පාස්කු ප්‍රහාර විමර්ශනය: පිල්ලෙයාන්ට, සලේට රට යෑම තහනම්

පොලිස් බුද්ධි අංශයේ අයෙක් රැඳවුම් භාරයේ
හමුදා බුද්ධි අංශයේ වාර්තා දෙන්න නියෝගයක්
හච් සිම්කාඩ් විස්තර දෙන්න නියෝගයක්

පාස්කු ඉරුදින ප්‍රහාරය සම්බන්ධයෙන් චැනල් ෆෝ නාලිකාවේ විකාශය වූ අසාත් මව්ලානාගේ ප්‍රකාශයේ සඳහන් හිටපු යුද හමුදා බුද්ධි අධ්‍යක්ෂ විශ්‍රාමික මේජර් ජෙනරාල් සුරේෂ් සලේ හා නැගෙනහිර පළාතේ හිටපු මහ ඇමති හා රාජ්‍ය ඇමති සිවනේසතුරේ චන්ද්‍රකාන්තන් හෙවත් පිල්ලෙයාන් පිළිබඳව වන හෙළිදරව්කිරීම් සම්බන්ධයෙන් පරීක්ෂණයක් සිදුකරන ලෙස සමාජ හා සාමයික කේන්ද්‍රයේ විධායක අධ්‍යක්ෂ රොහාන් සිල්වා පියතුමා මහජන ආරක්ෂක අමාත්‍යාංශයේ ලේකම්වරයාගෙන් කරන ලද ඉල්ලීමක් අනුව ඒ සම්බන්ධයෙන් අපරාධ පරීක්ෂණ දෙපාර්තමේන්තුව විමර්ශනයක් ආරම්භ කර තිබුණි.

ඒ සම්බන්ධයෙන් කොළඹ කොටුව මහේස්ත්‍රාත් අධිකරණයට පළමු කරුණු වාර්තා කිරීම 2024.11.11 දින සිදුකර තිබූ අතර වැඩිදුර වාර්තාවක් 2024.11.15 වැනිදා ඉදිරිපත් කර තිබුණි. ඒ ඥානාර්ථ ප්‍රදීපය පුවත්පතේ ප්‍රධාන සංස්කාරක හා කොළඹ අගරදගුරු කාදිනල් පියතුමාගේ මාධ්‍ය ප්‍රකාශක ලෙස සිරිල් ගාමිණී පියතුමා 2024.11.10 දින අපරාධ පරීක්ෂණ දෙපාර්තමේන්තුව වෙත පැමිණ ප්‍රකාශයක් ලබාදීම සම්බන්ධයෙනි.

එහිදී සිරිල් ගාමිණී පියතුමා කියා ඇත්තේ අසාත් මව්ලානා චැනල් ෆෝ නාලිකාව මගින් විකාශනය කළ වැඩසටහනේදී පාස්කු ඉරුදින ප්‍රහාරය සම්බන්ධයෙන් මෙතෙක් හෙළි නොවූ තොරතුරු ඉදිරිපත් කර ඇති බවයි. දැනට අවුරුදු 02කට ඉහතදී ඔහුගේ විද්‍යුත් ලිපිනයට ලැබුණ ලේඛනයක් ඉදිරිපත් කරමින් ප්‍රකාශයක් ලබාදෙමින් ප්‍රකාශ කර ඇත්තේ චැනල් ෆෝ නාලිකාවේ අසාද් මව්ලානා සිදුකර ඇති ප්‍රකාශයේ සඳහන් කරුණු හා එම ලේඛනයේ ඇති කරුණු අතර සම්බන්ධතාවක් ඇති බවයි.

ඒ අනුව රොහාන් සිල්වා පියතුමා පැමිණිලි කර සිටින චැනල් ෆෝ නාලිකාවේ විකාශය වූ වැඩසටහනේදී අසාත් මව්ලානා අනාවරණය කළ කරුණු හා සිරිල් ගාමිණී ප්‍රනාන්දු පියතුමා විසින් ඉදිරිපත් කරන ලද අසාත් මව්ලානා ජිනීවා මානව හිමිකම් කවුන්සලය වෙත ඉදිරිපත් කළ බවට සඳහන් විමර්ශන කටයුතු සඳහා බාරදෙන ලද අසාත් මවුලානාගේ ප්‍රකාශය පරිශීලනයේදී 2019.04.21 දින සිදුවූ පාස්කු ඉරුදින ප්‍රහාරය පිළිබඳ යම් තොරතුරක් සිවනේසතුරෙයි චන්ද්‍රකාන්ත හෙවත් පිල්ලෙයාන් හා හිටපු යුද හමුදා බුද්ධි ප්‍රධානී සුරේෂ් සලේ දන්නා බවට අධිකරණයට කරුණු වාර්තා කර ඇති අතර ඔවුන් සම්බන්ධයෙන් විමර්ශන සිදුකර ප්‍රකාශ සටහන් කර ගන්නා තෙක් ඔවුන් දිවයිනෙන් බැහැරව යාම වැළැක්වීම සඳහා නියෝගයක් ඉල්ලා තිබේ. අධිකරණය එම නියෝගය ලබාදී තිබේ. ඒ අනුව සුරේෂ් සලේට මෙන්ම පිල්ලෙයාන්ටද අධිකරණ අවසරයකින් තොරව රටින් බැහැරවීම තහනම්ය.

ඒ සම්බන්ධයෙන් 2025.02.18 දින අධිකරණයට ඉදිරිපත් කළ වැඩිදුර වාර්තාවේ සඳහන් කරන්නේ පාස්කු ඉරුදින ප්‍රහාරයෙන් පසු 2019.04.26 කල්මුණේ සයින්දමරුදු බොලිවේරියන් ග්‍රාමයේදී බෝම්බ පුපරුවාගෙන මියගිය පුද්ගලයින් සමග සිට ජීවත්ව සිටින අබ්දූල් කාදර් ෆාතිමා හාදියාගේ ප්‍රකාශය මගින් ඔවුන් සමග එම ස්ථානයේ මහේන්ද්‍රන් පුලස්තිනී නොහොත් සාරා ජෙස්මින් නැමැත්තිය සිටි බවට කරුණු අනාවරණය වන බවයි. එහෙත් සිදුකර ඇති විමර්ශනයේදී මහේන්ද්‍රන් පුලස්තිනී නොහොත් සාරා ජෙස්මින්ගේ මළ සිරුරක් එම ස්ථානයේ තිබී හමුවී නොමැති බවයි.

අපරාධ ස්ථානයේ තිබූ මළ සිරුරු හඳුනා ගැනීම සඳහා අවස්ථා තුනකදී ඩීඑන්ඒ පරීක්ෂණ සිදුකර ඇති බවත් මුල් අවස්ථා දෙකෙහිදී ලබා ගන්නා ලද මෘත ශරීර කොටස්වලින් කරන ලද ඩීඑන්ඒ ගැළපීමේදී මහේන්ද්‍රන් පුලස්තිනී නොහොත් සාරා ජෙස්මින් නැමැත්තියගේ ඩීඑන්ඒ සාම්පල් ගැළපී නැත. එහෙත් තෙවන අවස්ථාවේදී මියගිය පුද්ගලයින්ගේ මෘත කොටස් සමග වෙන්ව වළ දමා තිබූ ශරීර කොටස්වල කුඩා අස්ථි කොටස් කිහිපයක ඩීඑන්ඒ රටාව මහේන්ද්‍රන් පුලස්තිනී නොහොත් සාරා ජෙස්මින්ගේ මවගේ ඩීඑන්ඒ රටාව සමග ගැළපී ඇත. ඒ අනුව පුලස්තිනී මහේන්ද්‍රන් නොහොත් සාරා ජෙස්මින් යන ඇය ඇයගේ මවගේ ගැහැනු දරුවකු බව අධිකරණයට වාර්තා කර ඇත.

විමර්ශනයේදී අනාවරණය වී ඇති කරුණු අනුව කල්මුණ සයින්දමරුදු බොලිවේරියන් ග්‍රාමයේ බෝම්බ පුපුරුවා ගැනීමේ සිද්ධියේදී පුද්ගලයින් මියගොස් සිටි ස්ථානයේ තිබූ බවට පුලස්තිනී මහේන්ද්‍රන් නොහොත් සාරා ජෙස්මින්ගේ ජාතික හැඳුනුම්පත සහිත මුදල් පසුමිබියක් සහ එහි තුළ තිබූ බැංකු කාඩ්පත් සහ තවත් ලේඛන කිහිපයක් එවකට අම්පාර කොට්ඨාසය බාර පොලිස් අධිකාරි බාරයට ගෙන අම්පාර පොලිස් ස්ථානයේ නඩු භාණ්ඩයක් වශයෙන් ඉදිරිපත් කර ඇති බවද සඳහන් කරයි.
විමර්ශනයේදී අනාවරණය වූ එම සැක කටයුතු කරුණු පිළිබඳ තහවුරු කර ගැනීම සඳහා එම අපරාධය සිදුවී කෙටි කාලයක් තුළ එම අපරාධ ස්ථානය ඡායාරූප ගත කරන ලද පොලිස් නිලධාරීන් වන අම්පාර කොට්ඨාස අපරාධ විමර්ශන කාර්යාංශයේ පොලිස් සැරයන් බෝධිපක්ෂ ජයසිංහ චේතිය රුවන්මල් ජයම්පති හා රත්නායක මුදියන්සේලාගේ රංජිත් පියසේන සහ අම්පාර ප්‍රාදේශීය මාධ්‍යවේදී චන්දන ලියනාරච්චි විසින් ඡායාරූප ගතකරන ලද හා වීඩියෝ ගතකරන ලද ඡායාරූප හා දර්ශන ඇතුළත් පරිගණක යන්ත්‍රයේ දත්ත ගබඩාව (හාඩ් ඩිස්ක්) ලබා ගැනීමට ඉල්ලීමක් කර ඇත. ඒ සඳහා අධිකරණයේ අවසරය ලැබී ඇති අතර එම පොලිස් නිලධාරීන්ගෙන් හා ප්‍රාදේශීය වාර්තාකරුගෙන් අපරාධ පරීක්ෂණ දෙපාර්තමේන්තුව ප්‍රකාශ සටහන් කර අධිකරණයට ඉදිරිපත් කර ඇත. එහිදී ප්‍රාදේශීය මාධ්‍යවේදී චන්දන ලියනාරච්චි කියා ඇත්තේ සිද්ධිය වූ 2019.04.26 දින රාත්‍රි කාලයේදී යුද්ධ හමුදා නිලධාරීන්ද සමග ගොස් එම නිවස අසල වීඩියෝ ගත කිරීම් ඔහු සිදුකළ බවයි.

එම දත්ත ගබඩා බාරයට ගෙන විමර්ශන ප්‍රගතිය වාර්තා කරන තෙක් නඩු ගොනුව අධිකරණයේ ආරක්ෂිත සේප්පුවේ සුරක්ෂිතව තබන ලෙසද අපරාධ පරීක්ෂණ දෙපාර්තමේන්තුව එම දිනයේදී අධිකරණයෙන් ඉල්ලීමක් කර ඇත.

2025.04.12 දින නැවතත් වැඩිදුර වාර්තාවක් ඉදිරිපත් කරමින් අපරාධ පරීක්ෂණ දෙපාර්තමේන්තුව සඳහන් කරන්නේ පාස්කු ප්‍රහාරය හා සම්බන්ධිත පාස්කු ප්‍රහාරයේ අපරාධකරුවන් වන මොහොමඩ් කාසිම් මොහොමඩ් සහරාන් ඇතුළු ඉස්ලාම් අන්තවාදීන් විසින් සිදුකළ පූර්ව අපරාධයක් වන 2018.11.30 දින අලුයම් කාලයේ වව්නතිව් පොලිස් ස්ථානයට අනුයුක්තව වව්නතිව් පොලිස් මාර්ග බාධකයේ රාජකාරියේ නිරතවී සිටියදී තියුණු ආයුධවලින් පහරදී ස්වයංක්‍රිය ගිනි අවිවලන් වෙඩි තබා පොලිස් නිලධාරීන් දෙදෙනෙකු ඝාතනය කර රාජකාරි ගිනි අවි පැහැර ගැනීමේ අපරාධය එල්ටීටීඊ සංවිධානයේ හිටපු සාමාජිකයන් විසින් සිදුකළ ක්‍රියාවක් බවට ඒත්තු ගැන්වීමට කටයුතු කළ බවට කරුණු අනාවරණය වී ඇති බවයි.

එම අපරාධයට හිටපු එල්ටීටීඊ සාමාජිකයා අත්අඩංගුවට පත්වීමෙන් පසු එම සැකකරුට අයත් කබායක් අපරාධ ස්ථානයට ආසන්න කන්නන්කුඩා ප්‍රදේශයේ බෝක්කුවක් අසලට දමා එම සැකකරු විසින්ම එම අපරාධය සිදුකළ බව වැඩිදුරටත් තහවුරු කිරීමට කටයුතු කර ඇති බවට විමර්ශනයේදී අනාවරණය වී ඇති බවයි.

ඒ අනුව පාස්කු ප්‍රහාරය හා සම්බන්ධ අපරාධකරුවන් සිදුකළ පූර්ව අපරාධයක් වන 2018.11.30 දින වව්නතිව් පොලිස් නිලධාරීන් දෙදෙනා ඝාතන සිද්ධියේ විමර්ශන නොමග යැවීමට කටයුතු කිරීම තුළින් නියම අපරාධකරුවන් අනාවරණය නොවීම සහ එම නියම අපරාධකරුවන්ට පාස්කු ප්‍රහාරය දක්වා අපරාධ සිදුකිරීමට අවකාශය සැලසීමට සහ මෙම ප්‍රහාරය මෙහෙයවීමට සම්බන්ධිත පුද්ගලයින් පිළිබඳ තොරතුරු වසන් කිරීම සම්බන්ධයෙන් 2025.04.08 දින රාජ්‍ය බුද්ධි සේවයේ කරදියනාරු දිසා බුද්ධි කාර්යාංශයට අනුයුක්ත පොලිස් කොස්තාපල්වරයෙකු වශයෙන් කටයුතු කරන ලද යාසින්බාවා ජෙගිල් පාස් අත්අඩංගුවට ගෙන ත්‍රස්තවාදය වැළැක්වීමේ පනත යටතේ රැඳවුම් භාරයට පත්කර ඇති බව දැනුම් දෙයි.
ඉන්පසු 2025.04.22 අධිකරණයට කරුණු වාර්තා කරමින් දැනුම් දී ඇත්තේ එම විමර්ශනයට අදාළව අධිකරණයේ පෙනී සිට ස්වෙච්ඡාවෙන් ප්‍රකාශයක් ලබාාදීමට කලීල් මොහොමඩ් ඉර්පාන් නැමැත්තෙකු ඉදිරිපත් වී ඇති බව හා ඒ සඳහා දිනයක් හා වේලාවක් වෙන්කර ලබාදෙන ලෙසයි.

2025.04.29 දින වැඩිදුර වාර්තාවක් ඉදිරිපත් කරමින් සඳහන් කරන්නේ, වව්නතිව් පොලිස් මාර්ග බාධකයේ රාජකාරියේ නිතරතව සිටි පොලිස් නිලධාරීන් දෙදෙනෙකුට තියුණ ආයුධවලින් පහරදී ස්වයංක්‍රිය ගිනි අවිවලින් වෙඩි තබා ඝාතනය කිරීමේ අපරාධය සහරාන් හෂීම් ඇතුළු ඉස්ලාම් අන්තවාදීන් විසින් සිදුකරන ලද අපරාධයක් බවට ශ්‍රී ලංකා යුද්ධ හමුදාවේ 03 වන සන්නද්ධ බුද්ධි බලකායේ මඩකලපුව බුද්ධි හා ආරක්ෂක සමූහය වෙත තොරතුරු ලබාදී ඇති බවටත්, ඊට අමතරව සහරාන් හෂීම් ඇතුළු ඉස්ලාම් අන්තවාදීන්ගේ ක්‍රියාකාරකම් සම්බන්ධයෙන් පාස්කු ප්‍රහාරයට පෙර විවිධ අවස්ථාවන්වලදී ශ්‍රී ලංකා යුද්ධ හමුදාවේ 03 වන සන්නද්ධ බුද්ධි බලකායේ මඩකලපුව බුද්ධි හා ආරක්ෂක සමූහය වෙත තොරතුරු ලබාදුන් බවටත්, එම තොරතුරු සම්බන්ධයෙන් යුද්ධ හමුදාවේ 03 වන සන්නද්ධ බුද්ධි බලකායේ මඩකලපුව බුද්ධි හා ආරක්ෂක සමූහයේ අණදෙන නිලධාරි ඇතුළු බුද්ධි නිලධාරීන් හා සාමාජිකයන් විසින් නිසි පියවර නොගත් බවටත්, 2014 වර්ෂයේ සිට ලබාදුන් බුද්ධි තොරතුරු ඇතුළත් වාර්තා මඩකලපුව බුද්ධි හා ආරක්ෂක සමූහයේ පවත්වාගෙන ගිය ගොනුවෙන් මේ වනවිට ඉවත්කර ඇති බවටත්, එම තොරතුරු අනුව යුද්ධ හමුදා බුද්ධි අංශ ක්‍රියා කළේ නම් පාස්කු ප්‍රහාරය වළක්වා ගැනීමට හැකියාව තිබූ බවටත් මොහොමඩ් කලීල් මොහොම්මදු මස්ෆි නොහොත් නසීර් යන තොරතුරුකරු විසින් එම විමර්ශනයට අදාළව ප්‍රකාශයක් ලබාදී ඇති බවයි.

ඒ අනුව විමර්ශන කටයුතු සිදුකරමින් ශ්‍රී ලංකා යුද්ධ හමුදාවේ 03 වන සන්නද්ධ බුද්ධි බලකායේ එවකට අණදෙන නිලධාරි වශයෙන් කටයුතු කළ කර්නල් කැළුම් සිරිපති මද්දුමගේ හා මඩකලපුව බුද්ධි හා ආරක්ෂක සමූහයේ සමූහ නායක ලෙස කටයුතු කළ මේජර් කොහිලමුල්ල ආරච්චිගේ චාමර ප්‍රසාද් කමලවර්ණ, බුද්ධි නිලධාරි කපිතාන් පොල්වත්තේ ලේකම්ලාගේ සුමිත් නිශාන්ත දිසානායක හා යුද්ධ හමුදා බුද්ධි අංශ සෙසු නිලයන් වන සැරයන් සිරිවර්ධනගේ ගයාන් ප්‍රසාද් සිරිවර්ධන, කෝප්‍රල් මුහන්දිරම් මුදියන්සේලාගේ ගුණසේකර යන අයගෙන් ප්‍රකාශ සටහන් කර ගැනීම සිදුකර අපරාාධ පරීක්ෂණ දෙපාර්තමේන්තුව සිදුකර ඇත.

ඔවුන්ගේ ප්‍රකාශ අනුව ඔවුන් ප්‍රකාශ කර ඇත්තේ මොහොමඩ් කලීල් මොහොම්මදු මස්ෆි නොහොත් නසීර් නැමැති පුද්ගලයා 2019 පෙබරවාරි මාසයේ තොරතුරුකරුවකු ලෙස බඳවා ගත් බවත්, ඔහු විසින් සහරාන් හෂීම් පිළිබඳව තොරතුරු ලබාදීම් සිදුකරන ලද්දේ 2019 අප්‍රේල් මාසයේ මැද භාගයේ සිට බවටත්ය.

එහෙත් තොරතුරුකරු විසින් ලබාදුන් ප්‍රකාශය අනුව වව්නතිව් පොලිස් නිලධාරීන් දෙදෙනා ඝාතනය කිරීම සහරාන් හෂීම් ඇතුළු ඉස්ලාම් අන්තවාදීන් විසින් සිදුකළ බවට එම සිද්ධිය වූ දිනයේදීම වාචිකවත්, එයින් දින 03ක් ඇතුළත ලිඛිතවත් තොරතුරු ලබාදුන් බවට අනාවරණය වී ඇත.

විමර්ශනයට අදාළව ශ්‍රී ලංකා යුද්ධ හමුදාවේ බුද්ධි අධ්‍යක්ෂ මණ්ඩලය භාරයේ ඇති මොහොමඩ් කලීල් මොහොම්මදු මස්ෆි නොහොත් නසීර් විසින් ලබාදුන් තොරතුරු ඇතුළත් තොරතුරු ගොනුවේ පිටපතක් ගෙන්වාගෙන පරික්ෂා කිරීමේදී එම පිටපත් ගොනුවට අනුව 2015 වර්ෂයේදීද එම තොරතුරුකරු විසින් ශ්‍රී ලංකා යුද්ධ හමුදාවේ 03 වන සන්නද්ධ බුද්ධි බලකාය වෙත තොරතුරු ලබාදී ඇති බව අනාවරණය වූ බව අධිකරණයට කළ වාර්තා කිරීම්වල සඳහන් වේ.

ඒ අනුව මොහොමඩ් කලීල් මොහොමම්දු මස්ෆි නොහොත් නසීර් නැමැති තොරතුරුකරු විසින් සහරාන් හෂීම් ඇතුළු ඉස්ලාම් අන්තවාදීන්ගේ ක්‍රියාකාරකම් සම්බන්ධයෙන් දීර්ඝ කාලයක සිට 03 වන සන්නද්ධ බුද්ධි බලකාය වෙත ඉතා වැදගත් තොරතුරු ලබා දුන්නා යැයි සඳහන් කිරීමත්, එම තොරතුරු ලබාගත් 03 වන සන්නද්ධ බුද්ධි බලකායේ අණදෙන නිලධාරි, බුද්ධි නිලධාරි හා අනෙකුත් සෙසු නිලයන් එම තොරතුරු සම්බන්ධයෙන් නිසි පියවර ගෙන නොමැති බවටත්, එම තොරතුරු සම්බන්ධයෙන් ක්‍රියාත්මක වූවා නම් පාස්කු ප්‍රහාරය වැළකෙන බවටත්, මොහාමඩ් කලීල් මොහාම්මදු මස්ෆි නොහොත් නසීර් විසින් කර ඇති ප්‍රකාාශයේ සත්‍යතාවයක් ඇති බව නිරීක්ෂණය වන බවත් අපරාධ පරීක්ෂණ දෙපාර්තමේන්තුව අධිකරණයට කරුණු වාර්තා කරමින් වැඩිදුරටත් සඳහන් කර ඇත.

තොරතුරුකරුගේ ප්‍රකාශය අනුව එම තොරතුරු වාර්තා අදාළ ගොනුවෙන් ඉවත් කිරීමට කටයුතු කර ඇති බවටත්, එම තොරතුරු වසන් කරමින් සහරාන් හෂීම් ඇතුළු ඉස්ලාම් අන්තවාදීන්ට පාස්කු ප්‍රහාරය දක්වා අපරාධ සිදුකිරීමට අවකාශය සැලසෙන ආකාරයෙන් එම හමුදා බුද්ධි අංශ නිලධාරීන් හා සෙසු නිලයන් ක්‍රියාකර ඇති බවටත්, ඒ අනුව 03 වන සන්නද්ධ බුද්ධි බලකායේ එවකට අණදෙන නිලධාරියා, මඩකලපුව බුද්ධි හා ආරක්ෂක සමූහයේ එවකට සමූහ නායකයා වශයෙන් කටයුතු කළ නිලධාරියා, මඩකලපුව බුද්ධි හා ආරක්ෂක අංශයේ බුද්ධි නිලධාරියා හා තොරතුරුකරු මෙහෙයවූ මඩකලපුව බුද්ධි හා ආරක්ෂක සමූහයේ සෙසු නිලයන් විසින් පාස්කු ප්‍රහාරයට පූර්වයෙන් එවැන්නක් සිදුවිය හැකි බවට සහරාන් හෂීම් ඇතුළු ඉස්ලාම් අන්තවාදීන්ගේ ක්‍රියාකාරකම් පිළිබඳව තමන් වෙත ලැබී තිබූ තොරතුරු සම්බන්ධයෙන් නිසි පරිදි ක්‍රියා නොකිරීම, තොරතුරු වසන් කිරීම හා ඒ තුළින් අපරාධකරුවන්ට පාස්කු ප්‍රහාරය දක්වා අපරාධ සිදුකිරීමට අවකාශ සැලසීම යන කරුණු පිළිබඳව වැඩිදුරටත් විමර්ශන සිදුකරගෙන යන බව අධිකරණයට දැනුම් දී ඇත.

ඒ අනුව ඉහත සිද්ධිමය කරුණු දැනසිටි බවට විමර්ශනයේදී අනාවරණය වී ඇති පුද්ගලයින් එම විමර්ශන මඟහරිමින් විදේශගතවීමේ සූදානමක් පවතින හෙයින් හා විමර්ශනයට බරපතළ අගතියක් ඇතිවිය හැකි හෙයින් විදේශ ගමන් තහනමක් පහත සඳහන් හමුදා සාමාජිකයන් සම්බන්ධයෙන් ඉල්ලා ඇත.

ඒ මුහන්දිරම් මුදියන්සේලාගේ ගුණසේකර, සිරිවර්ධනගේ ගයාන් ප්‍රසාද් සිරිවර්ධන, කැළුම් සිරිපති මද්දුමගේ, කොහිලමුල්ල ආරච්චිගේ චාමර ප්‍රසාද් කමලවර්ණ, පොල්වත්තේ ලේකම්ගේ සුමිත් නිශාන්ත දිසානායක යන අය සම්බන්ධයෙනි. අධිකරණය ඔවුන් විදේශගතවීම වළක්වමින් නියෝගයක් නිකුත් කර ඇත.

එමෙන්ම සිදුකරගෙන යන විමර්ශනවලට අදාළව පරිශීලනය කිරීම සඳහා ශ්‍රී ලංකා යුද්ධ හමුදාවේ 03 වන සන්නද්ධ බුද්ධි බලකායේ හා මඩකලපුව බුද්ධි සහ ආරක්ෂක සමූහය සහ බුද්ධි අධ්‍යක්ෂ මණ්ඩලය භාරයේ ඇති මෙහොමඩ් කලීල් මොහාම්මදු මස්ෆි නොහොත් නසීර් යන තොරතුරුකරු විසින් ලබාදුන් සියළු තොරතුරු ඇතුළත් මුල් ගොනු ලබා ගැනීමට අධිකරණයෙන් අවසර ඉල්ලා ඇත. එයටද අධිකරණය නියෝගයක් ලබාදී ඇත.

එමෙන්ම වැඩිදුර විමර්ශන සිදුකර වාර්තා කරන තෙක් එම නඩුවේ ඇති රහස්‍යභාවය හා සංවේදී භාවය සැලකිල්ලට ගෙන නඩු ගොනුව මහේස්ත්‍රාත්වරියගේ පෞද්ගලික භාරයේ තබා ගන්නා ලෙස ඉල්ලීමක්ද කර ඇත.

වව්නතිව් පොලිස් නිලධාරීන් දෙදෙනාගේ ඝාතනය සම්බන්ධයෙන් විමර්ශන වැඩිදුරටත් සිදුකරමින් පොලිස් නිල සුනඛ කොට්ඨාශයට අනුයුක්තව රාජකාරි කළ ගයාන් චන්දන විජේනායක නැමැති පොලිස් සැරයන්වරයාගෙන් ප්‍රකාශයක් ලබාගෙන ඇති අතර එහිදී ඔහු කර ඇත්තේ පොලිස් නිලධාරීන් දෙදෙනෙකු ඝාතනය වීමේ සිද්ධිය වූ අපරාධ ස්ථානයට එදින දහවල් 12ට පමණ බෝරිස් නැමැති නිල සුනඛයාද රැගෙන පරීක්ෂණ කටයුතු සඳහා ගිය බවත්, ඒ වනවිට අපරාධ ස්ථානයෙන් මළ සිරුරු ඉවත්කොට සොකෝ නිලධාරීන් විසින් නඩු භාණ්ඩ ඉවත්කොට තිබූ බැවින් ආගන්තුක යමක් අපරාධ ස්ථානයේ නොතිබූ බැවින් විමර්ශන සඳහා නිල සුනඛයාගේ සහාය ලබා ගැනීමට නොහැකි වූ බවයි.

වව්නතිව් පොලිස් නිලධාරීන් දෙදෙනා ඝාතනය කිරීමේ සිදුවීම හිටපු එල්ටීටීඊ සාමාජිකයන් විසින් සිදුකළ අපරාධයක් බවට සැකපිට කරෙයක්කන්තිව් කන්නන්කුඩා පදිංචිව සිටි කදිරගාමතම්බි රාසකුමාර් නොහොත් අජන්තන් එම අවස්ථාවෙදී අත්අඩංගුවට ගෙන තිබේ. ඔහුව අත්අඩංගුවට ගෙන ඇති බව දැන ගැනීමෙන් පසු ඔහුගේ බිරිඳ පොලීසියට ගොස් ඇති අතර අජන්තන් සතු ජැකට්ටුව ගෙදර ගෙන ගොස් ඇත. ඇය නිවසේ නැති අවස්ථාවේ පොලිස් නිලධාරීන් පිරිසක් නිවසට පැමිණි බව ඇයගේ ඥාතියකු පවසූ බව, ඇය නිවසට යන විට පොලිස් නිලධාරීන් මිදුලේ සිටි බව හා පසු අවස්ථාවක පොලිස් නිලධාරීන් එහි පැමිණි බව අජන්තන්ගේ බිරිඳ ප්‍රකාශයක් ලබාදෙමින් කියා ඇත.

එම අපරාධය පොලිස් අත්අඩංගුවේ සිටි හිටපු එල්ටීටීඊ සාමාජිකයකු වන අජන්තන් විසින් සිදුකළ බවට ඒත්තු ගන්වමින් ඔහු වෙත එම අපරාධයේ වගකීම පැවරීමට සලස්වමින් එම සැකකරුගේ නිවසේ තිබූ කබායක් (යතුරු පැදි ජැකට්ටුවක්) කන්නන්කුඩා ප්‍රදේශයේ බෝක්කුවක් යටට රැගෙනවිත් දමා ඇති බවටත්, එම කබායේ ඉව ඔස්සේ පොලිස් නිල සුනඛයා අජන්තන් නැමැති සැකකරුගේ නිවසට ගමන් කිරීම තුළින් පොලිස් නිලධාරීන් දෙදෙනා ඝාතනය කළ අපරාධය ඒ වනවිට අත්අඩංගුවේ සිටි අජන්තන් යන සැකකරු විසින්ම සිදුකර ඇති බවට වැඩිදුරටත් ඒත්තු ගැන්වීමේ අරමුණ ඇතිව සිදුකර ඇති බවටත්, ඒ තුළින් එම අපරාධයට සම්බන්ධිත නියම සැකකරුවන් වන සහරාන් හෂීම් ඇතුළු ඉස්ලාම් අන්තවාදී කල්ලිය කෙරෙහි විමර්ශන නිලධාරීන්ගේ සැකය එල්ලවීමේ අවධානම බැහැරවී විමර්ශන වෙනස් කිරීම තුළින් සහරාන් ඇතුළු ඉස්ලාම් අන්තවාදී කල්ලියට පාස්කු ප්‍රහාරය දක්වා අපරාධ සිදුකිරීමට අවකාශය සැලසී ඇති බව අනාවරණය වන බවටත් අධිකරණයට කරුණු වාර්තා කර ඇත.

සැකකරුගේ කබායක් කන්නන්කුඩා බෝක්කුවක් යට ඇති බවට තොරතුරු හෙළිකරන ලද නිලධාරියා රාජ්‍ය බුද්ධි සේවයේ කරදියනාරු දිසා බුද්ධි කාර්යංශයට අනුයුක්තව සිටි පොලිස් කොස්තාපල් යාසීන් බාවා ජෙගීල් පාස් ලෙස අනාවරණය වී ඇත. ඔහු කියා ඇත්තේ එම තොරතුරු ලබාදෙන ලද්දේ වට්ස්ඇප් හෝ ඉමෝ නැමැති අන්තර්ජාල සන්නිවේදන ක්‍රම ඔස්සේ බවයි. තොරතුරු දුන් දූරකතන අංක හෝ පුද්ගලයන් පිළිබඳ විස්තර නොදන්නා බවත් එම තොරතුරු සම්බන්ධයෙන් තොරතුරු පොතෙහි හෝ පොලිස් සටහන් පොතෙහි සටහන් යෙදීමක් සිදුනොකළ බවත් ඔහු දිගින් දිගටම ප්‍රකාශ කර ඇත.

එමෙන්ම පොලිස් කොස්තාපල් යාසින් බාවා ජෙගිල් පාස්ගෙන් ප්‍රශ්න කිරීමේදී හෙළිවූ කරුණු ඔහුගේ ජ්‍යෙෂ්ඨ නිලධාරියා වන පොලිස් පරීක්ෂක විජේනායක විසින් යොදා ඇති සටහන් සමග පරස්පර බව නිරීක්ෂණය වී ඇත. ප්‍රශ්නගත කබාය එම බෝක්කුව යට තිබීම එම නිලධාරීන් දෙදෙනාම මුල්වරට දුටු බවට එම සටහන් අනුව නිරීක්ෂණය වී ඇත. එමෙන්ම පොලිස් කොස්තාපල් ජෙගීල් පාස්ට ලැබුන දූරකතන ඇමතුමක් අනුව එම කබාය කන්නන්කුඩා බෝක්කුවක් යට ඇති බවට දැනුම් දීමක් සිදුකළ බවක් පොලිස් පරීක්ෂක විජේනායකගේ සටහනේ ඇතුළත් වී තිබී නැත.

අපරාධ පරීක්ෂණ දෙපාර්තමේන්තුව ඒ සම්බන්ධයෙන් අධිකරණයට වාර්තා කරන්නේ පොලිස් කොස්තාපල් ජෙගිල් පාස් නාදුනන පුද්ගලයකු විසින් ඔහුගේ වට්ස්ඇප් හෝ ඉමෝ නැමැති අන්තර්ජාල යෙදවුම මගින් ඇමතුමක් ලබාගෙන එම තොරතුර ලබාදුන් බවට කරන ප්‍රකාශ කිරීම සත්‍ය කරුණු වසන් කිරීමට කටයුතු කරන බවට නිරීක්ෂණය වන බවයි. ඒ අනුව ජෙගිල් පාස් සම්බන්ධයෙන් රැඳවුම් නියෝග ඉල්ලා ඇති අතර අධිකරණය ඊට අවසර ලබාදී තිබේ.

ජෙගිල් පාස් භාවිත කර ඇති ජංගම දූරකතන සම්බන්ධයෙන් වාර්තා ලබාගෙන ඇති අතර එම ජංගම දූරකනවලට යොදා ඇති සිම්කාඩ්පත් අතරින් කිහිපයක් වෙනත් පුද්ගලයින්ගේ නමින් ලියාපදිංචි වී ඇති බව අනාවරණය වී ඇත. සැකකරු එම සිම්කාඩ් දීර්ඝ කාලයක් තිස්සේ භාවිත කර ඇති බවත්, එහෙත් සිම්කාඩ් හිමි පුද්ගලයින් කවුරුන්ද යන්න නොදන්නා බවත් ප්‍රකාශ කර ඇත. එමෙන්ම එම සිම්කාඩ්වල ලියාපදිංචි හිමිකරුවන්ගෙන් ගත් ප්‍රකාශ අනුව ඔවුන් කියා ඇත්තේ යාසින් බාවා ජෙගිල් පාස් යන පුද්ගලයකු ඔවුන් නොහඳුනන බව හා ඔවුන් එවැනි පුද්ගලයකුට සිම්කාඩ් ලබාගැනීමට කටයුතු සිදුකර දී නොමැති බවයි.
2025.07.07 දින සිදුකර තිබූ වැඩිදුර කරුණු වාර්තා කිරීමකදී හච් ටෙලිකොමියුනිකේෂන් ලංකා පුද්ගලික සමාගමේ ප්‍රධාන විධායක නිලධාරි වෙත අධිකරණ නියෝගයක්ද නිකුත් කර ඇත. ඒ පාස්කු ප්‍රහාරය සහ පාස්කු ප්‍රහාරයට පෙර සිදුකරන ලද අපරාධ සහ පාස්කු ප්‍රහාරයෙන් පසු සිදුකරන ලද ප්‍රහාර පිළිබඳව හා එම අපරාධ සිදුකිරීම සඳහා සූක්ෂමව ඉස්ලාම් අන්තවාදී කල්ලිය වෙත ආධාර අනුබල දෙමින් කටයුතු කරන ලද පුද්ගලයින් එම අපරාධමය ක්‍රියාකාරකම් සිදුකිරීමට රහසිගත සන්නිවේදන කටයුතු සඳහා සිම්කාඩ්පත් සක්‍රිය කිරීමේදී යොදාගත් ෂඪඍ අංකයකට අදාළ තොරතුරු ලබාදෙන ලෙස ඉල්ලමින්ය. ඒ සඳහාද අධිකරණ නියෝග ලැබී තිබේ.

ඉහත සඳහන් කරණ ලද අපරාධ පරීක්ෂණ දෙපාර්තමේන්තුව පාස්කු ප්‍රහාරය සම්බන්ධයෙන් අධිකරණයට වාර්තා කර ඇති තොරතුරු හා අධිකරණය ලබාදී ඇති නියෝග අනුව පාස්කු ප්‍රහාරයේ සඟවා ඇති රහස් රැසක් ඉදිරියේදී හෙළිවිය හැකි බබවට අනුමාන කළ හැකිය.