ශ්‍රී ලංකා නීති විද්‍යාලයට 2026 වසර සඳහා සිසුන් බඳවාගැනීමට පැවැත්වෙන නීති ප්‍රවේශ පරීක්ෂණයට අයැදුම් කිරීමට අවස්ථාව නොලැබීමෙන්, තවත් අවුරුද්දක් ඒ සඳහා බලාසිටින්නට සිදුවන බව, පසුගියදා ප්‍රතිඵල නිකුත්වූ උසස් පෙළ සිසුහු කියති.
උසස් පෙළ ප්‍රතිඵල මත අයැදුම් කළ යුතු වන ශ්‍රී ලංකා නීති විද්‍යාලයේ නීති ප්‍රවේශ පරීක්ෂණය සඳහා අයැදුම් කිරීමට අවසාන දිනය වූයේ අප්‍රේල් මස 16 වැනිදාය. එහෙත් ඒ වන විට 2024 උසස් පෙළ විභාගයේ ප්‍රතිඵල නිකුත් වී නොතිබිණ. මේ තත්වය සැලකිල්ලට ගත් නීති විද්‍යාලය, උසස් පෙළ ප්‍රතිඵල බලාපොරොත්තු වන සිසුන්ටද අයැදුම් කළ හැකි ක්‍රමවේදයක් හඳුන්වා දුන්නේය. එහෙත්, ඒ ද අප්‍රේල් 16ට පෙරය.
බොහෝ හේතු මත සිසුන් තම උසස් අධ්‍යාපන ක්ෂේත්‍රය සාමාන්‍යයෙන් තීරණය කරන්නේ උසස් පෙළ ප්‍රතිඵල ලැබුණු පසුව වීම නිසා, ප්‍රතිඵලවලට අනුව නීති ක්ෂේත්‍රය තෝරාගන්නට බලාපොරොත්තු වන සිසුන්ට ඒ අවස්ථාව අහිමි විය. ඒ නිසා නීති විද්‍යාලයට අයැදුම් කිරීමට ඔවුන්ට තවත් වසරක් බලා හිඳීමට සිදුවේ. එය වර්තමාන තත්වයන්ට සාපේක්ෂව වසරක කාලයක් නිකරුණේ ගතවීමක් යැයි ඔවුහු කියති.
ඒ නිසා, බොහෝ සිසුන්ගේ ඉල්ලීම වන්නේ, ප්‍රවේශ පරීක්ෂණයට අයැදුම් කිරීමේ කාලය නැවත විවෘත කර ඊට අයැදුම් කිරීමට අවස්ථාවක් තමන්ට ලබාදෙන ලෙසයි.
