ලොතරැයි මණ්ඩලයට බඳවාගත් තිදෙනෙකු දේශපාලන කටයුතුවලට යොදාගත් බවට චෝදනා — රුපියල් ලක්ෂ 37කට අධික පාඩුවක් බව කොමිසම කියයි
දූෂණ චෝදනාවක් සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව විසින් අත්අඩංගුවට ගනු ලැබූ පාර්ලිමේන්තු මන්ත්රී සහ හිටපු අමාත්ය රවී කරුණානායක මහතා රුපියල් ලක්ෂ 10 බැගින් වූ ශරීර ඇප දෙකක් මත මුදාහැරීමට කොළඹ අංක 02 අතිරේක මහේස්ත්රාත් ලියාන් වරුසවිතාන මහතා අද (31) නියෝග කර තිබිණි.
ඇප නියම කිරීමේදී අධිකරණය විසින් රවී කරුණානායක මහතාට විදේශගත වීමේ තහනමක්ද පනවා තිබුණු අතර නඩුව නොවැම්බර් 03 වැනිදා යළි කැඳවීමට නියමිතය.
රවී කරුණානායක මහතාට එරෙහිව මෙම විමර්ශනය සිදුකරනු ලබන්නේ ඔහු මුදල් අමාත්යවරයා ලෙස කටයුතු කළ සමයේ ජාතික ලොතරැයි මණ්ඩලයේ අරමුදල් භාවිත කරමින් පුද්ගලයන් තිදෙනෙකු බඳවාගෙන ඔවුන් එම මණ්ඩලයේ රාජකාරි සඳහා යොදවා නොගෙන තම පෞද්ගලික කාර්ය මණ්ඩලයේ සේවයට යොදාගත් බවට එල්ල වී ඇති චෝදනාවක් සම්බන්ධයෙනි.
විමර්ශන නිලධාරීන්ට අනුව රවී කරුණානායක මහතා 2015 ජනවාරි 12 වැනිදා සිට 2017 මැයි 22 වැනිදා දක්වා මුදල් අමාත්යවරයා ලෙස කටයුතු කර තිබේ. එම කාලසීමාවේදී එවක ජාතික ලොතරැයි මණ්ඩලයේ සභාපතිනිය ලෙස කටයුතු කළ ශ්යාමිලා පෙරේරා මහත්මිය සමඟ එක්ව පුද්ගලයන් තිදෙනෙකු කොන්ත්රාත් පදනම මත බඳවාගෙන ඇති බව විමර්ශන නිලධාරීන් අධිකරණයට දැනුම් දී ඇත.
මෙම සිද්ධිය සම්බන්ධයෙන් එවක ජාතික ලොතරැයි මණ්ඩලයේ සභාපතිනිය ලෙස කටයුතු කළ ශ්යාමිලා පෙරේරා මහත්මියද පසුගිය ජුනි 30 වැනිදා අල්ලස් කොමිසම විසින් අත්අඩංගුවට ගනු ලැබූ අතර පසුව ඇය ඇප මත මුදාහැර තිබිණි.
කොමිසමට නොපැමිණීම ගැන චෝදනා
අල්ලස් කොමිෂම වෙනුවෙන් අධිකරණය වෙත ඉදිරිපත් වූ විමර්ශන නිලධාරිනිය අධිකරණය හමුවේ කරුණු දක්වමින් පැවසුවේ රවී කරුණානායක මහතා අවස්ථා හතරකදී ප්රකාශයක් ලබාදීම සඳහා කැඳවා තිබුණද ඔහු එම අවස්ථාවල කොමිසම හමුවේ පෙනී නොසිටි බවයි. ඒ අනුව පසුගිය 29 වැනිදා රවී කරුණානායක මහතා සොයා අල්ලස් කොමිසමේ නිලධාරීන් පාර්ලිමේන්තු පාරේ පිහිටි ඔහුගේ නිවසට ගියද එම අවස්ථාවේදී ඔහු නිවසේ නොසිටි බවද අධිකරණයට දැනුම් දී ඇත.
අල්ලස් කොමිෂන් සභාවේ නිලධාරීන් කළ විමසීමේදී එහි සිටි පිරිස් කරුණානායක මහතා නුවරඑළිය ප්රදේශයේ සිටින බව සඳහන් කර තිබුණද විමර්ශන නිලධාරිනිය අධිකරණයට පවසා ඇත්තේ ඔහු එම අවස්ථාවේ හම්බන්තොට ප්රදේශයේ හෝටලයක සිටි බවට තොරතුරු අනාවරණය වූ බවය.
එමෙන්ම එදින මෙම සිද්ධියේ පළමු සැකකාරිය ලෙස නම් කර ඇති ශ්යාමිලා පෙරේරා මහත්මිය රවී කරුණානායක මහතාගේ බත්තරමුල්ල නිවසට පැමිණෙන ආකාරයද නිරීක්ෂණය වී තිබූ බව කොමිසම අධිකරණයට සඳහන් කළේය.
පැය තුනක ප්රකාශයෙන් පසු අත්අඩංගුවට
මෙවැනි පසුබිමක් යටතේ විමර්ශනයට අදාළව ප්රකාශයක් ලබාදීම සඳහා රවී කරුණානායක මහතා අගෝස්තු 31 වන දින (අද) පෙරවරු 8.15ට පමණ කොමිසම වෙත පැමිණ ඇති අතර පැය තුනකට ආසන්න කාලයක් ප්රකාශ සටහන් කරගැනීමෙන් අනතුරුව කොමිසමේ නිලධාරීන් විසින් ඔහු අත්අඩංගුවට ගෙන තිබිණි. පසුව සැකකාර රවී කරුණානායක මහතාව පස්වරුවේ කොළඹ අංක 02 අතිරේක මහේස්ත්රාත් ලියාන් වරුසවිතාන මහතා හමුවට ඉදිරිපත් කරනු ලැබීය.
මණ්ඩලයේ අරමුදලින් ලක්ෂ 37කට වැඩි පාඩුවක්
එහිදී අල්ලස් කොමිසම වෙනුවෙන් කරුණු දැක්වූ විමර්ශන නිලධාරිනිය සඳහන් කර තිබුණේ රවී කරුණානායක මහතා මුදල් අමාත්යවරයා ලෙස කටයුතු කළ සමයේ ජාතික ලොතරැයි මණ්ඩලයේ අරමුදල් භාවිත කරමින් මුදල් අමාත්යාංශයේ විශේෂ ව්යාපෘතියක් සඳහා යැයි සඳහන් කර සම්බන්ධීකරණ නිලධාරීන් දෙදෙනෙකු සහ කළමනාකරණ සහකාරවරයෙකු බඳවාගෙන ඇති බවය. එම පුද්ගලයන්ගෙන් කිහිපදෙනෙකු එක්සත් ජාතික පක්ෂයේ දේශපාලන කටයුතුවල නිරත වූ පුද්ගලයන් බවත් එක් අයෙකු දීර්ඝ කාලයක් එක්සත් ජාතික පක්ෂයේ ප්රාදේශීය දේශපාලනයේ නිරතව පළාත් පාලන මැතිවරණයකටද ඉදිරිපත් වූ අයෙකු බවත් කොමිසම අධිකරණයට දැනුම් දී ඇත. තවත් අයෙකු සිරිකොත එක්සත් ජාතික පක්ෂ මූලස්ථානයේ සේවය කළ පුද්ගලයෙකු බවත් විමර්ශන නිලධාරිනිය අධිකරණය හමුවේ සඳහන් කර ඇත.
අදාල පුද්ගලයන් ජාතික ලොතරැයි මණ්ඩලයේ අරමුදලින් වැටුප් ගෙවා තිබුණද එම ආයතනයට කිසිදු සේවයක් ලබාගෙන නොමැති බවත් ඔවුන් රවී කරුණානායක මහතාගේ පෞද්ගලික කාර්ය මණ්ඩලයට අනුයුක්ත කර දේශපාලන කටයුතු සඳහා යොදාගෙන ඇති බවට විමර්ශනවලදී අනාවරණය වී ඇති බවත් කොමිසමේ විමර්ශන නිලධාරිනිය පවසා ඇත.
මෙම ක්රියාව හේතුවෙන් රජයට සිදුවී ඇති බව කියන පාඩුව රුපියල් ලක්ෂ 37කට අධික බවද කොමිසම අධිකරණයට දැනුම් දී තිබිණි.
අල්ලස් පනත යටතේ චෝදනා
මෙම ක්රියාව දූෂණයක් ලෙස සැලකිය හැකි බවත් අල්ලස් පනතේ 70 වැනි වගන්තිය යටතේ වරදක් සිදුවී ඇති බවත් අල්ලස් කොමිසම සඳහන් කර තිබේ. කොමිසමේ කරුණු අනුව එම දූෂණ ක්රියාවට කුමන්ත්රණය කිරීම සහ අනුබලදීම සම්බන්ධයෙන් රවී කරුණානායක මහතා අත්අඩංගුවට ගෙන ඇත.
විමර්ශනයට සහය නොදක්වා අවස්ථා කිහිපයකදී කොමිසම මගහැරීම සම්බන්ධයෙන්ද ඔහුට එරෙහිව කරුණු ඉදිරිපත් කර ඇති අතර ඔහු ඇප මත මුදාහැරීමෙන් විමර්ශනයට බලපෑම් කිරීමට හෝ සාක්ෂිකරුවන්ට බලපෑම් කිරීමට හැකියාවක් ඇති බව පවසමින් ඔහු රක්ෂිත බන්ධනාගාරගත කරන ලෙස අල්ලස් කොමිසම අධිකරණයෙන් ඉල්ලා තිබිණි.
නීතිඥවරුන්ගෙන් ඇප ඉල්ලීමක්
රවී කරුණානායක මහතා වෙනුවෙන් පෙනී සිටි නීතිඥ අශෝක වීරසූරිය මහතා අධිකරණයට කරුණු දක්වමින් සඳහන් කර ඇත්තේ මෙම සිද්ධියේ ප්රධාන සැකකාරිය ලෙස නම් කර ඇති හිටපු ජාතික ලොතරැයි මණ්ඩල සභාපතිනි ශ්යාමිලා පෙරේරා මහත්මියට දැනටමත් ඇප ලබාදී ඇති බවය. තම සේවාදායකයා මීට පෙර අල්ලස් කොමිසම හමුවේ පෙනී නොසිටියේ ඔහු රජයේ මුදල් පිළිබඳ කාරක සභා කටයුතු සඳහා සහභාගී වී සිටීම ඇතුළු හේතු නිසා බවත් නීතිඥවරයා පෙන්වා දී ඇත.
තවද ඔහුගේ දියණියගේ විවාහ මංගල්යයට අදාළ කටයුතු හේතුවෙන් සැප්තැම්බර් 1 වැනිදායින් පසු දිනයක් ලබාදෙන ලෙස කොමිසමෙන් ලිඛිතව ඉල්ලා තිබූ බවද ඔහු අධිකරණයට සඳහන් කර ඇත.
සෞඛ්ය තත්ත්වය ගැනත් කරුණු
රවී කරුණානායක මහතාගේ සෞඛ්ය තත්ත්වය සම්බන්ධයෙන්ද ඔහු වෙනුවෙන් පෙනී සිටි නීතිඥවරයා අධිකරණයේ අවධානය යොමු කර තිබේ. ඔහුගේ හෘදයට ස්ටෙන්ට් පහක් යොදා ඇති බවත් තවත් ස්ටෙන්ට් එකක් යෙදීමට සිදුවීමේ අවදානමක් පවතින බවත් නීතිඥවරයා අධිකරණය හමුවේ කරුණු දක්වමින් පවසා ඇත.
එමෙන්ම කරුණානායක මහතා Sleep Apnea, Cellulitis සහ පාලනය කළ නොහැකි දියවැඩියා තත්ත්වයක් ඇතුළු රෝගී තත්ත්වයන් කිහිපයකින් පීඩා විඳින බවද නීතිඥවරයා ප්රකාශ කර ඇති අතර ඒ සම්බන්ධයෙන් සිංගප්පූරුවේ මවුන්ට් එළිසබෙත් රෝහලෙන් ලබාගත් වෛද්ය වාර්තාද අධිකරණයට ඉදිරිපත් කර ඇත. ඒ අනුව ඕනෑම කොන්දේසියක් යටතේ තම සේවාදායකයා ඇප මත මුදාහරින ලෙසත් නීතිඥවරයා අධිකරණයෙන් ඉල්ලා ඇත.
ලක්ෂ 10 බැගින් ඇප දෙකක්
දෙපාර්ශ්වය ඉදිරිපත් කළ කරුණු සලකා බැලීමෙන් අනතුරුව කොළඹ අතිරේක මහේස්ත්රාත් ලියාන් වරුසවිතාන මහතා රවී කරුණානායක මහතා රුපියල් ලක්ෂ 10 බැගින් වූ ශරීර ඇප දෙකක් මත මුදාහැරීමට නියෝග කර ඇති අතර එමෙන්ම ඔහුට විදේශගත වීමේ තහනමක්ද පනවා ඇත.
