No menu items!
22.6 C
Sri Lanka
19 May,2024

මහජනයා පීඩාවට පත්කරමින් පාරවල් වසා මැයි දින සංදර්ශන පැවැත්වීම

Must read

දිනය අප්‍රේල් 25 බ්‍රහස්පතින්දාය. ස්ථානය කොළඹ මාලිගාවත්ත ප්‍රදීපා මාවතේ පීඩී සිරිසේන ක්‍රීඩාංගණය ඉදිරිපිටයි. එහි මාර්ගය දෙපසට බෙදා ඇති මැද බැමි තීරුවේ ඇති විදුලි පහන් කණුවල විදුලි බුබුළු ගැලවීම, විදුලි බුබුළු සවිකර ඇති මාර්ගය දෙපසට විහිදා ඇති කොටස් ගැලවීම, විදුලි පහන් කණු පොළවට සවිකර ඇති බිම වලක් ලෙස හාරා පාදා ගැනීම ආදිය සිදුවෙමින් පැවතුණි. අප්‍රේල් 26 සිකුරාදා වනවිට මේ ක්‍රියාදාමය අවසන් වූ අතර එම ස්ථානයේ පාර මැද තිබුණ විදුලි පහන් කණු තුනක් හෝ හතරක් ගලවා අවසන් කර තිබුණි.

මෙසේ ප්‍රධාන මාර්ගයක තිබූ විදුලි පහන් කණු කිහිපයක් ගලවා දැමුවේ ඇයි? එය ඔබට සිතාගත හැකිද? සිතාගැනීමට බැරි වනවාට සැකයක් නැත. එසේ මෙම විදුලි පහන් ගලවනු ලැබුයේ කොළඹ සිට කටුනායක අධිවේගී මාර්ගය, ඒ ඔස්සේ මීගමු පාර, කොළඹ නුවර මාර්ගය හා ලෝලෙවල් හෙවත් රත්නපුර යන ප්‍රධාන මාර්ගවලට වාහන ධාවනය කරන හා එම මාර්ගවල සිට කොළඹට වාහන ධාවනය කරන ප්‍රධාන මාර්ගයේයි. ඒ වෙන කිසිවක් නිසා නොව එක්සත් ජාතික පක්ෂයේ මැයි රැලිය පැවැත්වීම සඳහා එම ප්‍රධාන මාර්ගය වසා දමමින් වේදිකාව ඉදිකිරීම සඳහාය.

එම විදුලි පහන් කණු ගැලවීමෙන් පසු අප්‍රේල් 28 ඉරිදා සිට සිදුවූයේ කුමක්ද? ප්‍රදීපා මාවත දෙසට කොළඹ පංචිකාවත්තේ සිට වාහනවලට ඇතුල්වීම නවතා දැමීමය. එය අප්‍රේල් 29 වැනිදාද, අප්‍රේල් 30 වැනිදා පෙරවරුවේ ද එසේම විය. එම තත්වය අප්‍රේල් 30 වැනිදා සවස් වරුව වනවිට එම මාර්ගය සම්පූර්ණයෙන්ම වසා දැමූ තත්වයට පත්විය.

තවදුරටත් අප්‍රේල් 30 වැනිදා දක්නට ලැබුණේ, විශේෂයෙන්ම පංචිකාවත්ත පාරේ කිසිදු වාහනයක් නොවත්වන ලෙස පොලිසියෙන් දැන්වීම් පුවරු ප්‍රදර්ශනයට තබා තිබීමය. මේ එක්සත් ජාතික පක්ෂයේ මැයි දිනය පවත්වන පාර නොවේ. එසේම මැයි දිනය පවත්වන දිනයද නොවේ.

එසේම මැයි දිනය දා මාලිගාවත්ත ප්‍රදීපා පාරේ අයිඕසී ඉන්ධන පිරවුම් හල, කාර්ගිල්ස් වෙළඳ සැල ඇතුළු ආයතන වසා දමන ලෙස පොලිසිය දැනුම් දී තිබුණු අතර ඒවායේ රැඳී සිටින සේවකයින්ට මැයි දිනය දා එම ස්ථානවලින් එළියට නොඑන ලෙස දැනුම් දී තිබුණි. එම දිනයේ කෑමට අවශ්‍ය කළමනා ඊට පෙර සපයා ගන්නා ලෙස වැඩිදුරටත් දැනුම් දී තිබුණි. එම ප්‍රදීපා මාවතෙන් පිවිසුම ඇති නාගරික සංවර්ධන අධිකාරිය ඉදිකර ඇති මහල් නිවාස වැසියන්ට හා පීඩී සිරිසේන ක්‍රීඩාංගණය පසුකර යන විට හමුවන පාර වසා දැමූ ප්‍රදීපා මාවත සද්ධර්ම මාවතට වැටෙන මංසන්දිය දක්වා පදංචිව සිටින වැසියන්ට පොලිසිය ලබාදී ඇති උපදෙස් කුමක්ද යන්න වාර්තා වූයේ නැත.

මේ අතර අප්‍රේල් 30 වැනිදා පෙරවරුවේ සිට කොළඹ කොටුවේ පහළ චැතැම් වීදිය වසා තිබුණි. ඒ සමගි ජන බලවේගයේ මැයි දිනය වෙනුවෙන් වේදිකාව ඉදිකිරීම සඳහාය. එත්සත් ජාතික පක්ෂයට අප්‍රේල් 28 ඉරිදා සිට පාර වසා දෙන අතරේ සමගි ජන බලවේගයට පාර ලබාදෙන්නේ අප්‍රේල් 30 දිනය. රාජ්‍ය බලය අවභාවිත කිරීමේ වෙනස ඉන් පැහැදිලිවේ.
ජාතික ජන බලවේගයට ලබාදී ඇත්තේ කොළඹ ටවුන්හෝල්හි සී ඩබ්ලිව් ඩබ්ලිව් කන්නන්ගර මාවතය. අප්‍රේල් 30 දින පෙරවරුවේ එම පාර වසා දමා තිබුණේ නැති අතර පාර දෙපස විදුලි ආලෝක සවි කිරීම වැනි කටයුතු සිදුකරමින් පැවතුණි.

කොළඹ නගරයේ වාහන ගමන් ගන්නා ප්‍රධාන මාර්ග වසා මැයි දිනයක් පැවැත්වූ පළමු අවස්ථාව මෙය විය යුතුය. ලියුම්කරුට මතක ඇති කාලයේ එවැන්නක් සිදුවී තිබුණේ නැත. මැයි රැලි පැවැත්වූයේ කොළඹ නගරයේ පැවති ක්‍රීඩාංගණවලය. මැයි පෙළපාලි පමණක් පාරේ ගමන් කළ අතර ඒද බොහෝවිට දෙපසට බෙදී ඇති මාර්ගයක තනි තීරුවේය.

එහෙත් මෙවර එය වෙනස් කරමින් කොළඹ නගරයට ඇතුල්වන හා කොළඹ නගරයෙන් වාහන පිටත්වන ප්‍රධාන මාර්ග වසා දමමින් මැයි දින පැවැත්වීම සඳහා අවසර ලබාදීම් සිදුකර ඇත්තේ පොලිසිය සහ කොළඹ මහ නගර සභාව විසින්ය. ඒ ඒ පිළිබඳව පැවැත්වෙන රැස්වීම්වලදී ගත් තීරණයන් අනුවය. නමුත් එහිදී කොළඹ නගරයේ පාරවල් වැසීම මගින් එම මාර්ගවල ගමන් ගන්නා රථවාහන සහ මහජනයාට සිදුවන අපහසුතා ගැන රජයේ නිලධාරින් කිසිදු අවධානයක් සිදුකර නැත. ඊට සරිලන ලෙසම මැයි දින පැවැත්වීම සඳහා ප්‍රධාන මාර්ග ඉල්ලුම් කළ දේශපාලන පක්ෂ හා ඒවාහි නියෝජිතයින්ද මහජනයාට සිදුවන පීඩාව ගැන කිසිදු තැකීමක් සිදුකර නැත.

මේ චෝදනාවට පිළිතුරු වශයෙන් අවශ්‍ය නම් එම බලධාරින්ට හා දේශපාලන පක්ෂවලට කිව හැක්කේ මැයි දිනය නම් නිවාඩු දිනයේදී එසේ පාරවල් වැසීම මගින් මහජනයාට සිදුවන පීඩාව අවම වන බවය. එහෙත් එහි ඇති ඇත්ත තත්වය වන්නේ මැයි දිනයට දින කිහිපයකට කලින්ම වේදිකා ඉදිකිරීම සඳහා කොළඹ නගරයේ ප්‍රධාන පාරවල් වැසීම මගින් මහජනයා පීඩාවට පත්වූ බවයි. ඒ සඳහා හොඳම උදාහරණය සැපයූවේ අප්‍රේල් 29 දින සවස කොළඹ නගරයට ඇද හැලුණු ධාරානිපාත වර්ෂාවයි. කටුනායක අධිවේගී මාර්ගයට හා නුවර පාරට පිවිසෙන ප්‍රධාන මාර්ගය වූ මාලිගාවත්ත ප්‍රදීපා ශාලාව එක්සත් ජාතික පක්ෂයේ මැයි දින වේදිකාව ඉදි කිරීම සඳහා වසා දැමීම මගින් එම මාර්ගවලට පිවිසෙන සියලු වාහනවලට ගමන් කිරීමට සිදුවූයේ ආමර්වීදිය ඔස්සේ ඉගුරුකඩේ හන්දිය ඔස්සේය.

ඒ නිසා එදින ඇතිවූ වාහන තදබදය ගැන දන්නේ එහි ගමන් කළ පිරිස පමණය. බොහෝ පිරිස් පංචිකාවත්ත දෙස සිට ආමර් වීදිය දෙසට ගමන් කළේ පා ගමනින්ය. ඒ වාහනයක යනවාට වඩා ඉක්මණින් යා හැකි වූ නිසාය. වාහන ඉදිරියට ගමන් කරනවාට වඩා තිබුනේ එකතැන හිරවීය.

මෙම මැයි දින රැලි තුන සඳහා ලබාදී තිබූ ස්ථාන තුනෙන් නේවාසික නොවන ස්ථානයකට තිබුණේ සමගි ජන බලවේගය මැයි දිනය පැවැත්වූ කොළඹ කොටුව පහළ චැතැම් වීදිය පමණය. ජාතික ජන බලවේගය මැයි රැලිය පැවැත්වූ සී ඩබ්ලිව් ඩබ්ලිව් කන්නන්ගර මාවත සම්පූර්ණ නේවාසික ප්‍රදේශයක් නොවුණත් එයට සම්බන්ධ වන බාන්ස් පෙදෙස හා රොස්මිඩ් ප්‍රදේශය නේවාසිකයින් සිටින ස්ථාන වේ. එහෙත් ඔවුන්ට කන්නන්ගර මාවත නැතත්, අනෙක් පසින් ඇති මාර්ගවලින් ගමන් පහසුකම් ලබාගත හැකිය. එහෙත් එක්සත් ජාතික පක්ෂය මැයි දිනය පැවැත්වූ පංචිකාවත්තේ ප්‍රදීපා මාවත යනු තනිකරම නේවාසික ප්‍රදේශයකි. ඉහත සඳහන් කළ මහල් නිවාසවාසීන්ට හා වතුවල ජීවත්වන ජනතාවට ප්‍රදීපා මාවතට පිවිසීම හැර මාර්ග පහසුකම් නැත. ඉල්ලීම් කළ දේශපාලන පක්ෂවල මහදැනමුත්තන් හා ඒ සඳහා අවසර ලබාදී ඇති රාජ්‍ය නිලධාරීන් එම කරුණු පිළිබඳව කිසිදු සැලකිල්ලක් දක්වා නැත.

එසේම මැයි දිනය අවසන් වී මැයි 02 වැනිදාද කොළඹ මාලිගාවත්තේ ප්‍රදීපා මාවත වසා දමා තිබුණි. ඒ එක්සත් ජාතික පක්ෂයේ මැයි දිනයට ඉදිකළ වේදිකාව ගලවා අවසන් නොකිරීම නිසාය. ඒ නිසා පංචිකාවත්ත හා මරදාන ප්‍රදේශයේ සිදුවූ වාහන තදබදය සුළු පටු නොවීය. සමගි ජන බලවේගයේ මැයි දින වේදිකාවද මැයි 02 දින ගලවමින් පැවති නිසා ලේකහවුස් වටරවුමේ සිට කොළඹ කොටුව ප්‍රදේශයේ ඇති වූ රථ වාහන තදබදය විකල්ප මාර්ග නිසියාකාරව පොලිසිය තීන්දු කර නොතිබීම නිසා ඇතිවූ ප්‍රමාදය සුළු පටු නොවීය. ජාතික ජන බලවේගය නම් මැයි 02 වැනිදා උදෑසන වනවිට ඔවුන්ගේ මැයි දින වේදිකාව ගලවා තිබුණි. ඒ නිසා සී ඩබ්ලිව් ඩබ්ලිව් කන්නන්ගර මාවතේ වාහන ගමනා ගමනයට බාධා ඇතිවූයේ නැත.

සමගි ජන බලවේගය කොළඹ කොටුවේ චැතැම් වීදියේ පවත්වන මැයි දිනය වෙනුවෙන් ඉදිකරන වේදිකාව නිර්මාණය කිරීම සඳහා එම මාර්ගයේ කිසිදු වෙනසක් සිදුකළේ නැත. ජාතික ජන බලවේගය කොළඹ ටවුන්හෝල්හි සී ඩබ්ලිව් ඩබ්ලිව් කන්නන්ගර මාවතේ පවත්වන මැයි දිනය වෙනුවෙන් ඉදිකරන වේදිකාව සඳහා මාර්ගයේ වෙනසක් සිදුකළේ නැත. එහෙත් එක්සත් ජාතික පක්ෂය ඉදිකරන වේදිකාව සඳහා මාර්ගය මැද ඇති විදුලි පහන් කණු ගලවා තිබුණි. ඒ සඳහා අනිවාර්යයෙන්ම ලංකා විදුලි බල මණ්ඩලයෙන්ද අවසර ලබාගත යුතුය. නිල වශයෙන් අවසර ලබා ගත්තාද නැද්ද යන්න පැහැදිලි නැතත්, ඒ ආකාරයට වේදිකා ඉදිකිරීම සඳහා විදුලි පහන් කණු ඉවත් කිරීමට අවසර ලබාදෙන්නේ කිනම් පදනමකින්ද යන්න පිළිබඳව විමසීමට අප ලංවිම වැඩබලන සභාපති නරේන්ද්‍ර සිල්වා ඇමතුවත් ඔහු දුරකතනයට සම්බන්ධ වූයේ නැත.

මෙම විදුලි පහන් කණු ගැලවීමේ ගාස්තුවත්, ඒවා නැවත සවි කිරීමේ ගාස්තුවත් ගෙවිය යුත්තේ මේ රටේ මහජනතාවය. ලංවිම සභාපතිවරයා හෝ එහි වගකිව යුත්තෙකු මේ සටහන පලවීමෙන් පසු හෝ රටට කිව යුත්තේ විදුලි පහන් කණු ගැලවීම සඳහා අවසර ලබාදීමේ පදනම කුමක්ද?, ඒ සඳහා යන වියදම් එක්සත් ජාතික පක්ෂය ගෙව්වාද හෝ ගෙවනවාද යන්නය.
එසේම මාලිගාවත්ත ප්‍රදීපා මාවත දෙපසට බෙදා තිබූ ගල් යෙදූ බැමිද විදුලි පහන් කණු ගැලවීම නිසා විනාශ වී ඇති අතර එය යළි පිළිසකර කළ යුත්තේ කොළඹ මහ නගර සභාවයි. ඒ සඳහා එම නගර සභාවෙන් අවසර ලබා ගත්තාද, ඊට වැයවන මුදල් එක්සත් ජාතික පක්ෂය ගෙවනවාද, නැත්නම් මේ රටේ ජනතාවගේ මුදල් වන නගර සභාවේ මුදල්වලින් පිළිසකර කරනවාද යන්න ගැන එහි කොමසාරිස් භද්‍රානි ජයවර්ධන මෙම සටහන පළවීමෙන් පසු හෝ පිළිතුරු දිය යුතුය. මන්ද ඒ පිළිබඳව විමසීම සඳහා උත්සාහ කිරීමේදී ඇයද අපගේ දුරකතන ඇමතුමට සම්බන්ධ නොවූ බැවිනි.

පාරවල් වැසීම ගැන එක්සත් ජාතික පක්ෂයට අදාළ වන තවත් උදාහරණයක්ද පසුගිය සතියේ සිදුවිය. ඒ එක්සත් ජාතික පක්ෂයේ හිටපු නාගරික මන්ත්‍රී කිත්සිරි රාජපක්ෂ ජනාධිපති රනිල් වික්‍රමසිංහගේ ප්‍රධානත්වයෙන් පැවැත්වූ අලුත් අවුරුදු උත්සවය හා සංගීත සංදර්ශනයයි. එයට ජනාධිපතිවරයාට අමතරව ඔහුගේ කාර්ය මණ්ඩල ප්‍රධානි හා ජ්‍යෙෂ්ඨ උපදේශක සාගල රත්නායක, ආරක්ෂක මාණ්ඩලික ප්‍රධානි ජනරාල් ශවේන්ද්‍ර සිල්වාද සහභාගි විය.
එය පැවැත්වුණේ අප්‍රේල් 27 වැනි සෙනසුරාදා දිනදීය. ඒ ක්‍රීඩා පිටියක නොවේ. කොළඹ මරදානේ පොලිසිය ඉදිරිපිටින් ඇස්වාට්ටුව දෙසට දිවෙන ප්‍රධාන වාහන ගමන් ගන්නා මාර්ගය වන සීමන්ඩ්ස් පාර හා ඩීන්ස් පාර වසා දමා මුළු පාරම වැසෙන පරිදි දැවැන්ත වේදිකා, දැවැන්ත හට් හා අනෙකුත් ඉදි කිරීම් සිදුකරමින්ය.

අප්‍රේල් 27 දින එම අවුරුදු උත්සවය පැවැත්වුවද එම දැවැන්ත ඉදිකිරීම් සඳහා ඊට පෙර දිනම පාර වසනු ලැබීය. එපමණක් නොව දැඩි වාහන තදබදයක් ඇති කොළඹ මරදානේ බොරැල්ල පාර, ටීබී ජයා මාවත (ඩාර්ලි පාර) ඇස් වටරවුම හරහා දිවෙන වටරවුම් පාපැදි තරගයක්ද එදින පැවැත්වීමට ඉඩ දී තිබුණි. එතරම් වාහන තදබදයක් නැති ඉරිදා දිනයක නම් එම අවසර ලබාදී තිබුනේ එය අපට යම් සාධාරණීකරණයකට ලක් කිරීමට තිබුණි. එහෙත් ප්‍රධාන පාරක් වසා කොට්ට පොර ක්‍රීඩාව වැනි තරග සඳහා පාරේ වළවල් හාරා පමණක් නොව පාර දෙපසට බෙදා ඇති ආරක්ෂක වැටවල් පවා ඉවත් කර එවැන්නක් කිරීමට ඉඩදීම කිසිසේත්ම සාධාරරණීකරණය කළ හැකි කරුණක් නොවේ.

මෙහිදීත් අවසර ලබා ගැනීම සම්බන්ධයෙන් අපට හමුවන්නේ කොළඹ මහ නගර සභාව සහ පොලිසියයි. ඔවුන් කාටත් නොදෙන ආකාරයේ අවසරයක් මේ සඳහා ලබාදී ඇත. පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූවගෙන් මේ පිළිබඳ විමසීමට උත්සාහ කළද ඔහුද දුරකතන ඇමතුමට සම්බන්ධ වූයේ නැත. ඔහුද කළ යුත්තේ මැයි දින අවසරයන් මෙන්ම මෙම අවුරුදු උත්සව අවසරය ලබාදුන් හේතු අපට කෙසේ වෙතත් රටට කීමය. අවසර ලබාදීම් පැත්තකින් තිබූ විට එම පාපැදි ධාවන තරගයේදී වාහන තදබදයක් ඇති එම මාර්ගවල හන්දියෙන් හන්දියට පොලිසිය යොදවමින් අනතුරක් වළක්වා ගැනීමට පොලිසිය ගත් උත්සාහය අපට පෙන්නුම් කරන්නේ පාපැදි තරගයකට අවසර ලබාදිය යුතු නැති මාර්ගයක එවැන්නක් පැවැත්වීම සඳහා ඔවුන් ගත් උත්සාහයයි.

මැයි දින වේවා, අවුරුදු උත්සව වේවා ඒවා පැවැත්වීම සඳහා ක්‍රීඩාංගණ නැත්නම් ලබාදිය යුත්තේ වාහන ගමනා ගමනයට යොදා ගන්නා ප්‍රධාන මාර්ග නොව අතුරු මාර්ගය. එහෙත් ඉහතින් සඳහන් කරන ලද තොරතුරු අනුව සිදුවී ඇත්තේ එහි අනෙක් පැත්තය.
පැහැදිලිවම මේවා දේශපාලන බලය මත සිදුවන ඒවාය. ජනාධිපතිවරයාගේ පක්ෂයට වුවමනා ලෙස මැයි දිනයට ප්‍රධාන මාර්ගයක් ලබාදීම සිදුවී තිබේ. ඊට සමගාමීව සමගි ජන බලවේගයටත්, ජාතික ජන බලවේගයටත් ඔවුන් ඉල්ලූ හෝ නොඉල්ලූ ප්‍රධාන පාරවල් ලබාදී තිබේ. ඉනුත් එහාට යමින් ජනාධිපතිවරයා සමග සමීපව කටයුතු කරන හා වත්මන් පොලිස්පතිවරයා සමග සමීපව කටයුතු කරන හිටපු නාගරික මන්ත්‍රීවරයෙකුටත් සලකා තිබේ.
ස්වාධීන නොවූ පොලිසියක, ස්වාධීන නොවූ රාජ්‍ය සේවයක සහ වත්මනේ රට කරවන හා අනාගතයේ රට හැදීමට බලය ඉල්ලන දේශපාලන පක්ෂවල කෙරුවාව එසේය.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි