මාර්තු 09 දින සවස 3 සිට පැය 24ක කාලයක් සඳහා ලංකා විදුලිබල මණ්ඩලයේ සමස්ත සේවකයින් සියලු සේවාවලින් ඉවත් වීමට තීරණය කර ඇති බව විදුලිබල මණ්ඩලයේ නිදහස් සේවක සංගමය පැවසීය.
විදුලිබල මණ්ඩලයේ වෘත්තීය සමිති 25ක් එක්ව මෙම වෘත්තීය ක්රියාමාර්ගය ගැනීමට තීරණය කර ඇති අතර, මෙම තීරණය ගෙන ඇත්තේ විදුලිබල මණ්ඩලය අහෝසි කරමින් ක්රියාත්මක කළ ප්රතිව්යුහගතකරණය සහ සේවකයින් සම්බන්ධ සාමුහික ගිවිසුම් පිළිබඳ ඇති ගැටලු හේතුවෙනි.
ලංකා විදුලිබල මණ්ඩලයේ නිදහස් සේවක සංගමයේ ප්රධාන ලේකම් ප්රභාත් ප්රියන්ත මහතා මාධ්ය වෙත අදහස් දක්වමින් සඳහන් කළේ, විදුලිබල මණ්ඩලයේ “මළ ගම” සිදුවන මේ මොහොතේ සේවකයින්ගේ ගැටලු පිළිබඳ රජය කිසිදු සාධනීය පිළිතුරක් ලබාදී නොමැති බවයි. ඔහු කියා සිටියේ සේවකයින්ගේ සාමුහික ගිවිසුම පිළිබඳව නිසි අධ්යයනයක් කර සාකච්ඡා කිරීමට රජය ඉදිරිපත් වන තෙක් සේවයට නොපැමිණෙන බවයි.
කෙසේ වෙතත්, විදුලිබල සැපයුම සම්පූර්ණයෙන් බිඳ වැටෙන තත්ත්වයක් ඇති නොකරන බවද සේවක සංගම් පවසයි. බලාගාර සහ ප්රධාන මෙහෙයුම් කටයුතු පවත්වාගෙන යාමට තීරණය කර ඇති අතර, නඩත්තු කටයුතු සහ බිඳවැටීම් සම්බන්ධ සේවාවන් තාවකාලිකව නතර කරන බවද ඔවුන් පෙන්වා දෙයි. එමෙන්ම කොළඹ ජාතික රෝහල, මහනුවර ජාතික රෝහල, කරාපිටිය ශික්ෂණ රෝහල සහ යුද හමුදා මුලස්ථානය වැනි අත්යවශ්ය ස්ථානවලට බාධාවකින් තොරව විදුලිය සැපයීමට කටයුතු කරන බවද ප්රකාශ කර ඇත.
ලංකා විදුලිබල මණ්ඩලයේ ජාතික සේවක සංගමයේ ලේකම් අජිත් දේවප්රිය මහතා පවසන්නේ, මෙම වෘත්තීය ක්රියාමාර්ගය ආණ්ඩුව දණගැස්වීමක් නොවන බවයි. ඔහු සඳහන් කළේ විදුලිබල මණ්ඩලය ප්රතිව්යුහගත කිරීම සම්බන්ධයෙන් සම්පූර්ණයෙන් විරුද්ධ නොවූවත්, එම ක්රියාවලිය සේවකයින්ට අසාධාරණ වන ආකාරයකින් සිදුකරන්නේ නම් ඒ සඳහා එකඟ නොවන බවයි.
සමාගම් 6ක්
මෙම වෘත්තීය ක්රියාමාර්ගය ආරම්භ වන දිනයම ලංකා විදුලිබල මණ්ඩලයේ ඉතිහාසයේ විශාල මාරුවක් සිදුවූ දිනයක් බවට පත්ව තිබේ. 1969 අංක 17 දරන ලංකා විදුලිබල මණ්ඩල පනත යටතේ ස්ථාපිත වූ ආයතනය මාර්තු 08 දින මධ්යම රාත්රියේ සිට නීත්යානුකූලව අහෝසි වී ඇති අතර, ඒ වෙනුවට නව සමාගම් හයකින් සමන්විත නව ආයතන ව්යුහයක් මාර්තු 09 සිට ක්රියාත්මක වේ.
ඒ අනුව 2024 අංක 36 දරන ශ්රී ලංකා විදුලිබල පනතේ (නිශ්චිත වගන්ති කිහිපයක් හැර) සෙසු ප්රතිපාදන මාර්තු 09 සිට බලාත්මක වීමත් සමඟ විදුලිබල ක්ෂේත්රය ප්රතිව්යුහගත කිරීම නිල වශයෙන් ආරම්භ වී ඇත. බලශක්ති අමාත්යවරයා විසින් නිකුත් කළ අති විශේෂ ගැසට් නිවේදනයක් මඟින් මෙම නව ව්යුහය ක්රියාත්මක කිරීමට විධිවිධාන සලසා තිබේ.
මෙම ප්රතිව්යුහගතකරණය යටතේ විදුලිබල මණ්ඩලයේ මෙතෙක් සිදුකරන ලද සියලු මෙහෙයුම් කටයුතු නව සමාගම් හයකට පවරා ඇත. ඒ අනුව විදුලි උත්පාදනය, සම්ප්රේෂණය, බෙදාහැරීම සහ පද්ධති මෙහෙයුම් වැනි ප්රධාන කාර්යයන් වෙන වෙනම ආයතනික ඒකකයන්ට භාරදීම මෙම නව ව්යුහයේ ප්රධාන ලක්ෂණයකි.
ලංකා විදුලිබල මණ්ඩලය වෙනුවට පිහිටුවන ලද සමාගම් හය ලෙස විදුලි ජනන ලංකා (පුද්ගලික) සමාගම, ජාතික සම්ප්රේෂණ ජාල සේවා සපයන්නන්ගේ (පුද්ගලික) සමාගම, ජාතික පද්ධති ක්රියාකරු (පුද්ගලික) සමාගම, විදුලි බෙදාහැරීම ලංකා (පුද්ගලික) සමාගම, සේවක අරමුදල (පුද්ගලික) සමාගම සහ එනර්ජි වෙන්චර්ස් ලංකා (පුද්ගලික) සමාගම පිහිටුවා ඇත.
මෙම නව සමාගම්වලින් තුනක් සඳහා නව සාමාන්යාධිකාරීවරුන් පත් කිරීමටද රජය පියවර ගෙන තිබේ. ඒ අනුව Electricity Distribution Lanka පුද්ගලික සමාගමේ සාමාන්යාධිකාරීවරයා ලෙස ඉංජිනේරු K.S.I කුමාර මහතා පත් කර ඇත. Electricity Generation Lanka සමාගමේ සාමාන්යාධිකාරීවරයා ලෙස ඉංජිනේරු සාලිය පණ්ඩිතරත්න මහතා පත් කර ඇති අතර, ජාතික සම්ප්රේෂණ පද්ධති සේවා සපයන්නන්ගේ සමාගමේ සාමාන්යාධිකාරීවරයා ලෙස ඉංජිනේරු N.S. වෙත්තසිංහ මහතා පත් කර ඇත.
අමාත්යවරයාගේ ප්රකාශය
මෙම නව ව්යුහය හඳුන්වාදීම සම්බන්ධයෙන් අදහස් දක්වමින් බලශක්ති අමාත්ය කුමාර ජයකොඩි මහතා සඳහන් කළේ, පෙර රජය විසින් විදුලිබල මණ්ඩලය කොටස් 12කට කඩා පුද්ගලීකරණය කිරීමට ගත් උත්සාහයන් වෙනුවට වත්මන් රජය සියයට සියයක්ම රාජ්ය හිමිකාරීත්වය සහිත සමාගම් පිහිටුවා විදුලි ක්ෂේත්රයේ රාජ්ය හිමිකාරීත්වය තහවුරු කර ඇති බවයි.
අමාත්යවරයා පෙන්වා දුන්නේ, මෙම ප්රතිව්යුහගතකරණය රටේ විදුලිබල ක්ෂේත්රය මුහුණ දෙන වත්මන් සහ අනාගත අභියෝග ජයගැනීම සඳහා අවශ්ය ව්යුහාත්මක වෙනසක් බවයි. එමෙන්ම සේවකයින්ගේ අයිතිවාසිකම් සහ වරප්රසාද කිසිඳු ලෙසින් අඩු නොවන බවට රජය වගකීම භාරගන්නා බවද ඔහු ප්රකාශ කළේය.
“සේවකයින් ලෙස ඔබට මෙතෙක් තිබූ වරප්රසාද සහ අයිතිවාසිකම් අබමල් රේණුවකින්වත් අඩු නොවී නව ආයතනවලද පවත්වාගෙන යාමට අපි වගකියනවා” යනුවෙන්ද අමාත්යවරයා සඳහන් කළේය. තවද පසුගිය කාලය තුළ විදුලිබල මණ්ඩල සේවකයින් විසින් ඉල්ලා සිටි ඉල්ලීම් බොහොමයක් රජය විසින් ඉටු කර ඇති බවද ඔහු පෙන්වා දුන්නේය.
එමෙන්ම විදුලිබල ක්ෂේත්රයේ වෘත්තීය සමිති සමඟ නිරන්තර සාකච්ඡා කරමින් ඔවුන්ගේ අදහස් සැලකිල්ලට ගනිමින් කටයුතු කළ බවද අමාත්යවරයා සඳහන් කළේය. නව ආයතනික ව්යුහය යටතේ ලැබෙන අවස්ථා උපරිමයෙන් ප්රයෝජනයට ගනිමින් විදුලිබල ක්ෂේත්රය දියුණු කිරීම ජාතික කර්තව්යයක් ලෙස සලකා කටයුතු කරන ලෙසද ඔහු සේවකයින්ගෙන් ඉල්ලා සිටියේය.
කෙසේ වෙතත් විදුලිබල මණ්ඩලය අහෝසි කරමින් නව සමාගම් හයක් පිහිටුවීම ශ්රී ලංකාවේ විදුලි ක්ෂේත්රයේ ඉතිහාසයේ විශාලම ව්යුහාත්මක වෙනසක් ලෙස සැලකේ. 1969 සිට දශක පහකට අධික කාලයක් රටේ විදුලි සැපයුම කළමනාකරණය කළ ලංකා විදුලිබල මණ්ඩලය අහෝසි වීමත් සමඟ එහි කාර්යයන් නව ආයතන ව්යුහයකට බෙදී යාම ශ්රී ලංකාවේ බලශක්ති ක්ෂේත්රයේ නව පරිච්ඡේදයක් ආරම්භ කර ඇත.
