No menu items!
27.7 C
Sri Lanka
9 October,2025

ජනාධිපතිගේ වැය 26% කින් වැඩිවෙද්දී අගමැතිගේ වැය 25% කින් අඩුවෙයි

Must read

විධායක ජනාධිපති ක්‍රමය අහෝසි කර රටට අලුත් ආණ්ඩුක්‍රම ව්‍යවස්ථාවක් ලබාදෙන බවට ජනාධිපති අනුර කුමාර දිසානායක බලයට පත්වීමට පෙර මේ රටේ මහජනයාට පොරොන්දු විය. ඔහු ජනාධිපතිවරයා ලෙස තේරී පත්වී වසරක කාලයක් ගෙවුණේ පසුගිය දිනවලදීය. එහෙත් විධායක ජනාධිපති ක්‍රමය අහෝසි කර රටට නව ආණ්ඩුක්‍රම ව්‍යවස්ථාවක් සකස් කිරීම සම්බන්ධයෙන් ආණ්ඩුව පාර්ශ්වයෙන් කතිකාවක් පෙනෙන්නට නැති අතර ඒ සම්බන්ධයෙන් නිර්දේශ ඉදිරිපත් කිරීමට විද්වත් කමිටුවක් වත් පත්කර නැත.

ඒ කෙසේ වෙතත් ලබන වසරේ අයවැය සඳහා විසර්ජන පනත් කෙටුම්පත මේ වනවිට ප්‍රකාශයට පත්කර ඇත. පසුගිය සතියේ අපගේ මුල් පුවතින් පෙන්වාදුන් පරිදි එහි විශේෂත්වය වන්නේ මුළු රජයේ වැයෙන් සියයට 25ක ප්‍රතිශතයක් ජනාධිපතිවරයා යටතේ ඇති ආරක්ෂක, මුදල්, ක්‍රමසම්පාදන හා ආර්ථික සංවර්ධන, ඩිජිටල් ආර්ථික යන අමාත්‍යාංශවලටත්, ජනාධිපති කාර්යාලයටත් වෙන්කර තිබෙන බවයි.

ජාතික ජන බලවේගයේ නායකත්ව මට්ටමේ අය මෙන්ම ඊට පහළ සිටින අයද සෑම අවස්ථාවක වාගේම රටට කියන කතාවක් වන්නේ ඔවුන් පක්ෂයක් ලෙස සාමූහිකව එකට වැඩ කරමින් සිටින බවයි. විශේෂ දක්ෂයන් කිසිවෙක් නැති බවද, සියල්ලන්ම රට ගොඩනැඟීමේ එක් වැඩක් වෙනුවෙන් සාමූහිකව කටයුතු කරමින් සිටින බවයි. එම සාමූහික බව වඩාත් ඔප් නංවා පෙන්වනු ලබන අවස්ථාවක් වන්නේ එහි නායකත්ව මට්ටමේ පිරිස් ජනාධිපති අනුර කුමාර දිසානායක සම්බන්ධයෙන් ප්‍රසිද්ධියේ සිදුකරන කතාවලදී ‘ජනාධිපති අනුර සහෝදරයා’ යැයි ආමන්ත්‍රණය කරමින් හැඳින්වීම් සිදුකිරීමය.

එහෙත් රාජ්‍ය අයවැයෙන් හතරෙන් එකක ප්‍රමාණයක් ජනාධිපති අනුර කුමාර දිසානායක බෙදාගෙන කටයුතු කිරීමට යෑමෙන් පෙන්නුම් කරන්නේ කියනු ලබන සාමූහික බවට වඩා වෙනස් තත්වයක් ඇති බවයි.

2026 වර්ෂයට අදාළ රාජ්‍ය වැය හෙවත් සේවා වියදම ආසන්න වශයෙන් රුපියල් බිලියන 4434කි. 2025 වර්ෂයට අදාළ විසර්ජන පනත් කෙටුම්පතේ එම රාජ්‍ය වැය තිබුනේ ආසන්න වශයෙන් රුපියල් බිලියන 4218ක් වශයෙනි. එය 2025 වර්ෂයට සාපේක්ෂව 2026 වර්ෂය සඳහා ආසන්න වශයෙන් රුපියල් බිලියන 216ක වැඩිවීමකි. ප්‍රතිශතයක් ලෙස ගත් කල එය ආසන්න වශයෙන් සියයට 5ක වැඩිවීමකි. වියදම් මිල ගණන් ඉහළ යෑම හේතුවෙන් එසේ ඒ ආකාරයෙන් රාජ්‍ය වැය වැඩිවීම තේරුම්ගත හැකි තත්වයකි.

බලයට පත්වීමට පෙර ජනාධිපති අනුර කුමාර දිසානායක මෙන්ම ජාතික ජන බලවේගයේ නායකත්ව මට්ටමේ පිරිස් ප්‍රකාශ කළ එක් කරුණක් වූයේ ජනාධිපතිවරයාගේ වියදම් කපා හරින බවයි. ඒ හිටපු ජනාධිපතිවරුන් ජනාධිපතිවරයා වෙනුවෙන් (ජනාධිපති කාර්යාලයට) අධික වැයක් දැරූ බව පවසමිනි.

ඒ නිසාම ජනාධිපති කාර්යාලයට 2025 වසරේ වෙන්කළ මුදල් හා 2026 වසරට වෙන්කළ මුදල් පිළිබඳව සසඳා බැලීමක් කිරීම උචිතය. ජනාධිපතිවරයා යටතේ ඇති ආරක්ෂක, මුදල්, ක්‍රම සම්පාදන හා ආර්ථික සංවර්ධන සහ ඩිජිටල් ආර්ථික අමාත්‍යාංශ ගැන මෙහිදී අවධානය යොමු කරන්නේ නැත. ඒ ජනාධිපතිවරයාගේ වියදම් යන්නට ඒවා ඈඳාගත නොහැකි හෙයිනි. එමෙන්ම හිටපු ජනාධිපතිවරුන් ජනාධිපති වැය ශීර්ෂයට වෙන්කරගත් වැය පිළිබඳවද මෙහිදී අවධානය යොමු කරන්නේ නැත. ඒ එම පරිච්ඡේදය අවසන් කර වත්මන් ජනාධිපති අනුර කුමාර දිසානායක ලියනවා යැයි කියන්නේ ජනාධිපතිවරයාගේ වියදම් අඩු අලුත් පරිච්ඡේදයක් වන බැවිනි.

2025 වර්ෂයේදී විසර්ජන පනත මගින් ජනාධිපති කාර්යාලයට වෙන්කර තිබූ මුදල ආසන්න වශයෙන් රුපියල් බිලියන 8.9 (රු. 8,992,980,000) කි. ඒ තුළ ආසන්න වශයෙන් පුනරාවර්තන වියදම් රුපියල් බිලියන 2.5 (රු. 2,538,980,000) ක්ද , ආසන්න වශයෙන් මූලධන වියදම් රුපියල් බිලියන 6.4 (රු. 6,454,000,000) ක්ද තිබේ. එහෙත් 2026 වර්ෂයට යනවිට සිදුවී ඇත්තේ කුමක්ද? පුනරාවර්තන වියදම ආසන්න වශයෙන් රුපියල් බිලියන 2.6 (රු. 2,665,980,000) දක්වා වැඩිවී ඇත. පුනරාවර්තන වියදම යනු වැටුප් ඇතුළු අනිවාර්ය වියදම් නිසා එයද තේරුම් ගත හැකි තත්වයකි.

එහෙත් 2026 වර්ෂයට යනවිට ආසන්න වශයෙන් මූලධන වියදම රුපියල් බිලියන 8.7 (රු. 8,712,000,000) දක්වා වැඩිවී ඇත. එහි වැඩිවීම ආසන්න වශයෙන් රුපියල් බිලියන 2.2 (රු. 2,258,000,000) කි. ඒ අනුව ජනාධිපති කාර්යාලයට හෙවත් ජනාධිපතිවරයාට 2025 වර්ෂයට සාපේක්ෂව 2026 වර්ෂයට ආසන්න වශයෙන් රුපියල් බිලියන 2.3 (රු. 2,385,000,000) ක වැය වැඩිවීමක් ඇත. එය ජනාධිපතිවරයා වෙනුවෙන් 2025 වර්ෂයේ වෙන්කළ මුදල්වලට සාපේක්ෂව ගත්කල සියයට 26.52%ක විශාල වැඩි වීමකි. එය 2025 රාජ්‍ය වැයට වඩා 2026 රාජ්‍ය වැය පොදුවේ වැඩිවී ඇති සියයට 5ක මට්ටම සමඟ ගත්කල තවදුරටත් සැලකිය යුතු වැඩිවීමකි.

මෙහිදී පාර්ලිමේන්තුවේ ප්‍රධානියා වන අගමැතිගේ හෙවත් අගමැති කාර්යාලයට වෙන්කර ඇති මුදල් සම්බන්ධයෙන් සිදුවී ඇත්තේ කුමක්ද යන්නද සලකා බැලීම වටී. 2026 වර්ෂයේ අගමැති කාර්යාලය සඳහා වෙන්කර ඇති මුදල රුපියල් මිලියන 875කි. ඒ තුළ පුනරාවර්තන වියදම් වන ආසන්න වශයෙන් රුපියල් මිලියන 898 (රු. 898,500,000) ක් හා මූලධන වියදම් වශයෙන් ආසන්න වශයෙන් රුපියල් මිලියන 76 (රු. 76,500,000) ක් ඇත. එසේ වුවද 2025 වර්ෂයේ අගමැතිවරයාගේ හෙවත් අගමැති කාර්යාලයේ වියදම වී ඇත්තේ ආසන්න වශයෙන් රුපියල් බිලියන 1.1 (රු. 1,170,000,000) කි. ඒ තුළ ආසන්න වශයෙන් රුපියල් බිලියන 1 (රු. 1,099,000,000) ක පුනරාවර්තන වියදමක්ද, රුපියල් මිලියන 71ක මූලධන වියදමක්ද තිබී ඇත. ඒ අනුව අගමැත වියදම 2025 වර්ෂයට සාපේක්ෂව 2026 වර්ෂයේදී රුපියල් මිලියන 295කින් හෙවත් සියයට 25.21% කින් අඩුවී ඇත.

එහි තේරුම වන්නේ ජනාධිපතිවරයාගේ වැය ශීර්ෂය 2025 වර්ෂයට සාපේක්ෂව 2026 වර්ෂයේදී ආසන්න වශයෙන් සියයට 26කින් වැඩි වෙද්දී අගමැතිගේ වැය ශීර්ෂය ආසන්න වශයෙන් සියයට 25කින් අඩුවී තිබීමය. ඒ අනුව වියදම අඩුවී ඇත්තේ අගමැති වැය ශීර්ෂයේ වන අතර ජනාධිපති වැය ශීර්ෂයේ සිදුවී ඇත්තේ වියදම වැඩිවීමය.

විධායක ජනාධිපති ක්‍රමය අහෝසි කිරීම සඳහා යන ජනාධිපතිවරයකු එසේ ජනාධිපති වැය ශිර්ෂය අසමාන්‍ය අගයකින් වැඩිකර ගැනීම මගින් පෙන්නුම් කරන්නේ නැත. එමෙන්ම ආණ්ඩුක්‍රම ව්‍යවස්ථාවෙන් නියම කර ඇති ආරක්ෂක විෂය හැර මුදල්, ක්‍රම සම්පාදන හා ආර්ථික සංවර්ධන සහ ඩිජිටල් ආර්ථික යන අමාත්‍යාංශ දෙක තමා යටතේ තබා ගැනීම මගින්ද අනුර කුමාර දිසානායක මහතා විධායක ජනාධිපති ධුරය අවසන් කිරීමට යන බවක් පෙන්නුම් කරන්නේ නැත.

මන්ද 2015 යහපාලන ආණ්ඩුව බලයට පත්වීමෙන් පසු ගෙන ආ 19 වැනි ආණ්ඩුක්‍රම ව්‍යවස්ථා සංශෝධනයේදී ජනාධිපතිවරයාට ආණ්ඩුක්‍රම ව්‍යවස්ථාවෙන් පැවරී ඇති ආරක්ෂක විෂය පමණක් තබා ගැනීමට ප්‍රතිපාදන සැලසූ අතර මෛත්‍රීපාල සිරිසේන හිටපු ජනාධිපතිවරයාට පමණක් සීමාවන පරිදි ඔහුගේ ඉල්ලීම පරිදි බුද්ධ ශාසන හා මහවැලි විෂයන්වල ඇමති ධුර දැරීමට අවස්ථාව සලසා දෙනු ලැබීය.

එය වෙනස් කරනු ලැබුයේ ගෝඨාභය රාජපක්ෂ බලයට පත්වීමෙන් පසු 20 වන සංශෝධනය මගිනි. වත්මන් ජනාධිපති අනුර කුමාර දිසානායක ආරක්ෂක විෂයට අමතරව අමාත්‍යාංශ දෙකක් ඔහු යටතේ තබා ගනිමින් කටයුතු කරන්නේ එම රාජපක්ෂ ක්‍රමය අනුගමනය කරමින් වීම තවදුරටත් සලකා බැලිය යුතු තත්වයකි.

- Advertisement -spot_img

පුවත්

LEAVE A REPLY

Please enter your comment!
Please enter your name here

- Advertisement -spot_img

අලුත් ලිපි