සාමාන්‍ය ජනතාවට මාධ්‍ය පිළිබඳ ඇත්තේ බොහෝ විට දැඩි විශ්වාසයකි. ඔවුන්ට අවශ්‍ය සියලු දේ මෙන්ම ඔවුන් දැනගත යුතු සියලු දේ මාධ්‍ය විසින් ලබාදෙන බව ජනතාව සිතති. එසේ වුවද තිත්ත ඇත්ත වන්නේ ජනතාවට අවශ්‍ය සියලු දේ මෙන්ම ජනතාව දැනගත යුතු සියලු දේද මාධ්‍ය ලබාදෙන්නේ නැති බවය. මාධ්‍ය බොහෝ විට කරන්නේ ජනතාවට අනවශ්‍ය සියලු දේ ඔවුන්ට ලබාදෙමින් ඔවුන් දැනගත යුතු සියලු දේවල් හැංගීමය.
ශ්‍රී ලංකාවේ සම්මත මාධ්‍ය සම්බන්ධයෙන් ගත් කල පුවත් දැන ගැනීමේ පිපාසයෙන් පෙළෙන ජනතාවගේ පළමු තෝරා ගැනීම බවට පත්වී ඇත්තේ රූපවාහිනී පුවත්ය. රූපවාහිනී නාලිකා සවස සිට රාත්‍රිය දක්වා විකාශය කරන පුවත් බුලටීන ඒ අනුව බොහෝ පිරිසක් නරඹන ඒවා බවට පත්වී තිබේ. ඒ පෙර සඳහන් කළ ආකාරයට ඔවුන්ට අවශ්‍ය හා ඔවුන් දැනගත යුතු පුවත් ඒවා මගින් විකාශය කරතියි යන විශ්වාසයේ පදනම මත පිහිටාය.
එහෙත් මෙම රූපවාහිනී නාලිකා සම්බන්ධයෙන් ජනතාවගේ එම විශ්වාසය බිඳ දැමූ ආසන්නනම දවසක් උදාවූයේ පසුගිය දෙසැම්බර් 14 වැනිදාය. එදින ශ්‍රේෂ්ඨාධිකරණය විසින් සුවිශේෂි නඩු තීන්දුවක් ලබාදී තිබුණී. ඒ හිටපු හමුදා සෙබලෙකු විසින් ඉදිරිපත් කරන ලද මූලික අයිතිවාසිකම් පෙත්සමක තීන්දුව ලබා දෙමින්ය. එහිදී ශ්‍රේෂ්ඨාධිකරණය තීන්දු කරන ලද්දේ ජනාධිපති රනිල් වික්‍රමසිංහ වැඩ බලන පොලිස්පති ලෙස පත්කර ඇති ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් නුගේගොඩ ප්‍රදේශය භාර පොලිස් අධිකාරිවරයා ලෙස කටයුතු කරන සමයේ පෙත්සම්කරුට පහරදීම හා වධහිංසා කිරීම සම්බන්ධයෙන් පෞද්ගලිකව දායක වී ඇති හෙයින් ආණ්ඩුක්‍රම ව්‍යවස්ථාවෙන් සහතික කර ඇති පෙත්සම්කරුගේ මූලික අයිතිවාසිකම් කඩකර ඇති බවයි.
ඒ නිසා වැඩ බලන පොලිස්පති දේශබන්දු තෙන්නකෝන් පුද්ගලිකවම වන්දි ලෙස පෙත්සම්කරුට රුපියල් ලක්ෂ 5ක මුදලක් ගෙවිය යුතු බව තීන්දු කර ඇති ශ්‍රේෂ්ඨාධිකරණය දේශබන්දු තෙන්නකෝන්ට එරෙහිව විනය ක්‍රියාමාර්ග ගන්නා ලෙස පොලිස් කොමිසමට දැනුම් දී ඇත. මෙම ශ්‍රේෂ්ඨාධිකරණ තීන්දුව දේශබන්දු තෙන්නකෝන්ට අමතරව තවත් පොලිස් නිලධාරීන් කිහිප දෙනෙකුටද ලබාදුන් අතර ඔවුන්ද පුද්ගලිකව වන්දි ගෙවීමට මෙන්ම ඔවුන් සම්බන්ධයෙන් විනය හා අනෙකුත් ක්‍රියාමාර්ග ගන්නා ලෙස පොලිස් කොමිසමට දැනුම් දී තිබුණි.
රජයට අයත් ජාතික රූපවාහිනියේ එදින රාත්‍රී 8 ප්‍රවෘත්ති විකාශයේ මෙම ශ්‍රේෂ්ඨාධිකරණ තීන්දුව සම්බන්ධ ප්‍රවෘත්තිය විකාශය නොවූ අතර රජයටම අයත් ස්වාධීන රූපවාහිනියේ ප්‍රවෘත්ති විකාශයේද එය විකාශය වූයේ නැත. එම නාලිකා රජයේ හොරණෑ වන නිසා ජනතාවට අත්‍යවශ්‍ය ප්‍රවෘත්ති විකාශය කිරීම වෙනුවට පවතින ආණ්ඩුවේ උපදෙස් මත ප්‍රවෘත්ති නිර්මාණය කිරීම, විකෘති කිරීම හෝ හැංගීම ඔවුන්ගේ පිළිවෙත නිසා මෙම තත්වය ජනතාවට කෙසේ වෙතත් අපට තේරුම් ගත හැකිය.
මෙම ප්‍රවෘත්තිය එදින විකාශය කළේ සියත රූපවාහිනියේ ප්‍රවෘත්තිවලින් පමණි. එහෙත් ජනතාවට පාර කියනවා යැයි කියන හා ජනතාවට වඩා ඉදිරියෙන් සිටිනවා යැයි කියන සිරස, දෙරණ, හිරු, ස්වර්ණවාහිනි යන ප්‍රධානතම රූපවාහිනී මාධ්‍යවල එම ප්‍රවෘත්තිය විකාශය වූයේ නැත. එසේ වුවද ඔවුන්ගේ ප්‍රවෘත්ති විකාශය සම්බන්ධයෙන් සිරස සඳහන් කරන්නේ සත්‍යයේ සටහන බුද්ධියේ විමසුමට යනුවෙන්ය. දෙරණ කියන්නේ සත්‍යය ප්‍රථමයෙන් කියාය. හිරු කියන්නේ අංක එකේ ප්‍රවෘත්ති විකාශය පැත්ත ගියත් ඇත්ත කියන කියාය. ස්වර්ණවාහිනී කියන්නේ අංක එකේ ප්‍රවෘත්ති විකාශය කියාය.
එදින පෙරවරුවේ සිටම සමාජ මාධ්‍ය ජාලාවල එම ප්‍රවෘත්තිය පළවී තිබුණි. එසේම ශ්‍රේෂ්ඨාධිකරණ තීන්දුවද සමාජ මාධ්‍ය ඔස්සේ සංසරණය වෙමින් තිබුණි. එමෙන්ම ඩේලි මිරර් පුවත්පතට අයත් වෙබ් අඩවියේද එය පළවී තිබුණි.
මෙම රූපවාහිනි චැනලවලට අධිකරණ වාර්තාකරුවෝ සිටිති. එය ශ්‍රේෂ්ඨාධිකරණයේ සිට අභියාචනාධිකරණය, මහාධිකරණය හා මහේස්ත්‍රාත් අධිකරණය දක්වාම විසිරී පවතින්නකි. වැඩ බලන පොලිස්පති දේශබන්දු තෙන්නකෝන් පිළිබඳ එම අතිශය වැදගත් ප්‍රවෘත්තිය විකාශය නොකළද, කුරුණෑගල මහාධිකරණය කුරුණෑගල හිටපු නගරාධිපති ඇතුළු විත්තිකරුවන්ට කුරුණැගල රාජ සභා මණ්ඩපය කඩා දැමීම සම්බන්ධයෙන් වරද පිළිගැනීම නිසා ලබාදුන් සිරදඬුවම් ගැන ප්‍රවෘත්තිය නම් විකාශය කළේය. එම ප්‍රවෘත්තිය විකාශය කිරීම සම්බන්ධයෙන් පමණක් ඔවුන්ගේ අධිකරණ වාර්තාකරුවන්ගෙන් ප්‍රයෝජන ගෙන තිබුණි.
වැඩ බලන පොලිස්පති දේශබන්දු තෙන්නකෝන්ට එරෙහි එම ප්‍රවෘත්තිය විකාශය නොකළද, අධිකරණය බාරයේ පවතින හෙරෝයින් මත් කුඩු විනාශ කිරීම සඳහා පුත්තලමට රැගෙන යෑම හා එම විනාශ කිරීම සම්බන්ධයෙන් වැඩ බලන පොලිස්පතිවරයා සිදුකරන අදහස් දැක්වීම් නම් විකාශය කළේය. එමෙන්ම එම විකාශය කිරීමේදී එම හෙරෝයින් 2019 වර්ෂයේ අත්අඩංගුවට ගත් මාකඳුරේ මධුෂ් නැමැති පාතාල සාමාජිකයාට අයත් ඒවා බවද තවදුරටත් තොරතුරු ලබා ගනිමින් හිරු විකාශය කළේය. ඒ වැඩ බලන පොලිස්පති දේශබන්දු තෙන්නකෝන්ගේ ප්‍රතිරූපය ඉහළ නැංවීමට බව පැහැදිළිය.
ඉහත සඳහන් කරන ලද ශ්‍රේෂ්ඨාධිකරණ තීන්දුවට අදාළ ප්‍රවෘත්තිය හැංගුවේ ඉන් වැඩ බලන පොලිස්පති දේශබන්දු තෙන්නකෝන්ගේ ප්‍රතිරූපයට හානියක් වීම වැළැක්වීම සඳහා බවද ඒ නිසාම පැහැදිළිය. එහෙත් මේ රටේ කරුණු කාරණා පිළිබඳ අවබෝධයක් ඇති සාමාන්‍ය ජනතාවට පවා වැඩ බලන පොලිස්පති දේශබන්දු තෙන්නකෝන් කවුද කියා අමුතුවෙන් කියා දිය යුතු නැත. ඔහුගේ පැටිකිරිය ජනතාව දනිති. ඔහු හා දේශපාලනඥයින් අතර ඇති රාජකාරිමය නොවන සම්බන්ධය ගැනද දනිති. පොලීසිය භාර මහජන ආරක්ෂක ඇමති ටිරාන් අලස් දේශබන්දු තෙන්නකෝන් එම තනතුරට පත්කරන ලද්දේ ඔහු බව ප්‍රසිද්ධියේ කියා ඇතත් එය එසේ කීමට පෙර ජනතාවට රහසක් වූයේ නැත.
ගෝල්ෆේස් සාමකාමී අරගලකරුවන්ට පහර දීම සඳහා සනත් නිශාන්ත පෙරටුකරගත් මැරයන් පැමිණෙන විට පොලිස්පතිවරයාගේ නියෝගද නොතකමින් සාමය රැකීමේ සිය රාජකාරිය පැහැර හරිමින් එම මැරයින්ට අවස්ථාව සහ ආරක්ෂාව ලබා දුන්නේ දේශබන්දු තෙන්නකෝන්ය. එදින සිවිල් ඇඳුමින් සැරසී යමින් සිටියදී ප්‍රකෝප වූ මහජනතාවගෙන් ගුටි කෑවේද මේ දේශබන්දු තෙන්නකෝන්ය.
පුවත් අගය අනුව නම් විකාශය කළ යුත්තේ හා රාජසභා මණ්ඩපය හා හෙරෝයින් විනාශ කිරීම යන පුවත්වලට පෙර විකාශය කළ යුත්තේ වැඩ බලන පොලිස්පතිවරයා සම්බන්ධයෙන් ශ්‍රේෂ්ඨාධිකරණය ලබාදුන් තීන්දුවයි. එහෙත් එය එසේ නොවුයේ මෙම මාධ්‍යවල ඇත්ත තත්වය සාමාන්‍ය ජනතාවට පවා මොනවට පැහැදිළි කරමිනි.
දේශබන්දු තෙන්නකෝන් වැඩ බලන පොලිස්පතිවරයා වන නිසා ධුරාවලිය අනුවද ඔහු සිටින්නේ වැදගත්කමින් ඉහළය. එමෙන්ම ශ්‍රේෂ්ඨාධිකරණය ඔහු පුද්ගලයකුට වධහිංසා කිරීම සම්බන්ධයෙන් සෘජුවම සම්බන්ධ වී ඇති බව නිගමනය කිරීම එම ප්‍රවෘත්ති අගය තවත් වැඩි කරන්නකි.
දේශබන්දු තෙන්නකෝන්ව වැඩ බලන පොලිස්පතිවරයා බවට පත්කිරීම සම්බන්ධයෙන් ජනාධිපතිවරයාගේ එම පත්වීමට අනුමැතිය ලබාදුන් ආණ්ඩුක්‍රම ව්‍යවස්ථා සභාවේ ඒකමතිකත්වයක් නැතිකමද, එම වැඩ බලන පත්කිරීම සම්බන්ධයෙන් කතෝලික සභාව ඇතුළු පාර්ශ්ව ගණනාවක් විරුද්ධත්වය ප්‍රකාශ කිරීමේ තත්වය අනුවද, දේශබන්දු තෙන්නකෝන් ගැන අධිකරණය ඉදිරියේ හා වෙනත් ආකාරයට ඇති චෝදනා සම්බන්ධයෙන් ගත් කලද මෙම ප්‍රවෘත්තියේ අගය වැඩිවීම වැළැක්විය නොහැකිය.
එහෙත් නවකයන්ට ජනමාධ්‍ය පාඨමාලා පවත්වන සිරස නාලිකාවට පවා එය ප්‍රවෘතියක් නොවීම පෙන්නුම් කරන්නේ ජරාජීර්ණ දේශපාලනය හා මාධ්‍ය අතර ඇති ප්‍රවෘත්ති හැංගීමේ අන්තර් සම්බන්ධතාව කෙතරම්ද යන්නය.
වැඩ බලන පොලිස්පති තනතුරට පත් කිරීම සම්බන්ධයෙන් මෙතරම් විරෝධතා එල්ල වූ පුද්ගලයකු වධහිංසා කිරීම සම්බන්ධයෙන් පුද්ගලිකවම වගකිව යුතු බවට ශ්‍රේෂ්ඨාධිකරණය තීන්දු කිරීම එම පුද්ගලයා එම වැඩ බලන තනතුරට තවදුරටත් සුදුසුද යන්න සාකච්ඡාවට ලක්කළ යුතු තත්වයකි. එමෙන්ම ජනාධිපතිවරයාගේ පත්කිරීම් සම්බන්ධයෙන් ප්‍රශ්න කළ යුතු තත්වයකි. එසේම වධහිංසාවට ලක්නොවී ජීවත්වීමේ අයිතිය තහවුරු කළ යුතු පොලීසියේ ප්‍රධානියාම එය කඩකර ඇති තත්වයක් යනු සුළු දෙයක් නොවන බරපතළ තත්වයකි.
එහෙත් ඉහතින් සඳහන් කළ ජනතාවගේ පෙර ගමන්කරුවන් වන ජනතාවට ඉදිරියෙන් සිටින මාධ්‍යයට එය ඉතා සුළු දෙයක් වී තිබුණි. කොතෙක්ද කියනවා නම් එම රූපවාහිනී නාලිකාචල ප්‍රධාන ප්‍රවෘත්ති විකාශවල සාමාන්‍ය ප්‍රවෘත්තියක් වශයෙන් හෝ විකාශය කිරීමට තරම් නොවන දෙයක් බවට පත්වී තිබුණි.
වර්තමානයේ වැඩ බලන පොලීසියේ ප්‍රධානියාගේ ඇත්තතත්වය මේ රටේ ජනතාව දැනගත යුතු නැතිද? මේ රටේ ජනතාව දැන ගත යුත්තේ හෙරෝයින් විනාශ කිරීම වැනි ජනතාව අතර ඔහුගේ ප්‍රතිරූපය ඉහළ නංවන සෝබන වැඩ පමණක්ද? මෙම නාලිකා උත්සාහ කරන්නේ එම තනතුරට ඔහුව නිර්දේශ කළ පොලිසිය බාර ඇමති ටිරාන් අලස්ගේ හා පත්කිරීම කළ ජනාධිපතිගේ ක්‍රියාවන් ඒ ආකාරයට ප්‍රවෘත්ති හැංගීම මගින් සාධාරණය කිරීමටද?
රටේ ආණ්ඩුක්‍රම ව්‍යවස්ථාවෙන් සහතික කර ඇති වධහිංසාවට ලක් නොවී ජීවත්වීමේ පුරවැසියන්ගේ අයිතිවාසිකම කඩකළ පුද්ගලයකු ප්‍රධානත්වය දරන පොලීසියකින් තවදුරටත් පුරවැසියන්ට වධහිංසාවෙන් තොරව ජීවත් වීම සම්බන්ධයෙන් සහතිකයක් ලබාගත හැකිද? එම ප්‍රවෘත්තිය හැංගීම වෙනුවට එය විකාශය කර මෙම මාධ්‍ය ඇසිය යුතුව තිබුණ එක් ප්‍රශ්නයක් වන්නේ එයයි.
එමෙන්ම ශ්‍රේෂ්ඨාධිකරණ තීන්දුව අනුව ජාතික පොලිස් කොමිසම වැඩ බලන පොලිස්පති දේශබන්දු තෙන්නකෝන් සම්බන්ධයෙන් ගන්නා විනය ක්‍රියාමාර්ග කවරේද යන්නද ප්‍රශ්න කළ යුතුව තිබුණි. පුද්ගලයකුට වධහිංසා කිරීම සම්බන්ධයෙන් දේශබන්දු තෙන්නකෝන්ට එරෙහිව නීතිපතිවරයා කටයුතු කරන්නේද යන්නද විමසිය යුතුව තිබුණි.
එහෙත් එවැනි ප්‍රශ්න කිරීමකට මෙහා තිබෙන එම ප්‍රවෘත්තිය විකාශය කිරීම පවා නොකළ මෙම මාධ්‍ය එවැන්නක් සිදුකරතියි බලාපොරොත්තු විය නොහැකිය. එසේ වුවද වෙනත් පුද්ගලයින් හා දේවල් සම්බන්ධයෙන් සිදුකරන පසු විපරම් හා ප්‍රශ්න කිරීම් වැනි දේවල් නම් මහා මාධ්‍ය කර්ත්‍යවයක් ලෙස හුවා දක්වමින් එම මාධ්‍ය සිදුකරයි. එහිදී එම නාලිකාවල රෙද්ද පල්ලෙන් බේරෙන්නේ සත්‍යයේ සටහන්, සත්‍යය ප්‍රථමයෙන්, පැත්ත ගියත් ඇත්ත කියන හා අංක එකේ යන අයිසින්ය.
