No menu items!
22.5 C
Sri Lanka
19 May,2024

සාජන්වරයෙකු මියගිය සීසීඩියේ වැලිගම මෙහෙයුම සැක සහිතයි

Must read

පාතාලයට ප්‍රති වෙඩි ප්‍රහාර නම් එල්ල කළේ නම්
පොලිස් අණ නොතකා පලා ගියේ ඇයි?

පසුගිය වසරේ දෙසැම්බර් 31 වැනිදා අලුයම මාතර වැලිගම පැලෑන ප්‍රදේශයේදී සිදුවූ වෙඩි තැබීමකදී කොළඹ අපරාධ කොට්ඨාසය හෙවත් සීසීඩීයට අනුයුක්තව සේවය කළ පොලිස් සාජන්වරයෙකු මියයෑම හා තවත් උප පොලිස් පරීක්ෂකවරයෙකු තුවාල ලැබීම මේ වනවිට සමාජය තුළ සැකයට භාජනය වන කරුණක් බවට පත්වී ඇත. ඒ මෙම වෙඩි තැබීමේ සිදුවීම සම්බන්ධයෙන් පොලීසිය පාර්ශ්වයෙන් සිදුකරන කරුණු පැහැදිලි කිරීම්වල බරපතළ සැකයක් මතුවන නිසාය. මෙම වෙඩි තැබීමේ සිදුවීම සම්බන්ධයෙන් පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නිහාල් තල්දූව පැවැත්වූ මාධ්‍ය සාකච්ඡාව මගින් පොලීසිය ඒ පිළිබඳව මහත් කලබලයට පත්වී ඇති ආකාරයක් පෙන්නුම් කරන බව හඳුනාගත හැකිවිය.

පොලිස් මාධ්‍ය ප්‍රකාශකවරයාට අනුව කොළඹ අපරාධ කොට්ඨාසයේ නිලධාරීන් පිරිසක් වැලිගම පැලෑන ප්‍රදේශයට ගොස් ඇත්තේ නඳුන් චින්තක හෙවත් හරක් කටාට සම්බන්ධ පාතාල කල්ලි සාමාජිකයන් කිහිප දෙනෙකු අත්අඩංගුවට ගැනීම සඳහාය. මීට පෙර හරක් කටා සමග සම්බන්ධකම් පැවැත්වූ සාමාජිකයන් කිහිප දෙනෙකු වැඩ බලන පොලිස්පති දේශබන්දු තෙන්නකෝන්ගේ ‘යුක්තිය’ මෙහෙයුම යටතේ කොළඹ අපරාධ කොට්ඨාසය විසින් අත්අඩංගුවට ගෙන තිබීමත්, එම අත්අඩංගුවට ගත් පුද්ගලයන්ගෙන් ලැබුණු තොරතුරු අනුව තවත් පිරිසක් අත්අඩංගුවට ගැනීම සඳහාත් ඔවුන් වැලිගම පැලෑන ප්‍රදේශයට ගොස් ඇත.

කොළඹ අපරාධ කොට්ඨාසයේ නිලධාරීන් පිරිස එම අත්අඩංගුවට ගැනීමේ මෙහෙයුම සඳහා කේඩීඑච් වර්ගයේ සුදු වෑන් රථයකින් වැලිගම පැලෑන ප්‍රදේශයට ගොස් ඇති අතර එම ප්‍රදේශයේ උ15 හෝටලය අසල එම වෑන් රථය නවත්වාගෙන සිටින අවස්ථාවේ එම හෝටලයට යාබද හෝටලයේ සිට යම් පාතාල කල්ලි සාමාජිකයෙකු හෝ සාමාජිකයන් පිරිසක් පොලිස් නිලධාරීන් දෙසට වෙඩි ප්‍රහාරයක් එල්ල කර ඇත. ඒ අනුව කොළඹ අපරාධ කොට්ඨාසයේ පොලිස් නිලධාරීන් පිරිස ‘ආත්ම ආරක්ෂාව’ උදෙසා (අවධාරණය අපෙනි) එයට ප්‍රතිප්‍රහාර එල්ල කර තිබේ.

පොලිස් මාධ්‍ය ප්‍රකාශකවරයා වැඩිදුර පැහැදිලි කිරීමක් නොකළද, ප්‍රතිප්‍රහාර එල්ල වී ඇත්තේ පාතාල සාමාජිකයන් යැයි කියන පිරිස වෙඩි තැබූවායැයි කියන හෝටලයට නොව උ15 හෝටලය දෙසටය. (මෙම හෝටලය වත්මන් ඌව පළාත් ආණ්ඩුකාර ඒජේඑම් මුසම්මිල්ගේ පුතාට අයත් එකකි) පුදුමයකට මෙන් පළපුරුදු පොලිස් නිලධාරීන්ට වෙඩි ප්‍රහාරය එල්ල වූ දෙසටවත් ප්‍රතිප්‍රහාර එල්ල කිරීමට එම අවස්ථාවේදී නොහැකි වී ඇත.

පොලිස් මාධ්‍ය ප්‍රකාශකවරයා නොකීවද මෙම වෙඩි තැබීම සම්බන්ධයෙන් පොලිස් 119 ඇමතුම් අංකයට දැනුම් දීමක් ලැබී තිබේ. එම දැනුම් දීම අනුව වැලිගම පොලීසියේ ජංගම මුර සංචාරක පොලිස් ජීප් රිය වෙඩි තැබීමක් සිදුවූවා යැයි කියන පැලෑන ප්‍රදේශයට ගොස් තිබේ. කොළඹ අපරාධ කොට්ඨාසයේ නිලධාරීන් එම ප්‍රදේශයට පැමිණි සුදු පැහැති කේඩීඑච් වර්ගයේ වෑන් රථය, වැලිගම පොලීසියේ ජංගම රථය දැක ඇත්තේ එහිදීය. ඉදිරියට එන එම වෑන් රථය නැවැත්වීම සඳහා පොලිස් ජංගම රථය මාර්ගය හරස් කරමින් උත්සාහ කර ඇතත්, එයට අවනත නොවෙමින් කොළඹ අපරාධ කොට්ඨාසයේ වෑන් රථය පලාගොස් ඇත.

වැලිගම පොලීසියේ ජංගම රථය පලායන රථය පසුපසින් පන්නමින් වෙඩි තබා ඇත්තේ අණ නොතකා පලා යෑම නිසාය. ඊට අමතරව අණ නොතකා පලායන රථය සම්බන්ධයෙන් අවට පොලීසි දැනුවත් කිරීමද පොලිස් ජංගම රථය සිදුකර ඇත. එහි ප්‍රතිඵලය වී ඇත්තේ අධිවේගී මාර්ගයේ ඉමදූව පිවිසුමෙන් ඇතුල්වීමට උත්සාහ කිරීමේදී කොළඹ අපරාධ කොට්ඨාසයේ සුදු වෑන් රථය එහි රාජකාරියේ නිරත පොලීසිය විසින් නැවැත්වීමය. තමන් පොලීසියේ යැයි කියමින් අධිවේගී මාර්ගයට පිවිස පලා යෑමට තවදුරටත් එම වෑන් රථය උත්සාහ කළද එයට ඉඩ ලැබී නැති අතර අවසානයේ ඒ සඳහා ඉඩ ලැබී ඇත්තේ අධිවේගී මාර්ගයේ පොලිස් නිලධාරීන්ට ඉහළ පොලිස් නිලධාරියෙකුගෙන් ලැබුණ දුරකතන ඇමතුමක් අනුවය. එසේම ඒ වනවිටත් එම වෑන් රථයේ වෙඩි වැදී සිටි පොලිස් නිලධාරීන් දෙදෙනා 1990 ගිලන් රථයකට කතාකර කරපිටිය රෝහලට ඇතුළත් කිරීමේ කටයුතුද අධිවේගී මාර්ගයේ පොලිස් නිලධාරීන් විසින් සිදුකර තිබේ.

මෙම වෙඩි තැබීමේ සිද්ධියේදී ඇත්තටම පාතාල කණ්ඩායම් සාමාජිකයකු හෝ සාමාජිකයන් පිරිසක් වැලිගම පැලෑන ප්‍රදේශයේදී කොළඹ අපරාධ කොට්ඨාසයේ නිලධාරීන්ට වෙඩි තැබීමක් සිදුකළාද යන්න විවාදිතය. ඒ එම වෙඩි තැබීමේ සිදුවීම සම්බන්ධයෙන් මේ වනවිට වාර්තා වන තොරතුරු හා එම සිදුවීම සම්බන්ධයෙන් පොලීසිය පාර්ශ්වයෙන් කරන කරුණු පැහැදිලි කිරීම් නිසාය. සැබෑ පොලිස් පරීක්ෂණයකදී නම් මෙම විවාදිත බවට හේතුවී ඇති කරුණු කාරණා නිරාකරණය කර ගැනීමේ හැකියාවක් ඇත. එමෙන්ම රස පරීක්ෂක වාර්තා මගින්ද එම කරුණු හෙළිකර ගත හැකි වනු ඇත.

කොළඹ අපරාධ කොට්ඨාසයේ සාමාජිකයන් පැලෑන හෝටලය අසලදී පාතාල සාමාජිකයන්ගේ වෙඩි තැබීමට ප්‍රති ප්‍රහාරයක් නම් එල්ල කළේ, ඔවුන් වැලිගම පොලිස් ජංගම රථයේ අණ නොතකා පලා ගියේ ඇයි? එසේ යෑමට හේතුවක් නැත. මන්ද පොලිස් මාධ්‍ය ප්‍රකාශකවරයා කියන ආකාරයට එම පොලිස් කණ්ඩායම රාජකාරි කටයුත්තකට එහි පැමිණ සිටීම නිසාය. (ඒ සම්බන්ධයෙන් ලොග් සටහනක් තිබුණේද, පසුව ඇතුල් කළේද යන්න දන්නේ පොලීසියම පමණි.) තමන්ට සඟවන්නට දෙයක් නොතිබුණේ නම් කොළඹ අපරාධ කොට්ඨාසයේ සාමාජිකයන්ට තිබුණේ වැලිගම පොලීසියේ ජංගම රථයේ අණ අනුව සිය වෑන් රථය නවත්වා සිය අනන්‍යතාව ඉදිරිපත් කිරීම පමණි.

එසේ කළා නම් පොලිස් සැරයන්වරයා මැරුම් කන්නේද, උප පොලිස් පරීක්ෂක වෙඩි කන්නේද නැත. මන්ද මෙම සැරයන්වරයාගේ මරණය සිදුවී ඇත්තේ හා උප පොලිස් පරීක්ෂකවරයාට වැදී ඇත්තේ වැලිගම ජංගම පොලිස් රථයෙන් තැබූ වෙඩි වන නිසාය. එසේම එම වෙඩි ප්‍රහාරයෙන් පසුත් වෙඩි වැදුණු සිය සාමාජිකයන්ට ඉක්මණින් ප්‍රතිකාර කිරීමේ වුවමනාවක් තිබුණේ නම් කොළඹ අපරාධ කොට්ඨාසයේ සාමාජිකයන් සිදුකළ යුතුව තිබුණේ අධිවේගී මාර්ගයෙන් කොළඹට පලායෑමට උත්සාහ කිරීම නොව ඒ ළඟම තිබූ වැලිගම රෝහලට තුවාලකරුවන් ඇතුළත් කිරීමය.

ඒ කිසිවක් සිදු නොවීම විසින් අපට පෙන්නුම් කෙරෙන්නේ උ15 හෝටලයට වෙඩි තැබීම සම්බන්ධයෙන් යම් සඟවන්නට දෙයක් කොළඹ අපරාධ කොට්ඨාසයේ පොලිස් නිලධාරීන්ට තිබී ඇති බවයි. නොඑසේ නම් පාතාලය සමග වෙඩි හුවමාරු කරන අවස්ථාවකදී වැලිගම පොලීසියේ ජංගම රථය දැක පලා යෑමේ වුවමනාවක් ඔවුන්ට ඇතිවිය නොහැකිය. සඟවන්නට දෙයක් නොතිබුණේ නම් පලා නොගොස් ඔවුන් කළ යුතුව තිබුණේ වැලිගම පොලිස් ජංගම රථයෙන්ද සහාය ලබාගෙන පාතාල සාමාජිකයන්ට ප්‍රති ප්‍රහාර එල්ල කිරීමය. මන්ද වැලිගම පොලිස් ජංගම රථය ඒ වනවිටත් නිරතව සිට ඇත්තේ වැඩබලන පොලිස්පතිගේ පාතාලය මර්දනය කිරීමේ ‘යුක්තිය’ මෙහෙයුමේ කාර්යයන්වල නිසාය. එසේ විශේෂ මෙහෙයුමක නොසිටියද තමන් අවදානමකට ලක්වී සිටින අවස්ථාවක පොලීසිය පොලීසියෙන් සහාය ගැනීම කළ යුත්තකි. සාමාන්‍ය ජනතාව පවා ඔවුන් යම් අනතුරකට හෝ අවදානමකට ලක්වී සිටින විට සහාය ගන්නේ පොලීසියෙන් වන නිසා හා ඒ සඳහා රටේ ඇති ප්‍රධානතම ආයතනය පොලීසිය වන නිසාය.

ඊටත් අමතරව කොළඹ අපරාධ කොට්ඨාසයේ සාමාජිකයන් කළ යුතුව තිබුණේ පාතාල සාමාජිකයන්ගේ වෙඩි ප්‍රහාරවලට සිය සාමාජිකයන් ලක්වී සිටියේ නම් වැලිගම පොලිස් ජංගම රථයේද සහාය ලබාගෙන ඔවුන් ළඟම රෝහලකට ඇතුළත් කිරීමයි. එහෙත් ඒ කිසිවක් සිදු නොවූයේ කොළඹ අපරාධ කොට්ඨාසයේ එම වැලිගම මෙහෙයුම පොලිස් මාධ්‍ය ප්‍රකාශක කියන ආකාරයේ එකක් නොවී ඇති නිසා බව පැහැදිලිය.

කොළඹ අපරාධ කොට්ඨාසයට ඇත්තේ කීර්තිමත් ඉතිහාසයකට වඩා අපකීර්තිමත් ඉතිහාසයකි. අපරාධ මර්දනය කිරීම සඳහා විශේෂ ඒකකයක් වශයෙන් හඳුන්වමින් එය ආරම්භ කළද, ඒ සම්බන්ධයෙන් ලියැවී ඇත්තේ දේශපාලන අධිකාරියේ හා පොලීසියේ ඉහළ නිලධාරීන්ගේ නීති විරෝධි වුවමනා එපාකම් ඉටු කිරීමට ගොස් නෝන්ඩි වූ ඉතිහාසයකි. ඒ නිසා එවැනි නීතියට පිටින් මෙහෙයුම් බොහෝ විට බාර වෙන්නේ කොළඹ අපරාධ කොට්ඨාසයටය. පොලිස් පරීක්ෂණවල ප්‍රතිඵල මොන ආකාරයකට ඉදිරියේදී ලියවුණද එම කොට්ඨාසය සම්බන්ධයෙන් වැලිගම මෙහෙයුමක්ද ඉතිහාසයට එක්වෙනු ඇත.

දැන ගන්නට ඇති පරිදි පලායන වෑන් රථයට පොලිස් අණ පරිදි වෙඩි තබා ඇත්තේ එම ජංගම රථයේ පොලිස් නිලධාරීන් සමග රාජකාරියේ නිරතව සිටි හමුදා සාමාජිකයෙකි. ඒ නිසාම වැලිගම පොලිසියේ ජංගම රථයේ රාජකාරියේ නිරතව සිට පොලිස් අණ අනුව වෙඩි තැබූ හමුදා සාමාජිකයාගේ ගිනි අවිය මේ වනවිට පරීක්ෂණ පැවැත්වීම සඳහා පොලිස් භාරයට ගෙන ඇත. බොහෝ විට එම ගිනි අවිය රස පරීක්ෂකවරයා වෙතද ඉදිරිපත් කෙරෙණු ඇත. එහිදී මියගිය පොලිස් නිලධාරියාගේ මෙන්ම තුවාල ලබා ඇති පොලිස් නිලධාරියාගේ වෙඩි වැදීම්වලට අදාළ ගිනි අවිය කුමක්ද යන්න තීරණය වනු ඇත. ඒ අනුව වැලිගම පැලෑන ප්‍රදේශයේදී පාතාල සාමාජිකයෙකුගෙන් හෝ පාතාල සාමාජිකයන්ගෙන් කොළඹ අපරාධ කොට්ඨාසයේ මියගිය සැරයන්වරයාට හා තුවාල ලැබූ උප පොලිස් පරීක්ෂකවරයාට වෙඩි වැදී තිබුණේද යන්නද තීරණය වනු ඇත.

එහෙත් එම තීරණවලට අදාළ පරීක්ෂණ නිසි පරිදි සිදුවේද යන්න හා එම පරීක්ෂණ ප්‍රතිඵල සමාජගත වේද යන්න පිළිබඳ මේ වනවිටත් සැකයක් මතු වී ඇත. ඒ එම මරණය සම්බන්ධයෙන් යම් තීරණයකට ආණ්ඩුවත්, පොලීසියත් මේ වනවිට පැමිණ ඇති නිසාය.

ඒ එම වැලිගම වෙඩි වැදීමේ සිද්ධියෙන් මියගිය පොලිස් සැරයන් උපුල් චමින්ද උප පොලිස් පරීක්ෂක තනතුරට මියයෑමෙන් පසු උසස් කිරීමෙන් සහ ජනාධිපතිවරයා විසින් පොලීසිය භාර ඇමති ටිරාන් අලස් මගින් රුපියල් මිලියන 2.5ක මුදලක් හා පොලීසියෙන් තවත් රුපියල් මිලියන 1.7ක මුදලක් ඔහුගේ පවුලේ සාමාජිකයන්ට ලබාදීම වැඩ බලන පොලිස්පති දේශබන්දු තෙන්නකෝන් සිදුකර තිබීම නිසාය.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි