සංවිධානාත්මක අපරාධකාරයන්ගෙන් රන් තැටි පිළිගන්න
දේවාලේ රන්තැටිය පරෙස්සම් කරගන්න බැරි
කඳ සුරිඳුන්ගෙන්
එන්න, අපි පිහිට යදිමු
මිනිසුන් කතරගම යන්නේ තමන්ගේ දුක්ගැහැටවලට පිහිටක් පතාය. නැතිනම් තමන්ගේ බලාපොරොත්තු ඉෂ්ට සිද්ධ වන්නට ප්‍රාර්ථනා කරන්නටය. තමන්ගේ යාදිනි වෙනුවෙන්, රුහුණු කතරගම දේවාලයට දුරුකතර ගෙවා එන බැතිමත්හු, මැණික් ගඟෙන් නා පේ වී පෝලිම් ගැසී දේවාලයට පිවිස විවිධාකාර පුද පඬුරු පූජා කරති. සමහර විට ඒ අතේ මිටේ තියෙන සල්ලිවලින්ම නොවේ. එක්කෝ ණය වෙලාය. නැතිනම් අතමාරුවලින්ය.
පලතුරු වට්ටියේ සිට රිදී, මුතු-මැණික්, රත්තරන් මාල, රත්තරන් තැටි, රත්තරන් රූප දක්වා මේ පුදපඬුරුවල පරාසය දිවෙයි. මේ යාදිනි හා ප්‍රාර්ථනා අසන්නට කතරගම දේවාලයේ ඉන්නේ ස්කන්ධ කුමාර හවත් කඳ සුරිඳු හෙවත් කතරගම දෙවියන්ය. දේවාලයේ තිරය ඇතුළේ ඉන්නා ස්කන්ධ කුමාරට, මුහුණු හයක් හා අත් දොළසක් තිබුණත්, මේ ජනගංගාව එකා පස්සේ එකා ගෙනැවිත් දෙන පුද පඬුරු භෞතිකව භාරගන්නට අත් දිගු කරන්නට නොහැකිය. ඒ හින්දා, ඒ වැඩේ බාරගෙන තිබෙන්නේ කපුවන්ය. දේවාලයේ කපුවෝ, දෙවියන්ට යාදිනි කියා, දෙවියන් වෙනුවෙන් පුද පූජා භාරගනිති.
මිනිසුන්ට හැමදාම කුතුහලයක්ව තිබුණේ, මේ දේවාලයට ලැබෙන පුදපඬුරු යන්නේ කොහාටදැයි කියාය. (එහෙත් බහුතරයක් අන්ධ බැතිමතුන්ට නම් ඒ ගැන හාංකවිසියක් නැත.) පසුගිය සතියේ දේවාලයේ රන්තැටියේ අතුරුදන්වීම පිළිබඳ සිද්ධියෙන් ඒ ගැන අවබෝධයක්ද මහජනතාවට ලැබී තිබේ. දේවාලයේ කපුවෝ 15කි. ඔවුන්ගෙන් ජ්‍යෙෂ්ඨයා මහ කපුරාළය. දේවාලයට බැතිමතුන් පුදන පූජා වට්ටිවල උඩින්ම කාටත් පෙනෙන සේ ගසා තිබෙන සල්ලි කොළ හෝ වෙනත් වටිනා දේ මේ කපුරාළලා තමන්ගේ පරිභෝජනයට ගනිති.
ඒ සඳහා එකඟ වූ පිළිවෙළකට ඔවුන්ගෙන් එකෙකු බැගින් මාසයක පුදපූජා බාරව කටයුතු කරති. ඒ මාසයේ ලැබෙන පුද පඬුරු ඒ කපුවාටය. ඒ කියන්නේ කපුරාළ රස්සාවට ලැබෙන ‘පාරිතෝෂිකය’ ඒකය. පාරිතෝෂිකය යැයි කිව්වේ, මේ කපුරාළලාට කතරගම දේවාලයෙන්ද වැටුපක් ලැබෙන හෙයිනි. සාම්ප්‍රදායිකව ඒ වැටුප ‘වර්ෂයකට’ රුපියල් 2.82කි. කපුරාළලාට හැර අනිත් අයට මාසික වැටුපක්, ගොවිතැන් බත් කරන්නට වෙනම නින්දගම්, භුක්ති විඳින්න ඉඩම් වෙනම ලබා දී තිබේ.
ඒ වුණාට, කපුවන්ට ලැබෙන පාරිතෝෂිකය නම් ලේසි පහසු නැත. ආදායම අඩුම සාමාන්‍ය කාලයකදී වුණත් මාසයකට දේවාලයට ලැබෙන මුදල රුපියල් ලක්ෂ 400ක් විතර බව දේවාලයේ බස්නායක නිලමේ ඩිෂාන් ගුණසේකර කියයි. අගෝස්තු මාසයේ, ඒ කියන්නේ දේවාලයේ පෙරහැර තිබෙන මාසයේ එහි ආදායම ලක්ෂ 800ක් පමණලු. ඒ මාසයේ පූජාවල පඬුරු ලබාගන්නේ ප්‍රධාන කපුරාළ වන සොමිපාල රත්නායකය.
පූජා වට්ටිවල තිබෙන මුදල්වලින් සතයක්වත් දේවාලයේ ප්‍රධාන ගිණුමට නොලැබෙන බව බස්නායක නිලමේ කියයි. ඒ මුදල් සම්පූර්ණයෙන්ම කපුරාළලා පුද්ගලික පරිහරණයට ගනිති. දේවාලයේ පිං පෙට්ටියට ලැබෙන මුදල් නම් රුපියල් දෙක, එක වුණත් හරියට ගැන දේවාලයේ ප්‍රධාන ගිණුමට බැර කෙරෙන්නේ බෞද්ධ කටයුතු කොමසාරිස් දෙපාර්තමේන්තුවේ නිලධාරීන් විසිනි.
දේවාලයේ හා බෞද්ධ කටයුතු දෙපාර්තමේන්තුවේ නියමයන්ට අනුව, දේවාලයට ලැබෙන රන් භාණ්ඩ, බස්නායක නිලමේ කාර්යාලයට බාරදිය යුතුය. එවිට රන් භාණ්ඩයේ බර කිරා, එහි භෞතික ලක්‍ෂණ ලේඛනගත කර එය බෞද්ධ කටයුතු දෙපාර්තමේන්තුවට ඉදිරිපත් කළ යුතුය. එම භාණ්ඩය දේවාලයට ලැබීමෙන් පසුව මාසයේ තේවා භාර කපුරාළ භාරගෙන එය දේවාල මාලිගයේ තැන්පත් කරයි. මාස කිහිපයකට වරක් බෞද්ධ කටයුතු දෙපාර්තමේන්තුවේ නිලධාරීහු එහි පැමිණෙති. දේවාල මාලිගයේ එකතු වී තිබෙන රන් භාණ්ඩ බැංකුවකට ඉදිරිපත් කර බර කිරා ලේඛනගත කර, නැවත දේවාලයේ තැන්පත් කරති. ඒ අනුව දේවාලයට අදාළ සියලුම භාණ්ඩ ලේඛනගත වෙයි. එතැන් සිට ඒවා පවතින්නේ ගබඩා භාරකාර කපුරාළ භාරයේය. කතරගම දේවාලය සහ ඊට අයිති දේපළවල නීත්‍යනුකූල භාරකාරයා බස්නායක නිලමේය. බැතිමතුන් පූජා කරන භාණ්ඩවල වගකීමද ඔහුටය.
මොනරාගල සහ බදුල්ල දිස්ත්‍රික්කවල මෙන්ම කොළඹද දේවාලයට අයිති ඉඩකඩම් අක්කර 97,000ක් පමණ තිබී ඇත. විවිධ හේතු නිසා අද වන විට එයින් තිබෙන්නේ අක්කර 33,000ක් බව බස්නායක නිලමේ කියයි. පැල්වත්ත සීනි සමාගම පිහිටුවා තිබෙන්නේද කතරගම දේවාලයට අයත් ඉඩම්වලය. දේවාලයට පූජා කෙරෙන රන් රිදී, මුතු-මැණික් තැන්පත් කර තිබෙන්නේ දේවාල මාලිගාව තුළය. මාලිගාව ඇතුළට යෑමට ඕනෑම කෙනකුට නොහැකිය. දේවාලයේ කපුරාළලා 14 දෙනාටත් බස්නායක නිලමේවරයාටත් පමණක් එහි ඇතුළු විය හැකිය. ඒ නිසා මාලිගාව තුළ තැන්පත් කර ඇති පූජා භාණ්ඩ ගැන වගකීම ඇත්තේ බස්නායක නිලමේ හා මේ කපුරාළලා පිරිසටය.
අංගොඩ ලොක්කාගේ රන් තැටිය
මද්දුමගේ චන්දන ලසන්ත පෙරේරා හෙවත් අංගොඩ ලොක්කා කියන්නේ රටේ නමගිය සංවිධානාත්මක අපරාධකාරයෙකි. 2020 ජුලි 3 වැනිදා, තමිල්නාඩුවේ කොයිම්බතුර් චේරන් මානගර් ආසන්නයේ බාලාජි නගර්හි කුලියට ගත් නිවසක් තුළදී අංගොඩ ලොක්කා හෘදයාබාධයක් හැදී මියගිය බවට ඉන්දීය පොලිසිය එහි මහේස්ත්‍රාත් අධිකරණයට වාර්තා කළේය. ඒ වන තෙක් අවුරුදු දෙකක පමණ කාලයක් ඔහු, ප්‍රදීප් සිං නමැති බොරු නමකින් එහි වාසය කර තිබුණේය. එම නිවසේ ඔහු සමග සිටි අමානි තන්ජි නමැති විසි හත් හැවිරිදි ශ්‍රී ලාංකික කාන්තාවක, ඔහු රෝහලට ඇතුළත් කර තිබුණු නමුත් ඒ වන විටත් ඔහු මියගොස් තිබුණේය. කොයිම්බතූර් වෛද්‍ය විද්‍යාල රෝහලේදී පශ්චාත් මරණ පරීක්‍ෂණයක් පැවැත්විණි. ඉන් පසු, මදුරෙයිහි නීතිඥවරියක මැදිහත්වී ඔහුගේ සිරුර 2020 ජුලි 5 වැනිදා මදුරෙයිහිදී ආදාහනය කරන ලද බව කියැවෙයි.
ප්‍රදීප් සිංගේ ඇත්ත නම එය නොවේයැයි හෙළිවුණේ ඔහුගේ ‘ආධාර් කාඩ්’ (හැඳුනුම්පත) පොලිසියට ඉදිරිපත් කරනු ලැබීමෙන් පසුව, ඊට අදාළ ලේඛන පරීක්‍ෂාවේදීය. ව්‍යාජ ලේඛන ඉදිරිපත් කර ව්‍යාජ නමකින් ආධාර් කාඩ්පතක් ලබාගැනීමට ලොක්කාට උදව් වුණේ යැයි කියමින් ඉහත නීතිඥවරිය හා ලාංකික කාන්තාවත් තවත් අයකුත් පොලිසිය අත්අඩංගුවට ගත්තේය.
මියගියේ අංගොඩ ලොක්කාමදැයි තහවුරු කරගැනීමට ලංකාවේ සිටින ඔහුගේ මවගෙන් ඩීඑන්ඒ සාම්පලයක් ලබාගෙන, චෙන්නායිහි විද්‍යාගාරයකදී ලොක්කාගේ ඩීඑන්ඒ සාම්පල් සමග සැසඳීමෙන් මියගියේ ඔහුම යැයි නිගමනය කළ බව පොලිසිය අධිකරණයට වාර්තා කර තිබිණ. එහෙත් පසුව කියැවුණේ ලොක්කා මියගියේ විරුද්ධ අපරාධ කල්ලියක් විසින් වස ශරීරගත කිරීම නිසා බවයි. ඒ ගැන තොරතුරු අපේ මූලික කතාවට අදාළ නොවේ.
අංගොඩ ලොක්කා ඉන්දියාවේ සිටියේ, සැදැහැ සිතින් දඹදිව වන්දනාවකට ගොස් නොවේ. ලංකාවේදී සමූහ ඝාතනයක් කර නීතියට හසුවේය කියන බිය නිසාය. 2017දී කළුතර එතනමඬලේදී බන්ධනාගාර බස්රියකට මාෆියා පන්නයේ වෙඩි තැබීමක් කර සමයං නමැති සංවිධානාත්මක අපරාධකරුවා ඇතුළු පිරිසක් ඝාතනය කිරීම ගැන චෝදනා එල්ල වුණේ අංගොඩ ලොක්කාටය. ඉන්පසු ඔහු මාකඳුරේ මධුෂ්ගේ සහායෙන් රටින් පැන ඉන්දියාවට ගියේය. ඒ සිදුවීමට අමතරව, මත්ද්‍රව්‍ය ජාවාරම්, මිනිමැරුම් හා කප්පම් ගැනීම් රාශියක් ගැන අංගොඩ ලොක්කාට චෝදනා තිබේ.
හැබැයි, කතරගම දෙයියා, මේ වගේ නමගිය අපරාධකාර චරිතයක් තිබෙන අංගොඩ ලොක්කා වැනි කෙනකුගෙන් වුවද පුද පඬුරු ලබාගන්නට පැකිළෙන්නේ නැත. එය එසේ මෙසේ පඬුරක්ද නොවේ. පවුම් 38ක් බර රත්තරන් තැටියකි. අද වටිනාකමට බැලුවොත් එය රුපියල් හැට ලක්‍ෂයකට වඩා වටියි. ඒ කාලයේ එහි වටිනාකම ලක්ෂ හතලිහක් පමණ වෙතැයි කියති.
රන් තැටිය කතරගම දෙවියන්ට පුජා කළේ අංගොඩ ලොක්කාගේ බිරියය. රත්නපුර කොලොන්න ගොඩවෙල ඕමල්පේ පැත්තේ වසන ඇය කතරගම ගොස් මේ රන්තැටිය පූජා කළේ ලොක්කාගේ දරුවාගේ අපල දුරුවීම සඳහා, 2019 ජුනි 3 වැනිදාය. මුලින් පූජා කරන්නට සිතුවේ පවුම් 5ක තැටියකි. පසුව අංගොඩ ලොක්කාගේ බරට ගැළපෙන ලෙස පවුම් 38ක් දක්වා අගය ඉහළ දැම්මේ දේවාලයේ කපුරාළලාම බව පොලිස් පරීක්‍ෂණවලදී ඇය කියා තිබේ. දේවාලයට රන්තැටිය පුජා කරන අවස්ථාවේදී ඇය එහි ඡායාරූපයක් ගෙන තිබිණ. එයින් කාලයකට පසුව රන්තැටිය දේවාල ගබඩාවෙන් අතුරුදහන්ව ඇති බවට දූරකථන පණිවිඩයක් බස්නායක නිලමේ ඩිෂාන් ගුණසේකරට ලැබිණ. ඒ 2021 ඔක්තෝබර් 17 වැනිදාය.
‘බස්නායක නිලමේතුමනි, මෙය පවුම් 38කින් යුත් පූජා භාණ්ඩයකි. 2020 සැප්තැම්බර් 03 දින මෙය රැගෙන ගොස් ඇත. එය විකුණා ඇත. දැනට මකවා තිබේ. මෙය නැවත සාදා දේවාලයේ මාලිගාව තුළට රැගෙන ඒමට සැලැස්මක් ඇති බවට තොරතුරු ඇත.’ ඒ පණිවිඩයෙන් කියැවිණි. බස්නායක නිලමේ මේ ගැන බෞද්ධ කටයුතු දෙපාර්තමේන්තුවට දැන්වීය. ඉන්පසු ඔහු විසින් පොලිස්පති සී.ඩී. වික්‍රමරත්න දැනුවත් කරන ලදි. ඒ 2021 ඔක්තෝබර් 19 වැනිදාය.
පොලිස්පතිගේ නියෝග මත රන් තැටිය අතුරුදන්වීම ගැන බස්නායක නිලමේ විසින් කරන ලද පැමිණිල්ලේ විමර්ශන කොළඹ අපරාධ කොට්ඨාසය වෙත භාර කෙරිණි. පොලිස් නිලධාරීහු කපුරාළලා, නිලමේ ඇතුළු පිරිසගෙන් ප්‍රකාශ සටහන් කර ගත්තෝය. පසුව ලොක්කාගේ බිරිය, එනම් අබේසිංහගේ නිසංසලාගේ ප්‍රකාශයක්ද සටහන් කෙරිණ. ‘මම 2012 ජුනි 30 ලසන්තත් එක්ක විවාහ වුණා. එයාට දාව මට පුතෙක් ඉන්නවා. ලසන්ත 2017 ඉන්දියාවට පැනලා ගියා. එහේ ඉඳන් කතා කළා. වියදමට මුදල් එව්වා. 2019 අවුරුද්දේ කතා කරපු වෙලාවක කතරගම දේවාලයට පූජාවක් කරන්න ඕන කිව්වා. පුතාගේ නමින් රත්තරන්වලින් පූජාවක් කරන්න කිව්වා.’
රත්තරන් බිස්කට්වලින්ම ලැබේ
පූජාව කරන්නට, පවුම් 38ක මේ සා රත්තරන් ප්‍රමාණයක් මේ කාන්තාවට ලැබුණේ කොහොමද? අංගොඩ ලොක්කා වැනි සංවිධානාත්මක අපරාධකාරයකුට නම් එය සිම්පල් වැඩකි. ඒවා ඔවුන්ගේ රත්තරන් බැංකුවල ගබඩා කර තිබේ. රත්තරන් ලැබුණේ ගෝල්ඩ් බිස්කට් හැටියටමය. ඒවා උණුකර තැටිය හැදුවේ, කතරගම රත්තරන් බඩු හදන කෙනෙකි. මේ කාන්තාව හා ඇගේ ඥාතීන් තැටිය පූජා කිරීමට පෙර නැවතී සිටි කතරගම නව නගරයේ හෝටලයක අරක්කැමියකු වන සුජිත් ප්‍රසන්න, මේ පූජාව සඳහා ඇයට උදව් වී තිබේ.
‘හෝටලයට ආපු නෝනා කෙනෙක් කිව්වා කතරගම දේවාලයට රත්තරන් පැන් භාජනයක් පූජා කරන්න ඕන, ඒකට මට උදව් කරන්න පුළුවන්ද කියලා. මම පත්තිනි දේවාලයේ අමිලට විස්තරේ කියලා එයාව ගෙන්නා ගත්තා. පස්සේ නෝනාවයි එයාගේ දරුවාවයි තවත් නෝනලා දෙන්නෙකුයි කිරි වෙහෙරට එක්කගෙන ගිහිල්ලා වැන්දාට පස්සේ කතරගම දේවාලයට ගිහින් තැටිය පූජා කළා. ඒ තැටිය භාර ගත්තේ සොමිපාල රත්නායක ලොකු කපු මහත්තයා. ඒ රන් පැන් භාජනයේ දිනය සහ නම කොටා තිබුණා.’
‘අංගොඩ ලොක්කා ‘ඉමෝ’වලින් මට කතා කරලා කිව්වා දේවාලයට රත්තරන් තැටියක් පූජා කරන්න හදලා දෙන්න කියලා. පස්සේ මම කඩුවෙලට ගියා. අංගොඩ ලොක්කා එවපු දෙන්නෙක් මට රත්තරන් බිස්කට් වගයක් දුන්නා. පස්සේ ඒවා කතරගම රත්තරන් බඩු හදන කෙනකුට දීලා තැටිය හදාගත්තා. පස්සේ තමයි ඒ නෝනා (බිරිය) ඒක දේවාලයට පූජා කළේ. ඒකත් පින්තූර ගත්තා. පස්සේ අංගොඩ ලොක්කා මට වියදමට ලක්ෂ දෙකක් එව්වා.” මේ අරක්කැමියා පොලිස් පරීක්‍ෂණවලදී පවසා තිබේ.
කපුරාළගේ රන්තැටිය
2021 ඔක්තෝබර් 25 වැනිදා කතරගම සෙල්ල පාරේ පදිංචි අජිත් කුමාර බස්නායක නිලමේ හමුවන්නට පැමිණ තිබිණ. නිලමේ නොසිටි නිසා ඔහුගේ පරිපාලන ලේකම් මුණගැසී තිබේ. ඒ රන් පැහැති තැටියක්ද සමඟිනි. ඔහුගෙන් රන් තැටිය සම්බන්ධයෙන් කරුණු විමසීමෙන් අනතුරුව නිලමේද දැනුවත් කිරීමෙන් පසු පැමිණියේ ඇයිදැයි විමසා ලිඛිත සටහනක්ද ගැනීමට ලේකම් පියවර ගෙන තිබේ. තමා ප්‍රධාන කපුරාළ සොමිපාල රත්නායකගේ නිවෙසට ගිය අවස්ථාවේ දේවාලයට අයත් රන් බන්දේසියක් ගෙදර තිබෙන බවත් එම බන්දේසිය දේවාලයේ පරිපාලන ලේකම් වෙත භාරදෙන ලෙසත් කියා බන්දේසිය තමාට දුන් බවත්, එම බන්දේසිය දේවාලයට ගෙනැවිත් පරිපාලන ලේකම්ට ලබාදුන් බවත් ඔහුගේ සටහනෙහි අඩංගුය.
පසුව නැවතත් ප්‍රකාශයක් පොලිසියට ලබාදෙමින්, බස්නායක නිලමේ කියා ඇත්තේ, දේවාලයේ ඉවුම් පිහුම් කරන සුජිත් සහ පත්තිනි දේවාලයේ සමන් ප්‍රියන්ත කපුරාළගේ මැදිහත්වීම මත පැමිණි බැතිමතකු රුහුණු මහා කතරගම දේවාලයට පවුම් 38ක් පමණ බර රත්තරන් තැටියක් 2019 පෙරහැර මාසයේදී පූජා කර ඇති බවය. පූජා කළ අවස්ථාවේදීම සමන් ප්‍රියන්ත, එම රත්තරන් තැටිය සොමිපාල රත්නායක වෙත භාර දී දේවාලයේ තැන්පත් කර ඇති බවටද ගුණසේකර සිය පැමිණිල්ලෙන් කරුණු ඉදිරිපත් කර තිබිණ.
ඉන් දින කිහිපයකට පසු එම තැටිය පේ කර එය පූජා කළ බැතිමතාටම නැවත භාරදී ඇති බවට සමන් ප්‍රියන්ත දැනුම් දුන් බවත්, ඒ බැතිමතා කවුදැයි විමසූ විට කවුදැයි නොදන්නා බවට ඔහු ප්‍රකාශ කළ බවත් බස්නායක නිලමේ සිය ප්‍රකාශයේ සඳහන් කර තිබිණ. අවසානයේ ‘දේවාලයට අගෞරවයක් වන බැවින්’ මෙම රන් තැටිය නැවත සකස් කර දේවාලයට භාර දීමට සමන් ප්‍රියන්ත කපුරාළ 2021 ඔක්තෝබර් 25 වැනිදා කටයුතු කර තිබිණි. ඒ අනුව එදින දේවාලයේ ප්‍රධාන කපු මහතාගේ නිවෙසට ගොස් ඇති සමන් ප්‍රියන්තට ප්‍රධාන කපුරාළ නිවසේ තිබූ රන් තැටියක් ලබාදී එය දේවාලයේ පරිපාලන ලේකම් වෙත භාර දෙන ලෙස දැනුම් දී ඇත.
සමන් ප්‍රියන්ත නොහොත් චූටි කපු මහත්තයාගෙන් ද පොලිසිය ප්‍රකාශ සටහන් කරගෙන තිබිණ. ප්‍රධාන කපු මහතා හෙවත් මුත්තා බේරා ගැනීම සඳහා රන් තැටිය මකා වෙනත් තැටියක් නිර්මාණය කළ කතරගම මාලන් නමැත්තාට රුපියල් ලක්ෂ 41ක් දී නැවත රන් තැටියක් සදා දුන් බව ඔහු පොලිසියට සඳහන් කර ඇත.
කොළඹ අපරාධ කොට්ඨාසය අදාළ රන් බන්දේසිය අත්අඩංගුවට ගෙන තිබුණේ 2021 නොවැම්බර් 02 වැනිදාය. වැඩිදුර විමර්ශනවලින් පසු නීතිපතිවරයාට මෙම සිද්ධියේ උද්ධෘත යොමු කිරීමට ද පියවර ගෙන තිබිණ. ඒ අනුව දෙසැම්බර් 07 වැනිදා නීතිපතිවරයා උපදෙස් ලබා දී තිබුණේ මෙහි සැකකරුවන් අත්අඩංගුවට ගෙන අධිකරණයට ඉදිරිපත් කරන ලෙසය. අත්අඩංගුවට ගැනීමට නියෝග නිකුත් වී ඇත්තේ කතරගම මහා දේවාලයේ ප්‍රධාන කපුරාළ වන සොමිපාල රත්නායක සහ එම දේවාලයේ ගබඩාව භාරව සිටින ප්‍රධාන කපුරාළගේ මුණුපුරා වන සමන් ප්‍රියන්ත නොහොත් චූටි කපුරාළය.
මේ කරුණු කාරණා අනුව සාමාන්‍ය සිහිබුද්ධියක් තිබෙන ඕනෑම මිනිසකුගේ හිතට නැගෙන දේවල් කිහිපයකි. කතරගම දෙවියා, සංවිධානාත්මක අපරාධකාරයකුගෙන් රත්තරන් තැටියක් පූජාවක් ලෙස ලබාගෙන තිබේ. මේ අපරාධකාරයා, කළුතරදී බන්ධනාගාර බසයකට වෙඩි තබා අමු අමුවේ මිනිසුන් මරා ඉන්දියාවට පැනගොස් සිටියෙකි. ඒ බව තම දිව්‍ය නේත්‍රාවලින් දකින්නට කතරගම දෙවියාට මගහැරී තිබේ.
ඒ තැටිය සාදා ඇත්තේ රත්තරන් බිස්කට්වලිනි. ඒ රත්තරන් බිස්කට්, පිළිගත් බැංකුවක සේප්පුවේ අංගොඩ ලොක්කාගේ නියම නමින් නීත්‍යනුකූලව තැන්පත් කර ඇති ඒවා වන්නට බැරිය. ඒ බව තම දිව්‍ය නේත්‍රාවලින් දකින්නටද කතරගම දෙවියාට මගහැරී තිබේ. එලෙස පිළිගත් රන් තැටිය, සොරකම් කළායැයි චෝදනා ලබා අත්අඩංගුවට ගැනීමට නියමිතව සිටින්නේ ප්‍රධාන කපුරාළ සහ ගබඩාව බාරව සිටි තවත් කපුරාළ කෙනෙකි. මේ පතාක හොරකම තම දිව්‍ය නේත්‍රාවලින් දකින්නටද කතරගම දෙවියාට බැරිවී තිබේ. සොරකම් කළායැයි කියන තැටිය මකවා, පසුව වෙනත් තැටියක් හදා එය දේවාලයේ තැන්පත් කර තිබේ. ඊට විරුද්ධව යමක් කරන්නටද කතරගම දෙවියාට බැරිවී තිබේ.
2019 පූජා කළ තැටිය හොරකම් කළ බව පැමිණිලි කරන්නට සිදුවෙන්නේ පොලිසියටය. කතරගම දෙවියන්ට ඒ හොරා ගැන දැනීමක් නැති නිසා වෙන්නට පුළුවන. පොලිසියත් නීතිපතිත් සොරකමට සැකකරුවන් සොයාගන්නා තුරු කතරගම දෙවියාට හෙවත් ස්කන්ධ කුමාරට කිසිවක් කරගත හැකි වී නැත. ඒ කිසිවක් වුණාට කමක් නැත, එන්න, අපේ සකලවිධ දුක්ගැහැටවලට සරණ පතා දිගටම කතරගම දෙයියාට අපේ දුක කියමු. පූජා වට්ටි තියමු.
