බන්ධනාගාරගතවී සිටින ගලගොඩඅත්තේ ඥානසාර හිමියන් සම්බන්ධයෙන් දැනට පැන නැගී ඇති තත්වය අනුව, සිරගතව සිටින හිමිනමක අධිකරණයට ඉදිරිපත් කරන විට හෝ මහජන අවකාශයකට ගෙනෙන විට හෝ ඔහුට සිවුර ඇඳගෙන සිටීමට අවසර දීමට අවශ්‍ය නීති සංශෝධනය වහාම සිදුවනු ඇතැ’යි වාර්තා වෙයි.
ඒ පිළිබඳව සොයාබලා අවශ්‍ය නිර්දේශ ඉදිරිපත් කිරීමට පත්කරන ලද කමිටුව, ලහි ලහියේ ඔක්තෝබර් 8 වැනිදා පළමුවරට රැස්වුණු අතර, නිර්දේශ ඉදිරිපත්කිරීමට කමිටුවට ලබා දී ඇති මුළු කාලය සති දෙකකි.
පසුගියදා බන්ධනාගාරගතව සිටින ඥානසාර හිමියන් අධිකරණයට ඉදිරිපත් කරන විට සිවිල් ඇඳුමෙන් සැරසී සිටීම සම්බන්ධයෙන් විවිධ ක්ෂේත්‍රවලින් විරෝධයක් මතු වූ අතර, ඊට විරුද්ධව මහනුවර සිට කොළඹ දක්වා පාගමනක්ද ආරම්භ කෙරිණි.
සිදුවෙමින් පවතින අවුල සම්බන්ධයෙන් ජනාධිපතිවරයාද කැළඹීමට පත්ව සිටින බව ජනාධිපති කාර්යාලයේ අභ්‍යන්තර ආරංචිමාර්ගවලින් දැනගන්නට ලැබිණ.
මේ අතර, මේ ගැන සාකච්ඡා කිරීම සඳහා ජනාධිපතිවරයා තමා විසින් විශේෂයෙන් තෝරාගන්නා ලද නායක භික්ෂූන් වහන්සේලා කිහිප දෙනකුට හදිසියේම ජනාධිපති කාර්යාලයට ඔක්තෝබර් 8 වැනිදා ආරාධනා කළේය. එසේ පැමිණි එක් හිමිනමක් වුණේ, නාරම්පනාවේ ආනන්ද හිමියන්ය. එහිමියන් පසුගියදා ජනාධිපතිවරයා විසින් කැලණිය විශ්විද්‍යාලයේ කුලපතිධුරයට පත්කරන ලද අතර, සාමාන්‍යයෙන් කුලපතිධුරයට පත්කෙරෙන්නේ ඒ ඒ ජනාධිපතිවරයාගේ විශ්වාසය දිනාගන්නා කෙනකු වීම වැදගත් කාරණයකි.
ජනාධිපතිවරයා මේ සාකච්ඡාව සඳහා තෝරාගත් තමන්ට හිතවත් භික්ෂූන් කිහිප දෙනකුට පමණක් ආරාධනා කිරීමත්, ඔවුන් ජනාධිපතිවරයාට පැවසු දේ ගැන කිසිම සඳහනක් මාධ්‍යයට එළිදරව් නොවීමත්, ජනාධිපතිවරයා එම සාකච්ඡාවේදී පෙර සකස්කරන ලද කතාවක් සැලසුම් සහගතව ඉදිරිපත් කර එය පමණක් මාධ්‍ය මගින් ප්‍රචාරය කිරීමත්, ඥානසාර හිමි අයත් වන කෝට්ටේ කල්‍යාණ සාමග්‍රී ධර්ම මහා සංඝ සභාවට මේ සාකච්ඡාව සඳහා ආරාධනා නොකිරීමත් පිළිබඳව විවිධ විවේචන මතුවිය. අවසානයේ කෝට්ටේ කල්‍යාණ සාමග්‍රී ධර්ම මහා සංඝ සභාවේ ලේඛකාධිකාරී හා අනුනායක හිමිවරු රැස්ව, මේ පිළිබඳව සාකච්ඡාවක් සඳහා කෝට්ටේ රජ මහ විහාරයට පැමිණෙන ලෙස ජනාධිපතිවරයාට ආරාධනාවක්ද කළහ.
කෙසේ වෙතත්, නායක හිමිවරුන් සමග පැවැති සාකච්ඡාවේදී බන්ධනාගාර රීති අදට අදාළ වන සේ වෙනස් කිරීමේ වැදගත්කම ජනාධිපතිවරයා පිළිගත් අතර, ඒ සඳහා අවශ්‍ය වන නිර්දේශ ඉදිරිපත් කිරීම සඳහා කමිටුවත් පත්කරන බවටද හිමිවරුන්ට පොරොන්දු විය.
පවතින නීතිය වන්නේ වරදකරු වී බන්ධනාගාරගතව සිටින භික්ෂුවක් අධිකරණයට ඉදිරිපත් කිරීමේදී සිවිල් ඇඳුමෙන් ඉදිරිපත් කළ යුතුය යන්න වන අතර, ඒ අනුව ජනාධිපතිවරයා එම සාකච්ඡාවේදී පොරොන්දු වූයේ එම නීතිය වෙනස් කරන බවටය.
ඒ අනුව, භික්ෂුවක අධිකරණයට ඉදිරිපත් කරන විට සිවුර හැඳසිටිය හැකි වන පරිදි නීතිය වෙනස්කිරීම, එකම පියවර වනු ඇත.
එය එලෙස වෙනස් වුවහොත්, එම නීතිය වෙනස් කෙරෙන්නේ ගලගොඩඅත්තේ ඥානසාර හිමියන් කරණකොටගෙනය.
එය හැඳින්විය හැක්කේ එක් පුද්ගලයකු වෙනුවෙන් නීතිය වෙනස් කරන්නටෙ ජාතික ජන බලවේග ආණ්ඩුව ගත් තවත් උත්සාහයක් හැටියටය. මීට පෙර මේ සඳහා තිබෙන ආසන්නතම උදාහරණය වන්නේ අගවිනිසුරු ප්‍රීති පද්මන් සූරසේනගේ ධුරකාලය වසර දෙකකින් දීර්ඝ කිරීම සඳහා ගෙනෙන ලද 22 වැනි ආණ්ඩුක්‍රම ව්‍යවස්ථා සංශෝධනයයි.
කෙසේ වෙතත් මේ අවස්ථා දෙකම සැලකිය හැක්කේ, ඔක්තෝබර් 8 වැනිදා හිමිවරුන් සමග සාකච්ඡාවේදී ජනාධිපතිවරයා පැවැත්වු කතාවේදී අවධාරණය කළ පරිදි, පුද්ගලයකුට අනුව නීතිය වෙනස්විය යුතුයැයි තමා සිතන්නේ නැතිය යන්නට පරස්පර අවස්ථා හැටියටයි.
