No menu items!
28.5 C
Sri Lanka
22 June,2024

රේගුවේ රෙදි ගැලවූ මන්ත‍්‍රී අලි සබ්රි

Must read

10%ක දඩය ගෙවා මන්ත‍්‍රී ගෙදර යයි
ප‍්‍රංශ ජාතිකයාට 100% දඩය ගෙවීමට බැරිව රිමාන්ඩ්

කටුනායක ගුවන් තොටුපළේ ප‍්‍රභූ පර්යන්තය හරහා රටට පැමිණීමේදී රුපියල් මිලියන 78ක වටිනාකමකින් යුත් රත‍්‍රං හා ජංගම දුරකථන සමග අත්අඩංගුවට පත්ව දඩය ගෙවා නිදහස් වූ පුත්තලම් දිස්ත‍්‍රික් පාර්ලිමේන්තු මන්ත‍්‍රී අලි සබ්රි රහීම් මේ වනවිට ශ‍්‍රී ලංකා රේගුව නිරුවත්භාවයට පත්කර ඇත. ඒ මන්ත‍්‍රී අලි සබ්රි රහීම් අත්අඩංගුවට ගැනීමේ සිදුවීමෙන් සති දෙකක කාලයකදී කටුනායක ගුවන් තොටුපළෙන්ම මෙරටට පැමිණීමේදී රත‍්‍රං හා ස්වර්ණාභරණ සමග අත්අඩංගුවට ගත් ප‍්‍රංශ ජාතිකයාගේ සිදුවීමත් සමගය.

මන්ත‍්‍රී අලි සබ්රි රහීම් ශ‍්‍රී ලංකා රේගුව අත්අඩංගුවට ගත්තේ රේගුවට ප‍්‍රකාශ නොකර රත‍්‍රං කිලෝ 3.39ක් හා ජංගම දුරකථන 79ක් ප‍්‍රභූ පර්යන්තය හරහා පසුගිය මැයි 23 වැනිදා රටට ගෙන එමින් තිබියදීය. එහිදී මන්ත‍්‍රීවරයා එක් දිනක් තුළ රේගුවෙන් නිදහස් වී පාර්ලිමේන්තුවටද පැමිණ මහජන උපයෝගිතා කොමිසමේ සභාපතිවරයා ඉවත් කිරීමේ යෝජනාවට අදාළව ඡන්දයද භාවිත කළේය. ඒ ඔහු විසින් ප‍්‍රකාශ නොකර රටට ගෙන ආ රත‍්‍රං හා ජංගම දුරකථන රාජසන්තක කිරීමෙන් පසු ඒ සඳහා පැනවූ රුපියල් මිලියන 7.4ක දඩය ගෙවීමෙන් පසුය.

ප‍්‍රකාශ නොකර රුපියල් මිලියන 85ක් පමණ වටිනා රත‍්‍රං හා ස්වර්ණාභරණ කිලෝ 4 ග‍්‍රෑම් 611ක ප‍්‍රමාණයක් රටට ගෙන ඒම සම්බන්ධයෙන් ප‍්‍රංශ ජාතිකයා ශ‍්‍රී ලංකා රේගුව අත්අඩංගුවට ගනු ලැබුයේ ජුනි 03 වැනිදා වන අතර ඔහු ගෙන ආ රත‍්‍රං හා ස්වර්ණාභරණ රාජසන්තක කරමින් රේගුව පනවා තිබූ දඩය වූයේ රුපියල් මිලියන 70කි. එම දඩය ගෙවීමට නොහැකි වූ හෙයින් ප‍්‍රංශ ජාතිකයා මීගමුව මහේස්ත‍්‍රාත් අධිකරණයට ඉදිරිපත් කිරීමෙන් පසු රිමාන්ඩ් භාරයට පත් කරනු ලැබීය. 

මේ සමගම මීට සති තුනකට පෙර දැඩි කතාබහකට ලක්වූ මන්ත‍්‍රී අලි සබ්රි රහීම්ගේ සිදුවීම යළි ආන්දෝලනයකට ලක්වී ඇත. ඒ මන්ත‍්‍රීවරයාට ශ‍්‍රී ලංකා රේගුව ගැසූ දඩය හා ප‍්‍රංශ ජාතිකයාට ගැසූ දඩය අතර විශාල වෙනස පදනම් කරගනිමින්ය. මන්ත‍්‍රීවරයා හා ප‍්‍රංශ ජාතිකයා සිදුකළ වරද හා වරදේ ප‍්‍රමාණය ආසන්න වශයෙන් එක සමානය. දෙදෙනාම ප‍්‍රකාශ නොකළ රත‍්‍රං හා තවත් භාණ්ඩ නීති විරෝධීව ශ‍්‍රී ලංකාවට ගෙනැවිත් තිබුණි. දෙදෙනාම සිදුකළ වරදේ ප‍්‍රමාණය ආසන්න අගයක් ගනී. එහෙත් මන්ත‍්‍රී අලි සබ්රි රහීම්ට ඔහුගේ නීති විරෝධී භාණ්ඩවල අගය මෙන් සියයට 10ක පමණ ප‍්‍රමාණයක් දඩය ලෙස අයකරන විට ප‍්‍රංශ ජාතිකයාට ඔහුගේ නීති විරෝධී භාණ්ඩල අගය මෙන් සියයට සීයකට ආසන්න දඩයක් නියමකර තිබේ. අද ප‍්‍රංශ ජාතිකයා රිමාන්ඩ් බන්ධනාගාරගතව ඉන්නේ එම දඩය ගෙවා ගැනීමට නොහැකි වීම හේතුවෙනි.

මන්ත‍්‍රීවරයාට සහ ප‍්‍රංශ ජාතිකයාට ගැසූ දඩයේ මෙම කැපී පෙනෙන වෙනස පාර්ලිමේන්තුව තුළදී මෙන්ම ඉන් පිටතදීත් විපක්ෂ නායක සජිත් ප්‍රේමදාස ඇතුළු මන්ත‍්‍රීවරුන් පෙන්වා දෙමින් ප‍්‍රශ්න කර තිබුණි. දඩය පිළිබඳ මෙම වෙනස අනාවරණය වීමට ප‍්‍රථමයෙන්ම විපක්ෂ නායකවරයා ඇතුළු විපක්ෂයේ මන්ත‍්‍රීවරුන් කතානායකවරයාට ලිපියක් යොමු කරමින් ඉල්ලා තිබුණේ හොරෙන් රත‍්‍රං ශ‍්‍රී ලංකාවට ගෙන ඒම සම්බන්ධයෙන් ශ‍්‍රී ලංකා රේගුවෙන් දඩයකට යටත් වූ අලි සබ්රි රහීම් මන්ත‍්‍රීවරයා සම්බන්ධයෙන් පියවරක් ගන්නා ලෙසයි. විපක්ෂය එසේ ඉල්ලීමක් කළද මන්ත‍්‍රීවරයකු පාර්ලිමේන්තුවෙන් ඉවත් කිරීම සම්බන්ධයෙන් රේගු දඩයක් ඉවහල් වේද යන ප‍්‍රශ්නයක්ද මෙහිදී පැනනගී. ඒ ආණ්ඩුක‍්‍රම ව්‍යවස්ථාව අනුව මන්ත‍්‍රී ධුරයට නුසුදුසු වීමට එක් හේතුවක් වන්නේ අවුරුදු දෙකකට වඩා දඬුවම් කළ හැකි වරදක් සම්බන්ධයෙන් අධිකරණයෙන් දඬුවම්  ලබා ඉන් අවුරුදු දෙකක කාලයක් දඬුවම් විඳීම යන අවස්ථාව සම්බන්ධයෙන් පමණක් වන නිසාය.

ශ‍්‍රී ලංකා රේගුව යන්න අති දූෂිත ආයතනයක් බවට විවාදයක් නැත. එහි අන්ත දූෂිත නිලධාරීන්, සාමාන්‍ය වශයෙන් දූෂිත නිලධාරීන්, ටිකක් දූෂිත නිලධාරීන් හා දූෂිත නැති නිලධාරීහුද සිටිති. එමෙන්ම ජාවාරම්කාරයන් එළව එළවා අල්ලන නිලධාරීන් පිරිසක්, එසේ නොවන සාමාන්‍ය ලෙස කටයුතු කරන නිලධාරීන් පිරිසක් හා සාමාන්‍ය ලෙසද කටයුතු නොකරන නිලධාරීන් පිරිසක් එහි සිටිති. ජාවාරම්කාරයන් අල්ලන රේගු නිලධාරීන්ට ඒ මගින් ජීවිත තර්ජනයක්ද එල්ල වන අතර සමහරවිට ජීවිතයෙන් වන්දි ගෙවීමටද සිදුවේ. අමරපාල හා සුජිත් ප‍්‍රසන්න ඝාතන එවැනි දේවල්ය. අනතුරක කටයුතු කරන මෙම නිලධාරීන්ට ඔවුන්ගේ වැටලීම් මගින් ලැබෙන ආදායමෙන් තෑගි ලැබීම සිදුවේ. අනෙකුත් නිලධාරීන්ටත් ඔවුන් සිදුකරන එදිනෙදා රේගු කටයුතුවලදී පනවන දඩ හේතුවෙන් ලැබෙන ආදායමෙන් තෑගි ලැබේ. 

මේ කිසිවක් නැතත්, විශේෂයෙන්ම ශ‍්‍රී ලංකාවට ආනයනය කරන සෑම භාණ්ඩයක් සම්බන්ධයෙන්ම ඒවා නිශ්කාෂණ ක‍්‍රියාවලියේදී අනිවාර්ය නිල නොවන මුදලක් රේතු නිලධාරීන්ට ගෙවීමට සිදුවන බව එම කටයුතුවලට සම්බන්ධයක් ඇති  ඕනෑම අයකු දන්නා කරුණකි. ඒ නිසාම සිය රැකියාවෙන් ලැබෙන මුදලට අමතරව රේගු නිලධාරියකුට වැටලීම් කළත් නැතත් නිල නොවන මුදලක් ලැබීම ශ‍්‍රී ලංකාවේ රේගු කටයුතු සම්බන්ධයෙන් යථාර්ථයයි.

මන්ත‍්‍රී අලි සබ්රි රහීම් දඩය ගෙවා එක් දිනකින් නිදහස් වී පැමිණීමෙන් පසු ඒ පිළිබඳ සැක සංකා මතුවූ අවස්ථාවේදී රේගු සේවයෙන් විශ‍්‍රාම ගොස් ඇති කිහිප දෙනෙකු ලියුම්කරු සමග දැක්වූයේ එකිනෙකට වෙනස් අදහස්ය. එක් අයකු කීවේ මන්ත‍්‍රීවරයාට පනවා ඇති දඩය මෑත ඉතිහාසයේ එසේ පැනවූ විශාලතම දඩය බවත්, එම දඩය පැනවූ නිලධාරීන් ඔවුන්ගේ උපරිමය කර ඇති බවත්ය. ඒ වරදේ ප‍්‍රමාණය මෙන් තුන් ගුණයක් හෝ අවමය රුපියල් ලක්ෂයක් යන එම වරද පිළිබඳ දඩ සීමාව පෙන්වා දෙමින්ය. තවත් අයකු කීවේ දඩය ගණන පිළිබඳ කතාව පැත්තකින් තැබූ විට එම සිදුවීම එතැනින් අවසන් කළ නොහැකි බවයි. ඒ පිළිබඳ රේගුව පුළුල් විමර්ශනයක් කළ යුතු බවයි. එහිදී සිදුවී ඇත්තේ මන්ත‍්‍රීවරයා එකඟවීමෙන් පසු ඉක්මණින් තෑගි මුදල් ලබා ගැනීම සඳහා දඩයක් පනවා ඔහුව නිදහස් කිරීම බවයි.

මේ වනවිට මතුවී ඇති ප‍්‍රංශ ජාතිකයාගේ සිදුවීමෙන් පසු දෙවෙනියට සඳහන් කළ හිටපු රේගු නිලධාරියාගේ අදහස මේ පිළිබඳ යළි සාකච්ඡාවකට මග පාදයි. මන්ද මෑත ඉතිහාසයේ උපරිම රේගු දඩය දැන් ප‍්‍රංශ ජාතිකයාට මාරුවී ඇති නිසාය. එපමණක් නොව අවමය රුපියල් ලක්ෂයක් හෝ වරදේ ප‍්‍රමාණය මෙන් තුන් ගුණයක් යන දඩ පැනවීමේ රේගුවේ අභිමතය මන්ත‍්‍රීවරයාට සියයට 10ක් වනවිට ප‍්‍රංශ ජාතිකයාට සියයට සීයකට ආසන්න වී ඇති නිසාය.

එදා මන්ත‍්‍රීවරයාට ඔහුට පැනවූ දඩය ගෙවන්නට නොහැකි වූවා නම් ඔහු ඉදිරිපත් කරන්නට වන්නේත් මහේස්ත‍්‍රාත් අධිකරණයටය. ඒ අනුව ප‍්‍රංශ ජාතිකයාගේ සිදුවීම මෙන්ම මන්ත‍්‍රීවරයාගේ සිදුවීමද එක් දිනකින් අවසන් වන්නේ නැත. ඒවා දීර්ඝ කාලයක් ඇදී යයි. රේගු අධ්‍යක්ෂ ජනරාල්වරයාට මෙන්ම විෂයභාර ඇමතිවරයාට අභියාචනා කිරීමේ හැකියාව ඉන්පසු ලැබේ. වැටලීම කළ රේගු නිලධාරීන්ට සිය තෑගි මුදල් ලබා ගැනීමට එම නඩු හා පරීක්ෂණ අවසන් වනතෙක් සිටීමට සිදුවේ. ප‍්‍රංශ ජාතිකයා වැටලූ නිලධාරීන්ට එසේ වුවද මන්ත‍්‍රීවරයා වැටලූ නිලධාරීන්ට එසේ වී නැත. මන්ත‍්‍රීවරයා වරද පිළිගෙන දඩයත් ගෙවා නිදහස් වී ගොස් ඇති බැවින් රාජසන්තක කළ රත‍්‍රං විකිණීමෙන් හා දඩය මගින් ලැබෙන තෑගි මුදල් ඉක්මණින්ම ලබාගැනීමේ හැකියාව ඔවුන්ට ඇත.

පුළුල් විමර්ශනය යන කරුණ ප‍්‍රංශ ජාතිකයා සම්බන්ධයෙන් රේගුවට එතරම් අදාළ වන්නේ නැත. එහෙත් මන්ත‍්‍රීවරයා සම්බන්ධයෙන් එය අදාළ වේ. ඒ මන්ත‍්‍රීවරයාට එකී රත‍්‍රං තොගය මිලදී ගැනීමට මුදල් ලැබුණේ කෙසේද? ඔහු රටින් බැහැර වනවිට හොරෙන් මුදල් රැගෙන ගියාද? එම රත‍්‍රං ඔහුගේ නොවේ නම් කාගේද? ඔහුට ඒවා ලබා දුන්නේ කවුද? රුපියල් මිලියන 7.4ක දඩය ගෙවීමට ඔහුට මුදල් දුන්නේ කවුද? දඩය ගෙවූයේ ඔහු සතු මුදලින්ද? යන කරුණු එම පුළුල් විමර්ශනයේදී සලකා බැලිය යුතුව තිබුණි. එහෙත් එම රත‍්‍රං ජාවාරම හෙළිදරව් කර ගැනීම දඩ මුදලට මුවාවී රේගුව අවසන් කර තිබේ. එහෙත් රේගුවේ සැබෑ කාර්යය වන්නේ ඉහතින් සඳහන් කළ කරුණුද අනාවරණය කර ගැනීමය.

එහෙත් කුමන හෝ එකඟතාවකට එය එසේ සිදුවී නැත. ඒ නිසා එවැනි එකඟතා වැළැක්වීමට නම් අනිවාර්යෙන්ම සිදුවිය යුත්තේ රේගු ආඥා පනතේ ඇති මෙවැනි සිදුවීම්වලට අදාළ රුපියල් ලක්ෂයක අවමයක් හෝ වරදේ ප‍්‍රමාණය මෙන් තුන් ගුණයක් යන දඩයේ ඇති රුපියල් ලක්ෂයක අවමයක් යන්න රුපියල් මිලියන දහයක අවමයක් වැනි ලෙස හෝ යළි සංශෝධනය විය යුතුමය. මන්ද රේගු ආඥා පනතේ මෙම ප‍්‍රතිපාදනයද ඉතා පැරණි එකක් වන නිසා හා එය පැනවූ අවස්ථාවේ තිබූ භාණ්ඩ මිල හා සසඳමින් පැනවූවක් වන නිසා එය අදට ඒ ආකාරයෙන්ම නොගැළපෙන නිසාය. අවමය ඉහළ දැමූ විට රේගු නිලධාරීන්ට සිදුවන්නේ එම අවමයට ඉහළ දඩයක් හෝ වරදේ ප‍්‍රමාණය මෙන් තුන් ගුණයක් දක්වා දඩයක් පැනවීමටය. ප‍්‍රංශ ජාතිකයාට මෙන්ම මන්ත‍්‍රී අලි සබ්රි රහීම් වැනි පුද්ගලයින්ටද එක ආකාරයෙන් කටයුතු කිරීමටය.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි