පුද්ගලයකු පැහැරගෙන ගොස් අතුරුදහන් කිරීම සම්බන්ධයෙන් ජූලි 28 දින අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන පොල්ගහවෙල මහේස්ත්‍රාත් අධිකරණයට ඉදිරිපත් කිරීමෙන් පසු ජූලි 30 වැනිදා දක්වා රක්ෂිත බන්ධනාගාරගත කරන ලද හිටපු නාවික හමුදාපතිවරයකු වූ විශ්‍රාමික අද්මිරාල් නිශාන්ත උළුගේතැන්න නැවත අගෝස්තු 13 දක්වා රක්ෂිත බන්ධනාගාරගත කර තිබේ.
ඒ ඔහුව නැවත ජූලි 30 වැනිදා පොල්ගහවෙල මහේස්ත්‍රාත් අධිකරණයට ඉදිරිපත් කිරීමෙන් පසුය.
අපරාධ පරීක්ෂණ දෙපාර්තමේන්තුවේ එම විමර්ශනයට පාදක වී තිබුනේ කෑගල්ල මහාධිකරණය විසින් ලබාදුන් නියෝගයක් වන අතර එම නියෝගයට හේතු වී තිබුනේ අලව්ව පොලිස් ස්ථානයේ අත්අඩංගුවේ අලව්ව රෝහලේ නේවාසිකව ප්‍රතිකාර ලබමින් සිටියදී 2010.07.26 දින අලුයම 1.30ට පමණ අතුරුදහන් වූ කෑගල්ල, ඇකිරියගල, මල්වත්ත කන්ද ලිපිනයේ පදිංචි ගනේරාළලාගේ ශාන්ත සමරවීර අතුරුදහන් වීමේ සිදුවීමයි.
එම අතුරුදහන්වීමෙන් පසු ශාන්ත සමරවීර ත්‍රිකූණාමලය නාවික හමුදා කඳවුරේ ටැංජන් හා ගන්සයිඩ් යන භූගත සිරමැදිරිවල රඳවා සිටි බව අනාවරණය වී ඇති අතර හිටපු නාවික හමුදාපති නිශාන්ත උළුගෙතැන්න 2010.10.01 දින සිට 2013.12.25 දින දක්වා නාවික හමුදාවේ බුද්ධි අධ්‍යක්ෂ වශයෙන් කටයුතු කිරීම ඒ සඳහා හේතුවයි. එසේ හිටපු නාවික හමුදාපති උළුගේතැන්න නාවික හමුදා බුද්ධි අධ්‍යක්ෂ වශයෙන් කටයුතු කිරීමේදී 2010 හෝ 2011 වර්ෂවලදී එම භූගත කඳවුරු වෙත ගොස් එම කඳවුරු පරික්ෂාවට ලක්කර ඇති බව හා එහි සිටි පුද්ගලයින් සමග කතාබස් කර ඇති බවද, ඊට අමතරව එම සිරමැදිරිවල සේවය කළ නිලධාරීන් සමගද කතාබස් කර ඇති බව සිය විමර්ශනයේදී අනාවරණය වූ බව අපරාධ පරීක්ෂණ දෙපාර්තමේන්තුව ජූලි 18 දින පොල්ගහවෙල මහේස්ත්‍රාත් අධිකරණයට ඉදිරිපත් කර ඇති වැඩිදුර වාර්තාවේ සඳහන් කරයි.
එම භූගත කඳවුරු පරික්ෂාවට ලක්කිරීමේදී ඒවායේ 40-50ක පමණ පිරිසක් සිට ඇත. ඒ එල්ටීටීඊ සැකකරුවන්, නාවික හමුදා සාමාජිකයන් හා එසේ නොවන සිවිල් වැසියන් වශයෙනි.
මේ සම්බන්ධයෙන් අපරාධ පරීක්ෂණ දෙපාර්තමේන්තුව එම භූගත සිරමැදිරිවල රඳවා සිටි එල්ටීටීඊ සංවිධානයට බැඳී කටයුතු කර ඉන් ඉවත් වීමෙන් පසු ස්වෙච්ඡා නාවික සෙබලෙකු ලෙස නාවික හුමදාවේ බුද්ධි අංශයට බැඳී සේවය කළ බස්නායක මුදියන්සේලාගේ විජේකාන්ත නොහොත් පොඩි මල්ලී, එල්ටීටීඊ සංවිධානයේ හිටපු ත්‍රිකුණාමලය බුද්ධි අංශ නායක සෙල්වතම්බි මහේන්ද්‍රන් නොහොත් භාරති, හිටපු එල්ටීටීඊ සමාජික ඥානසේකරම් රොබට් නොහොත් මුරලි යන පුද්ගලයන්, එම භූගත සිරමැදිරිවලට විවිධ අවස්ථාවලදී ගෙනගොස් ඇති හිටපු එල්ටීටීඊ සාමාජිකයකු වූ හා නාවික හමුදාවටද තොරතුරු සැපයූ ක්‍රිෂ්ණදාස් දේවමනෝහරන්, ගන්සයිඩ් භූගත සිරමැදිරිවල රාජකාරි කළ නාවික නැවි හැවනේ කුඹුරේ ගෙදර සමන් කුමාර අබේකෝන් හා ත්‍රිකුණාමලය නාවික හමුදා කඳවුරේ විශේෂ බුද්ධි ඒකකය භාරව කටයුතු කළ රණසිංහ ප්‍රේඩිගේ සුමිත් රණසිංහ යන අයගේ ප්‍රකාශ අධිකරණයට ඉදිරිපත් කර ඇත.
එහිදී එම ප්‍රකාශ ලබාදුන් භූගත සිරමැදිරිවල රඳවා සිටි රැඳවියන් ඇතුළු සියලු දෙනා ප්‍රකාශ කර ඇත්තේ එම භූගත සිරමැදිරිවල 40ත් 50ත් අතර පිරිසක් රඳවා සිටි බව හා ඉහළ නාවික හමුදා නිලධාරීන් පැමිණ ඔවුන් පිළිබඳ පරික්ෂා කිරීම් හා ඔවුන් සමග කතාබස් පවා කළ බවයි. එමෙන්ම මෙම විමර්ශනයට අදාළ ශාන්ත සමරවීර යන අය එම භූගත සිරමැදිරිවල රඳවා සිටි බවයි. යම් අවස්ථාවක ඔහුව එයින් රැගෙන ගිය බවයි.
ත්‍රිකුණාමලය නාවික හමුදාවේ විශේෂ බුද්ධි ඒකකය භාරව කටයුතු කළ රණසිංහ ප්‍රේඩිගේ සුමිත් රණසිංහ සිය ප්‍රකාශය මගින් තහවුරු කර ඇත්තේ 2010 වර්ෂයේදී නාවික හමුදා බුද්ධි අධ්‍යක්ෂ ලෙස වැඩ බාර ගන්නා ලද හිටපු නාවික හමුදා හමුදාපති නිශාන්ත උළුගේතැන්න ත්‍රිකුණාමලය නාවික හමුදා කඳවුරට පැමිණ ටැංජන් හා ගන්සයිඩ් නැමැති භුගත සිරමැදිරි පරික්ෂා කර එහි රඳවා සිටි සැකකරුවන් සමග කතාබස් කළ බවයි. එමෙන්ම එම අවස්ථාව වනවිට එම සිරමැදිරිවල 40ත් 50ත් අතර සිරකරුවන් රඳවා සිටි බවයි.
හිටපු නාවික හමුදාපති නිශාන්ත උළුගේතැන්න ඔහුගේ ප්‍රකාශයේදී කියා ඇත්තේ ඔහු නාවික හමුදාවේ බුද්ධි අධ්‍යක්ෂ ලෙස වැඩ බාර ගැනීමෙන් පසු ත්‍රිකුණාමලය නාවික හා සාගරික විද්‍යාපීඨ පරිශ්‍රයේ පිහිටා ඇති ගන්සයිඩ් නැමැති භූගත සිරමැදිරි බුද්ධි නිලධාරීන් වශයෙන් සිටි ලුතිනන් කමාන්ඩර් රණසිංහ සමග ගොස් පරික්ෂා කළ බවත්, එම සිර මැදිරි පෙන්වා සිටියේ රණසිංහ නිලධාරියා බවත්, රණසිංහ නැමැති නිලධාරියා එම සිරමැදිරිවල 40ත් 50ත් අතර සිරකරුවන් සිටින බව පෙන්වා සිටි බවත්, විජේකාන්තන නැමැති රැඳවියා එම අවස්ථාවේ හමු නොවූ බවත්, පසුව විජේකාන්ත යන රැඳවියා සිරමැදිරියේ සිටි බව හඳුනාගත් බවත්ය.
එම ප්‍රකාශ සහිත වැඩිදුර වාර්තාව අධිකරණයට ඉදිරිපත් කරමින් අපරාධ පරීක්ෂණ දෙපාර්තමේන්තුව සඳහන් කරන්නේ ‘ඒ අනුව මෙම සිද්ධිය සම්බන්ධයෙන් විමර්ශන සිදුකිරීමේදී එවකට බුද්ධි අධ්‍යක්ෂ වශයෙන් කටයුතු කළ දැනට විශ්‍රාම ගොස් සිටින අද්මිරාල් හිටපු නාවික හමුදාපති දමිත් නිශාන්ත සිරිසෝම උලුගේතැන්න යන අය 2010 අවසන් කාලයේදී ත්‍රිකුණාමලය නාවික හමුදා කඳවුර වෙත ගොස් විශේෂ බුද්ධි අංශය බාරව සිටි මෙම නඩුවේ 08 වන සැකකරු වන සුමිත් රණසිංහ සමග ටැංජන් හා ගන්සයිඩ් නැමැති සිරමැදිරි පරික්ෂා කර එහි රඳවා සිටි සැකකරුවන් පරික්ෂා කර ඔවුන් සමග කතාබස් කර ඇති බවට, ඒ වනවිට අයුතු ලෙස රඳවා සිටි සිරකරුවන් 40ක් 50ක් රඳවා සිටි බවට විමර්ශනයේදී අනාවරණය වී ඇති බැවින් එහිදී ගනේරාළලාගේ ශාන්ත සමරවීර යන අය ටැංජන් නැමැති සිර මැදිරියේ අයුතු ලෙස සිරකර තබා ගැනීම හා ඉන්පසු අතුරුදහන් කිරීමට සෘජුවම ආධාර අනුබල දීම සම්බන්ධයෙන් 2025.07.28 වන දින ලංකා දණ්ඩ නීති සංග්‍රහ පනතේ 32 සමග කියවෙන 102, 113 ආ, 147, 337, 359 හා 296 යටතේ ලැබිය හැකි වැරදි යටතේ අත්අඩංගුවට ගෙන අද දින ගරු අධිකරණය වෙත ගෞරවයෙන් ඉදිරිපත් කරමි’ යන්නය.
මෙම විමර්ශනය සම්බබන්ධයෙන් ජූලි 30 දින අධිකරණයට වැඩිදුර වාර්තාවක් ඉදිරිපත් කරමින් අපරාධ පරීක්ෂණ දෙපාර්තමේන්තුව සඳහන් කරන්නේ, සිද්ධියට අදාළව එම දෙපාර්තමේන්තුවේ නිලධාරීන් කණ්ඩායමක් විමර්ශන රාජකාරි කටයුත්තක් සඳහා 2025.01.18 දින පේදුරුතුඩුව පොලිස් වසමේ දී නාවික හමුදාවේ නිලධාරියකු සමග සාක්ෂිකරුවකුගේ ලිපිනයක් පරික්ෂා කිරීමට යෑමේදී එදින පේදුරුතුඩුව නාවික අනුඛන්ඩයේ බුද්ධි නිලධාරින් විසින් අංක 6969 හා ඵශ 5426 දරන යතුරුපැදිවලින් අපරාධ පරීක්ෂණ දෙපාර්තමේන්තුවේ නිලධාරීන් කණ්ඩායම ගමන්ගත් ජීප් රථය හඹා යෑම සම්බන්ධයෙන් විමර්ශනයක් සිදුකළ බවයි. එහිදී යතුරු පැදිවල ගමන්ගත් නාවික හමුදාවේ බුද්ධි නිලධාරීන්ගේ ප්‍රකාශ සටහන් කරගෙන ඇති අතර ඔවුන් ප්‍රකාශ කර ඇත්තේ එම ලුහුබැදීමේ නියෝගය ඔවුන්ට ලබාදුන්නේ පේදුරුතුඩුව නාවික හමුදා බුද්ධි අංශය භාර ලුතිනන් කමාන්ඩර් රූපසිංහ නිලධාරියා බවයි. එම නිලධාරියාගෙන්ද ප්‍රකාශයක් සටහන් කරගත් බවත් එම සිද්ධිය සම්බන්ධයෙන් වැඩිදුර විමර්ශන සිදුකරන බවත් වාර්තා කර ඇත.
එමෙන්ම හිටපු නාවික හමුදාපති උළුගේතැන්න විසින් ලබාදෙන ලද තොරතුරු අනුව ටැංජන් හා ගන්සයිඩ් සිරමැදිරි පරික්ෂා කරන ලද නාවික හමුදාවේ නිලධාරීන් හා කඳවුර භාරව සිටි නිලධාරින් සම්බන්ධයෙන් වැඩිදුර විමර්ශන කටයුතු සිදුකර අධිකරණයට වාර්තා කරන බවද සඳහන් කර ඇත.
කප්පම් ලබා ගැනීම සඳහා කොළඹ සහ ඒ අවට තරුණයින් ඇතුළු පුද්ගලයන් 11 දෙනෙකු පැහැරගෙන යෑම සම්බන්ධයෙන් මීට පෙර අපරාධ පරීක්ෂණ දෙපාර්තමේන්තුව සිදුකළ විමර්ශනයේදී හෙළි වී තිබුනේද එම 11 දෙනාවද ත්‍රිකුණාමලය නාවික හමුදා කඳවුරේ ගන්සයිඩ් භූගත කඳවුරේ රඳවා සිටි බවයි.
හිටපු නාවික හමුදාපති නිශාන්ත උළුගෙතැන්නට චෝදනා එල්ල වී ඇති නිශාන්ත සමරවීර ත්‍රිකුණාමලය ගන්සයිඩ් භූගත කඳවුරේ රඳවා සිටි සමයේම කප්පම් ලබා ගැනීම සඳහා කොළඹ ඇතුළු ඒ අවට ප්‍රදේශවලින් තරුණයින් ඇතුළු 11 දෙනෙකු ලෙස පැහැරගෙන ගිය පිරිස් ද රඳවා සිටි බව එහි රඳවා සිටි නාවික හමුදා සාමාජිකයන්ගෙන් හා වෙනත් පුද්ගලයින්ගෙන් විමර්ශනයේදී කරුණු අනාවරණය කරගෙන තිබුණි. තරුණයින් ඇතුළු 11 දෙනෙකු පැහැරගෙන යෑම සම්බන්ධයෙන් මීට පෙර හිටපු නාවික හමුදාපතිවරයකු වූ වසන්ත කරන්නාගොඩ ඇතුළු නාවික හමුදා සාමාජිකයන් පිරිසකට චෝදනා එල්ල වී තිබුණි. හිටපු නාවික හමුදාපතිවරයකු වූ වසන්ත කරන්නාගොඩට ඒ සම්බන්ධයෙන් චෝදනා එල්ල වූයේ ත්‍රිකුණාමලය නාවික හමුදා කඳවුරේ ගන්සයිඩ් භූගත කඳවුරේ පැහැර ගන්නා ලද පුද්ගලයින්ව නීති විරෝධිව රඳවාගෙන එය වද කඳවුරක් වශයෙන් භාවිතා කරන බව ඔහු දැනුවත්ව සිටි බව කියමිනි.
මේ අනුව පුද්ගලයන් පැහැරගෙන ගොස් අතුරුදහන් කිරීම සම්බන්ධයෙන් චෝදනා එල්ල වූ දෙවන නාවික හමුදාපතිවරයා ලෙස හිටපු නාවික හමුදාපති නිහාන්ත උළුගේතැන්න හැදින්විය හැකිය. පුද්ගලයන් පැහැරගෙන ගොස් අතුරුදහන් කිරීම සම්බන්ධයෙන් වන මෙවැනි චෝදනා හිටපු යුද හෝ ගුවන් හමුදාපතිවරුන්ට එරෙහිව තවමත් එල්ල වී නැත. එහෙත් ඔවුන්ට වෙනත් චෝදනා නම් එල්ල වී ඇත.
මෙම නඩුවේ විමර්ශන අනුව නීති විරෝධිව පැහැරගෙන යන ලද පුද්ගලයින්ව ත්‍රිකුණාමලය නාවික හමුදා කඳවුරේ ටැංජන් හා ගන්සයිඩ් යන භූගත සිරමැදිරිවල රඳවා තබා ගැනීම සම්බන්ධයෙන් නාවික හමුදාවේ විශ්‍රාමික හා සේවයේ යෙදෙන තවත් ඉහළ නිලධාරීන් ප්‍රකාශ ලබා ගැනීම සඳහා ඉදිරියේදී කැඳවෙනු ඇතැයි සිතිය හැකිය. එසේම ඔවුන්ව අත්අඩංගුවට ගැනීම, අධිකරණයට ඉදිරිපත් කිරීම හා සමහරවිට රක්ෂිත බන්ධනාගාරගත කිරීමද සිදුවිය හැකිය. ඒ මගින් මීට වසර ගණනාවකට පෙර සිදුකර තිබූ තවත් අපරාධ රැසක තොරතුරු හෙළිවීමද සිදුවනු ඇත.
