වෛද්‍ය ප්‍රතිකාර ලබා ගැනීමට සිංගප්පූරුව බලා පිටත්ව ගොස් සිටි හිටපු ජනාධිපති මහින්ද රාජපක්ෂ මහතාගේ බිරිඳ වන ශිරන්ති රාජපක්ෂ මහත්මිය සැප්තැම්බර් 06 දින අලුයම පෙර යළි දිවයිනට පැමිණ තිබේ.
ඇය මැලේසියාවේ සිට පැමිණි ගුවන් යානයකින් ශ්‍රී ලංකාවට පැමිණ ඇති අතර ශිරන්ති රාජපක්ෂ මහත්මිය වෛද්‍ය ප්‍රතිකාර සඳහා පසුගිය සැප්තැම්බර් 16 වැනිදා අලුයම සිංගප්පූරුව බලා පිටත්ව ගොස් තිබිණි.
ඊට පෙර සැප්තැම්බර් 15 වැනිදා අසනීප තත්ත්වයක් හේතුවෙන් ඇය කොළඹ පෞද්ගලික රෝහලකට ඇතුළත් කර තිබූ අතර, පසුව රෝහලේ සිට සෘජුවම ගුවන්තොටුපොළ වෙත රැගෙන ගිය බව වාර්තා පළ විය.
පොලිස් මූල්‍ය අපරාධ විමර්ශන කොට්ඨාසය (FCID) විසින් කැඳවා තිබියදී දැනුවත්ව රටින් පිටව ගිය බවට පළ වූ වාර්තා රාජපක්ෂ පවුල විසින් ප්‍රතික්ෂේප කර තිබේ. ගුවන්තොටුපොළට පැමිණීමට පෙර පොලිස් මූල්‍ය අපරාධ විමර්ශන කොට්ඨාසය විසින් තමන්ට දැනුම්දීමක් සිදුකර නොතිබූ බව ඔවුන් සඳහන් කර ඇත.
මේ අතර, ‘සිරිලිය සවිය’ සංවිධානයේ මූල්‍ය කටයුතු සම්බන්ධයෙන් සිදුකෙරෙන විමර්ශනයකට අදාළව තමන් අත්අඩංගුවට ගැනීම වළක්වන ලෙස ඉල්ලා ශිරන්ති රාජපක්ෂ මහත්මිය වෙනුවෙන් ඇයගේ නීතිඥවරුන් ඊයේ (5) මාලිගාකන්ද මහේස්ත්‍රාත් අධිකරණය හමුවේ අපේක්ෂිත ඇප ඉල්ලුම්පතක්ද ගොනු කර තිබිණි.
