යුතු ගුරුවරු බිහිකිරීමේ අරමුණින් 1985 අංක 30 දරන ජාතික අධ්යාපන ආයතන සහ 1996 ජාතික විද්යායතන පනතින් තමයි මේ ගුරු විද්යාපීඨ පිහිටුවන්නේ. ඒ පනතේම කියනවා මෙම විද්යා පීඨ ඉතා ඉක්මණින් උපාධි ප්රදානය කරනා ආයතන තත්ත්වයට පත්කළ යුතු බව. ඒත් පනත ක්රියාත්මක වෙන්න අරගෙන දැන් අවුරුදු 41ක් වෙනවා, ඒත් ගුරු විද්යාපීඨ උපාධි ප්රදානය කළහැකි ආයතන මට්ටමට පත්කරලා නෑ. පැවති ආණ්ඩු වගේම මේ ආණ්ඩුවටත් එහෙම කරන්න උවමනාවක් නෑ.”
පෙර පැවති ආණ්ඩු මෙන්ම මේ ආණ්ඩුවේද අරමුණ 2029 වන විට සියලු ගුරුවරුන් උපාධීධාරීන් කිරීමය. එය අගය කළ යුතු ඉලක්කයකි. ඒ වෙත යාමට ඇති පහසුම මග ගුරු විද්යාපීඨයන්හි ලබාදෙන ඩිප්ලෝමාව උපාධියක් බවට පත්කිරීමය. එය විද්යාපීඨ ස්ථාපිත කළ පනතේ මූලික අපේක්ෂාවකි. එහෙත් මේ ආණ්ඩුව උත්සාහ ගනිමින් සිටින්නේ ඩිප්ලෝමාව උපාධියක් කරන්නට නොව එය තවදුරටත් අකුලන්නටය. සැබැවින්ම මේ ආණ්ඩුව බලයට පත් වූ සැණින් කළේ ගුරුවරයාගේ අඛණ්ඩ සංවර්ධනය සඳහා වූ වැදගත් ක්රියාමාර්ගයන් අවහිර කිරීමය.
අඛණ්ඩ පුහුණුව ගුරු වෘත්තියේ අත්යවශ්ය අංගයකි. ඒ සඳහා ගුරු සේවා ව්යවස්ථාවෙන් නියම කර තිබූ මොඩියුල් 21කින් යුතු සේවාස්ථ පුහුණු ක්රමවේදයක් විය. ඒවා හැදෑරීම සිදුවූයේ ගුරු සංවර්ධන මධ්යස්ථානවලය. බලයට පත් සැණින් මේ ආණ්ඩුව කළේ එකී මොඩියුල් 21 ක්රමය මොඩියුල් සංඛ්යාව 10 දක්වා අඩු කිරීමය. එමගින් සේවාස්ථ ගුරු පුහුණුවේ අධ්යයන සම්භාර ගණන හරි අඩකින් කප්පාදු කර එය බාල කර ඇත. එයින් නොනැවතුණ ආණ්ඩුව එම පුහුණුව ගුරු සංවර්ධන මධ්යස්ථානවලින් ඉවත්කර, ඊට අදාළ ලේඛන සිය වෙබ් අඩවියට උඩුගත කර දෑත් පිසදාගෙන ඇත. ඒ අනුව මෙතුවක් ගුරු සංවර්ධන මධ්යස්ථානවල පුහුණුවක් ලෙස පැවති පාඨමාලාව කැමති කෙනෙකුට වෙබ් එක බලා ඉගෙනගන්නා තැනට පසුබස්වා ඇත්තේ එහි අධ්යයන සම්භාර ගණනද අඩකින් කප්පාදු කරමිනි. මේ කරුණ හේතුවෙන් සිදුවන්නේ විද්යාපීඨ ගුරුවරයාගේ අඛණ්ඩ සංවර්ධනයට බාධා වීමය. එපමණක්ද නොව මේ ඔස්සේ ගුරුවරුන්ගේ උසස්වීම් පටිපාටියද අර්බුදයකට තල්ලු වෙමින් පවතින බව ශ්රී ලංකා අධ්යාපනඥ සේවා කථිකාචාර්යවරුන්ගේ වෘත්තීය සංගමයේ ලේකම් බණ්ඩාර පවසයි. මෙම මොඩියුල් 21 ක්රමය සකස් කර තිබුණේ ගුරුවරුන්ගේ ශ්රේණි උසස්වීම් අනුවය. එය ගුරු සේවා ව්යවස්ථාවටද අනුකූලය. එහි අඩුපාඩු නිවැරදි කරනු හෝ සුදුසු විකල්පයක් හඳුන්වා නොදී සමස්ත වැඩපිළිවෙළම අවුල් කරන්නට ආණ්ඩුව කටයුතු කර ඇත. මේ නිසා ගුරුවරුන් ලක්ෂයකට පමණ සිය උසස්වීම් අහිමිව ඇත.
ගුරු විද්යාපීඨයන්ට අදාල ගැටලු ඇත්තේ ඒවායේ කථිකාචාර්යවරුනට පමණක් නොවේ. ගුරු සිසුනටද බොහෝ ගැටලු ඇත. විද්යාපීඨයන්ගෙන් නික්මෙන සිසුනට ජාතික අධ්යාපන ආයතනය උපාධි දෙන ක්රමයක් වේ. ඒ අනුව විද්යාපීඨ අධ්යාපනය සාර්ථකව නිමකරනා ගුරුවරයෙකුට වසර දෙකක් තුළ ජාතික අධ්යාපන ආයතනයෙන් අධ්යාපනවේදී උපාධිය ලබාගත හැක්කේය. එහිදී සාමාන්ය වශයෙන් අවුරුදු තුනක් හෝ හතරක් ගතවන උපාධිය දෑවසරකින් ලබාගැනීමට හැක. නමුත් ඒ සඳහා රුපියල් ලක්ෂයකට ආසන්න මුදලක් ගෙවීමට සිදු වෙයි. මෑතක සිට මේ අධ්යාපනවේදී උපාධිය ලබා දීම සඳහා පෞද්ගලික විශ්වවිද්යාල කිහිපයක්ද ඉදිරිපත්වී ඇත. එහෙත් ඔවුන් ඒ සඳහා අයකරනා මුදල රුපියල් ලක්ෂ දෙකකට ආසන්නය. අරුමය වන්නේ මේ පෞද්ගලික විශ්වවිද්යාල හිමිකරුවන් සහ ඒවායේ පාලන අධිකාරියේ බහුතරයක් සමන්විත වන්නේ ජාතික අධ්යාපන ආයතනයෙන් සහ රාජ්ය විශ්වවිද්යාලවලින් විශ්රාම ගිය පුද්ගලයන්ගෙන් වීමය. මෙම පිරිසේ ඉලක්කය වාර්ෂිකව අධ්යාපන විද්යාපීඨවලින් නික්මෙන 8000කට ආසන්න ශිෂ්ය ගුරුවරුන් ය. රජය ක්රමානුකූලව අධ්යාපන විද්යාපීඨ දියාරුකරමින් සිටින්නේ මෙම පිරිස පෞද්ගලික විශ්වවිද්යාලවලට ඩැහැගැනීමට ඉඩදීම සඳහාදැයි සාධාරණ සැකයක් ඇති වේ.
මීට ඇති හොඳම විසඳුම 1985 අංක 30 දරන පනතේ කියවෙන පරිදි විද්යාපීඨවලින් ලබාදෙන ඩිප්ලෝමාව කඩිනමින් අධ්යාපනවේදී උපාධි තත්ත්වයට නගා සිටුවීමය. එමගින් ගුරුවරුන්ට විශාල මුදලක් සහ කාලයක් ඉතිරිකරගෙන ප්රමිතිගත උපාධියක හිමිකාරීත්ත්වය ලබාගත හැක. එහි අවසාන ප්රතිඵලය වාසිදායක වන්නේ සමස්ත සිසු පරපුරටය.
අවිධිමත්ව කරනා වැටුප් සංශෝධන හේතුවෙන් බොහෝ වෘත්තීන්ට අදාළව වැටුප් විෂමතා බිහිවී ඇත්තේය. ගුරු අධ්යාපනඥයන්ට අදාළවද එම තත්ත්වය එසේමය. අධ්යාපනඥ සේවා කථිකාචාර්යවරුන්ගේ වෘත්තීය සංගමයේ ලේකම් බණ්ඩාර පවසනුයේ ලංකාවේ බරපතළම වැටුප් විෂමතාව ඇත්තේ තම වෘත්තියට අදාළව බවයි.
“අපිත් වෘත්තීය ජීවිතය අරම්භකළේ ගුරුවරු විදියට. එදා අපිත් එක්ක එකට සේවයට එක්වූ ගුරුවරයෙකුගේ අද මූලික වැටුප රුපියල් 120,000ක් විතර වෙනවා. ඒත් පශ්චාත් උපාධි දෙකක්, අධ්යාපනපති සහ දර්ශනපති උපාධි සහිත ගුරුවිද්යාපීඨ කථිකාචාර්යවරයෙකුගේ වැටුප ඊට වඩා රුපියල් 30,000ක් විතර අඩුයි. මේ විෂමතාව ඇතිවෙන්නේ 2022 ගුරු විදුහල්පති වැටුප් වැඩිකිරීමත් එක්කයි.
ගුරුවිද්යා පීඨවල උගන්වන ඔක්කොම මාස්ටර්ස් තියෙන අය. ඒත් ඒ අයගේ පඩිය පාසැල් ගුරුවරයෙකුගේ පඩියට වඩා අඩුයි. ඒ නිසා අපි ආපහු ගුරු සේවයට යන්න ඉල්ලුම් කළා. රාජ්ය සේවා කොමිසමෙන් ආපහු යන්න දෙන්නේත් නෑ. පසුගිය ආණ්ඩු වගේම මේ ආණ්ඩුත් පිළිගන්නවා අපිට වෙලා තියෙන්නේ අසාධාරණයක් කියලා. ඒත් ඒක දැන්ම විසඳන්න බැරිලු. මේ වැටුප් ප්රශ්නයට මාස හැට දෙකක් වෙනවා. ඒ කියන්නේ මාස හැට දෙකක් තිස්සේ ආණ්ඩු අපේ වැටුපෙන් 20000ත් 30000.් අතර ගානක් මංකොල්ල කනවා. උසස්වීමකදී ලැබෙනා වැටුප් තලය ආයතන සංග්රහයේ පැහැදිලිවම දක්වා තිබෙනවා. ඒත් ඒක ආණ්ඩුව උල්ලංඝනය කරනවා.” ඔහු පවසන්නේය.
ගුරු අධ්යාපනය සම්බන්ධයෙන් ආණ්ඩුවේ ඇති උදාසීන ආකල්ප හඳුනා ගැනීමට තවත් හොඳ උදාහරණයක් ලෙස කුලියාපිටියේ පිහිටුවා ඇති නව තාක්ෂණ විද්යාපීඨය දක්විය හැක්කේය. එම විද්යාපීඨය කොරියානු රජයේ පරිත්යාගයකි. එහි අරමුණ තාක්ෂණ විෂය සඳහා උපාධිය සහිත ගුරුවරුන් බිහිකිරීමය. එහි සමාරම්භක කණ්ඩායම 2025 වසරේ බඳවා ගන්නා ලදි. එම කණ්ඩායම දැනටත් එහි ඉගෙනුම ලබනා මුත් 2026 සඳහා දෙවන කණ්ඩායම තවමත් බඳවාගෙන නැත. කොරියනු රජයේ බලපෑම මත උපාධි ප්රදාන ආයතනයක් ලෙස කුලියාපිටිය තාක්ෂණ විද්යාපීඨය ආරම්භ කළද එය පවත්වාගෙන යාමට වත්මන් රජයට ඕනෑකමක් නැති බව පැහැදිලිය. 2026 වසරේ මාස තුනක් ගෙවී ගියද තවමත් නව කණ්ඩායම බඳවාගැනීම සඳහා ගැසට් නිවේදනය පවා නිකුත් කර නැතිවීම ඊට උදාහරණයකි. එපමණක් නොව වර්තමානයේ එහි උපාධිය සඳහා ඉගෙන ගන්නා කණ්ඩායමට අධ්යාපනය ලබාදෙන කථිකාචාර්යවරුනට කිසිදු විශේෂ දීමනාවක් හෝ පහසුකමක්ද ආණ්ඩුවෙන් ලබාදී නැත. කුලියාපිටිය තාක්ෂණ පීඨයේ පමණක් නොව අනෙක් ගුරු විද්යාපීඨ තුළද මේ වන විට ඉගෙනුම ලබන්නේ එක කණ්ඩායමක් වීම ළඟ ළඟ එන විපතකට උදාහරණයකි.
“ගුරු ශිෂ්යයෙක් විද්යාපීඨය තුළ වසර දෙකක් නේවාසිකවත්, වසරක් පාසැලක් තුළ සීමාවාසික පුහුණුවකටත් යටත් විය යුතුයි. ඒ නිසා සෑම විටම විද්යාපීඨ තුළ කණ්ඩායම් දෙකක් ඉගෙනුම ලැබුවා. දැන් ඉන්නේ එක කණ්ඩායමයි. 2023 -2024 උසස් පෙළ ප්රතිඵල මත බඳවාගත යුතු කණ්ඩායම තවමත් බඳවාගෙන නෑ. මේ ඉන්න කණ්ඩායම ජූලි මාසයේ සීමාවාසික පුහුණුව සඳහා පිටවූ පසු විද්යාපීඨවල සිසුන් නෑ.” ගුරු අධ්යාපනඥ සංගමයේ ලේකම්වරයා පවසන්නේය.
වර්තමානයේ ගුරු විද්යාපීඨ තුළ ලබාදෙන්නේ ශික්ෂණ විද්යා ඩිප්ලෝමාවය. එය අධ්යයන සම්භාර (ක්රෙඩිට්) 90ක පාඨමාලාවකි. එකී ඩිප්ලෝමාව අධ්යාපනවේදී උපාධියක් බවට පත්කරනු වස් අධ්යයන සම්භාර 125 දක්වා වර්ධනය කර විෂය මාලාව යාවත්කාලීන කිරීමට ගුරු අධ්යාපනඥයන් කටයුතු කර ඇත. එසේ තිබියදී වත්මන් ආණ්ඩුව ශික්ෂණ ඩිප්ලෝමාව අධ්යයන සම්භාර 60 ක් දක්වා තුනෙන් එකකින් කප්පාදු කරන්නට කටයුතු කරමින් සිටිනා බව ඔහු වැඩිදුරටත් පවසයි.
ගුරු විද්යාපීඨ අධ්යාපනය මෙතරම් බරපතළ කප්පාදුවකට ලක්කර ඇතත් අධ්යාපන නියෝජ්ය අමාත්ය මධුර සෙනවිරත්න විද්යුත් මාධ්ය නාළිකාවකට පසුගියදා පවසා තිබුණේ විද්යාපීඨ සිසුනට උපාධිය ලබාදෙන බවය. ඔහු එසේ පැවසුවද 2023 -2024 වසරවලට අදාළ තවමත් බඳවාගෙන නැති කණ්ඩායම බඳවා ගැනීම සඳහා පළකළ ගැසට් නිවේදනයේ සඳහන්ව ඇත්තේ “ශික්ෂණ විද්යා ඩිප්ලෝමා පාඨමාලාව” සඳහා බඳවා ගැනීම යනුවෙනි. නියෝජ්ය ඇමතිවරයාගේ කථාවට සමාජ මාධ්යයන්හි තටු ලැබුණද අධ්යාපන ඇමතිනිය ගුරු අධ්යාපනඥයන් හමුවූ අවස්ථාවක පවසා ඇත්තේ 2023 – 2024 කණ්ඩායමට ලබාදෙන්නේ අධ්යයන සම්භාර 60 කින් යුතු ඩිප්ලෝමාවම බවයි. ඒ අනුව අධ්යයන සම්භාර 90ක්ව පැවති ඩිප්ලෝමාව 60 දක්වා අඩුකර ලබාදෙන උපාධිය කුමක්දැයි නියෝජ්ය ඇමතිවරයා පැහැදිලි කළ යුතුය. උපධිය කෙසේ වෙතත් මේ වසරේ ජූලි මාසයට පෙර නව කණ්ඩායම බඳවා නොගත්තොත් වෙන්නේ විද්යාපීඨ සිසුන් නොමැතිව ඉබේම වැසීයාමය.
අරුණ ලක්ෂ්මන් ප්රනාන්දු
