No menu items!
27.4 C
Sri Lanka
29 March,2024

ගෝඨාභය හැර වෙන කවුරු දුමින්දට සමාව දෙන්නද?

Must read

■ දෙදෙනා අතර සමීප බව එතරම්ය

■ පවුලේ අයට සැලකීමත් එසේමය

ආන්දෝලනාත්මක අලුත්ම ප්‍රවෘත්තිය බවට පත්වී ඇත්තේ හිටපු ජනාධිපති මහින්ද රාජපක්ෂගේ වෘත්තීය සමිති කටයුතු පිළිබඳ අධ්‍යක්ෂ ජනරාල් වශයෙන් කටයුතු කළ භාරත ලක්ෂ්මන් ප්‍රේමචන්ද්‍ර ඇතුළු සිව් පුද්ගල ඝාතනය සම්බන්ධයෙන් වැරදිකරු වී මරණ දණ්ඩනය හිමිවී සිටි හිටපු පාර්ලිමේන්තු මන්ත්‍රී දුමින්ද සිල්වාට ලබාදුන් ජනාධිපති සමාව ශ්‍රේෂ්ඨාධිකරණය විසින් අතුරු තහනම් නියෝගයක් මගින් අත්හිටුවා තිබීමයි.


එම අත්හිටුවීමේ නියෝගය ලබාදී ඇත්තේ භාරත ලක්ෂ්මන් ප්‍රේමචන්ද්‍ර මහතාගේ බිරිඳ, දියණිය වන හිරුණිකා ප්‍රේමචන්ද්‍ර හා තවත් පුද්ගලයකු විසින් ඉදිරිපත් කරන ලද මූලික අයිතිවාසිකම් පෙත්සමක් විභාගයට අවසර දෙමින්ය. එහිදී ශ්‍රේෂ්ඨාධිකරණ විනිසුරු මඬුල්ල තීරණය කර ඇත්තේ එම ජනාධිපති සමාව අත්හිටුවීමේ නියෝගය එම මූලික අයිතිවාසිකම් පෙත්සම විභාගය අවසන් වන තෙක්ම ක්‍රියාත්මක වන බවයි. එමෙන්ම දුමින්ද සිල්වා වහා අත්අඩංගුවට ගන්නා ලෙසද අපරාධ පරීක්ෂණ දෙපාර්තමේන්තුවට නියෝග කර ඇති ශ්‍රේෂ්ඨාධිකරණය ඔහුගේ විදෙස් ගමන් තහනම් කරන ලෙසද දැනුම් දී ඇත.


මෙම අත්හිටුවීමේ නියෝගය ජනාධිපතිවරයාගේ සමාව දීමේ තීන්දුව අභියෝගයට ලක්කර ඇති බව පැහැදිලිය. එම වෙඩි තැබීමේ සිදුවීම සම්බන්ධයෙන් මරණ දඬුවම ලැබූ අනෙකුත් පුද්ගලයින්ට ජනාධිපති සමාව නොලැබුණ අතර දුමින්ද සිල්වාට පමණක් සමාව ලැබීම විශේෂත්වයක් විය. ඒ මරණ දඬුවම හිමිවූ පුද්ගලයකුට ජනාධිපති සමාව ලබාදීමේදී ඒ සඳහා අනුගමනය කළ යුතු පිළිවෙත ජනාධිපතිවරයා අනුගමනය කර නැති බවට එල්ල වූ චෝදනාව නිසාය. එසේ ජනාධිපති සමාව ලබාදීමේදී එම නඩු තීන්දුව ලබාදුන් විනිශ්චයකාරවරුන්ගේ වාර්තාවක්, අධිකරණ අමාත්‍යවරයාගේ වාර්තාවක්, නීතිපතිවරයාගේ වාර්තාවක් හා බන්ධනාගාරයේ වාර්තාවක් අවශ්‍ය යැයි සඳහන් වුවද දුමින්ද සිල්වාට සමාව දීමේදී එම ක්‍රමවේදය නොසලකා ජනාධිපතිවරයා කටයුතු කර ඇතැයි කියවේ.


එම කරුණු කෙසේ වෙතත් මැරකම් හා අනෙකුත් නීති විරෝධි කටයුතු සම්බන්ධයෙන් ප්‍රසිද්ධ චෝදනා එල්ල වී තිබූ දුමින්ද සිල්වා සම්බන්ධයෙන් අතීතයේ සිටම විශේෂ උනන්දුවක් ජනාධිපති ගෝඨාභය රාජපක්ෂට තිබූ බව නොරහසකි. ඔහුට ජනාධිපති සමාව දුන් සැණින්ම නිවාස සංවර්ධන අධිකාරියේ සභාපතිවරයා ලෙස පත් කරන්නේ ඒ නිසාය.


දැන් ෆේල් වී සිටින ජනාධිපති ගෝඨාභය රාජපක්ෂ සිය අයියා වූ මහින්ද රාජපක්ෂගේ පාලන කාලයේ ආරක්ෂක අමාත්‍යාංශයේ ලේකම්වරයා ලෙස ප්‍රසිද්ධියට පත්වී සිටියේ හොරකමට මැරකමට එරෙහි හා එවැනි පුද්ගලයින්ට එරෙහිව තදින් ක්‍රියාකරන පුද්ගලයකු වශයෙන්ය. එහෙත් ඒ වනවිටත් ඉහත සඳහන් කළ ප්‍රසිද්ධ චෝදනා එල්ල වී සිටි දුමින්ද සිල්වා ආරක්ෂක අමාත්‍යාංශයේ අධීක්ෂණ මන්ත්‍රීවරයා ලෙස මහින්ද රාජපක්ෂ පත්කරන විට තද ගෝඨාභය රාජපක්ෂට එය ප්‍රශ්නයක් වී තිබුණේ නැත. ඔහු එය සාදරයෙන් බාර ගත්තේය. ආරක්ෂක අමාත්‍යාංශයේ අධීක්ෂණ මන්ත්‍රී දුමින්ද සිල්වා සමඟ එකට බොහෝ කටයුතුවලට ගියේය. දැන් නම් ලියුම්කරුට සිතෙන්නේ දුමින්ද සිල්වාව ආරක්ෂක අමාත්‍යාංශයේ අධීක්ෂණ මන්ත්‍රීකමට ඉල්ලාගෙන ඇත්තේ ගෝඨාභය රාජපක්ෂ බවය.


භාරත ලක්ෂ්මන් ප්‍රේමචන්ද්‍ර ඇතුළු පිරිස ඝාතනය වීමට දින කිහිපයකට පෙර ඒ දිනවල කැඳවා තිබූ පළාත් පාලන මැතිවරණයේදී කොටිකාවත්ත මුල්ලේරියාව ප්‍රාදේශීය සභාවට තරග කළ දුමින්ද සිල්වාගේ ගෝලයන්ගේ ජයග්‍රහණය වෙනුවෙන් ගෝඨාභය රාජපක්ෂ 2011 ඔක්තෝබර් 05 වැනිදා අඹතලේ හන්දියේ පැවති දේශපාලන රැලියට ගොඩවූයේ ප්‍රසිද්ධ දේශපාලන අයිතිවාසිකම් නොමැති අමාත්‍යාංශ ලේකම් තනතුර කිසිදු තැකීමක් නොකරමින්ය. ඒ නිකම්ම නොව දුමින්ද සිල්වාගේ ආරාධනයෙන් දුමින්ද සිල්වා සමඟය. එදිනම භාරත ලක්ෂ්මන් ප්‍රේමචන්ද්‍රගේ ආරාධනයෙන් කොටිකාවත්ත මුල්ලේරියාව ප්‍රාදේශීය සභාවේ හිටපු සභාපති ප්‍රසන්න සෝලංගාරච්චිගේ සහායට කොටිකාවත්තේ පැවති රැලියට ගොඩ වූවන් වූයේ මෛත්‍රීපාල සිරිසේන, සුසිල් ප්‍රේම්ජයන්ත, ඒඑච්එම් ෆවුසි, දිනේෂ් ගුණවර්ධන හා සුදර්ශනී ප්‍රනාන්දුපුල්ලේ යන අයය.


භාරත ලක්ෂ්මන් ඝාතන සිදුවීමෙන් පසු වෙඩි වැදුණා යැයි කියන දුමින්ද සිල්වා බැලීම සඳහා ක්ෂණයකින් ජයවර්ධනපුර රෝහලට යන්නේ ගෝඨාභය රාජපක්ෂය. දෙදෙනා අතර සබඳකම එතරම් දැඩි බව ඉන් පෙන්නුම් කරනු ලැබීය. එම සබඳකමට අදාල ගනුදෙනු මොනවාදැයි අප දන්නේ නැත. එහෙත් දුමින්ද සිල්වා වැන්නකු සමඟ කළ හැකි ගනුදෙනු මොනවාදැයි මුළු රටම දනී.


ජනාධිපති වීමෙන් පසු දුමින්ද සිල්වාව මරණ දඬුවමෙන් නිදහස් කිරීම පෞද්ගලිකව කළ යුතු මිතුරු හෝ වෙනත් ආකාරයේ සබඳකමකට අදාළ කාරණයක් ලෙස ගෝඨාභය රාජපක්ෂ සලකන්නට ඇත. 20 වන ආණ්ඩුක්‍රම ව්‍යවස්ථා සංශෝධනයෙන් ලබාගත් අති විශාල බලයත් සමඟ තමාටද කළ නොහැක්කක් නැතැයි කියා සිතා ඔහු එය කරන්නට ඇත. කෙසේ වෙතත් දැන් ජනාධිපතිවරයාගේ එම තීන්දුව ආපස්සට කැරකෙන අයුරක් ශ්‍රේෂ්ඨාධිකරණයේ අතුරු තහනම් නියෝගය මගින් පෙන්නුම් කර තිබේ.


මේ සටහන ලියන මොහොත වනවිට දැන ගන්නට ලැබුණේ දුමින්ද සිල්වා ශ්‍රී ජයවර්ධනපුර රෝහලට ඇතුළත් වී ඇති බවයි. පසුව එදින සවස එම රෝහලට ගොස් ඇති අපරාධ පරීක්ෂණ දෙපාර්තමේන්තුව ඔහුව අත්අඩංගුවට ගෙන ඇත. එහෙත් ඔහුව මහේස්ත්‍රාත්වරයකු හමුවට ඉදිරිපත් කළාද, නැතහොත් බන්ධනාගාරගත කළාද යන්න වාර්තා වූයේ නැත.


භාරත ලක්ෂ්මන් ඝාතන අවස්ථාවේදී වෙඩි වැදුණායි කී ඔහු ඒ අසලම තිබූ උණ රෝහලටවත්, මුල්ලේරියාව රෝහලටවත් ඇතුළත් නොවී හා විනාඩි කිහිපයකින් යාහැකි සියලු හදිසි පහසුකම් තිබෙන කොළඹ ජාතික රෝහලටවත් ඇතුළත් නොවී ශ්‍රී ජයවර්ධනපුර රෝහල තෝරා ගත්තේ විශේෂ හේතුවක් නිසා විය හැක. අදත් ඔහු එයට ඇතුළත් වන්නේ ඒ නිසාම විය හැක. එදා වෙඩි වැදුණා යැයි කී දුමින්ද සිල්වාගේ තත්වය ඔහුට ප්‍රතිකාර කළ වෛද්‍යවරිය හැර කිසිවකු දැන සිටියා යැයි කිව නොහැකිය. එතරම්ම එය රහසක් වශයෙන් තබා ගත්තේය. අඩුම තරමේ ශ්‍රී ජයවර්ධනපුර රෝහලේ ඔහු ඇතුළත් කර සිටි ප්‍රදේශයට කිසිවකුට ඇතුල්වීමට පවා ඉඩ ලබාදුන්නේ නැත. එසේ ඇතුල්වීමට ඉඩ ලබානොදුන් පිරිස අතර රෝහල් කාර්ය මණ්ඩලයේ පිරිස්ද විය. කොළොන්නාව හා ඒ අවට ප්‍රදේශවල රෝහල් කාර්ය මණ්ඩලයට නිවාඩු දෙනු ලැබීය. දුමින්ද සිල්වා සිටි රෝහල් ප්‍රදේශය අත්පත්කර ගෙන සිටියේ ඔහුගේ මැර ගෝලබාලයන් විසිනි. ඔවුන් මුළු පැය විසිහතරක් පුරාත්, දුමින්ද සිල්වාව සිංගප්පූරු ගෙනයන තෙක් සිටියේත් රෝහලේය. ඔවුන්ට අවශ්‍ය කෑම බීම සපයනු ලැබූ අතර ඔවුන්ගේ සාපිපාසා නිවාගනු පිණිස තේ මැෂින් පවා සවි කරනු ලැබීය. එදා කටයුතු සිදුවූයේ එසේය.


දුමින්ද සිල්වාට භාරත ලක්ෂ්මන් ඝාතන සිද්ධියේදී වෙඩි වැදුණේ නම් හා ඒ හේතුවෙන් ඔහුගේ හිස ශල්‍යකර්මයකට ලක්කළේ නම් ඔහුගේ හිසෙන් ඉවත්කරන ලද කොටස් අනිවාර්යයෙන්ම එම නඩුවට අවශ්‍ය සාක්ෂි ලෙස සුරැකිව තිබිය යුතුය. එහෙත් පසුව අප කළ සොයා බැලීමකදී දැන ගන්නට ලැබුණේ එසේ දුමින්ද සිල්වා ශල්‍යකර්මයකට ලක්කිරීමෙන් ඉවත් කරන ලද හිසේ කොටස් එම රෝහලේ නැති බවයි. ඝාතනය කරන ලද වසීම් තාජුදීන්ගේ සිරුරේ අස්ථි කොටස් වෛද්‍ය ආනන්ද සමරසේකර විසින් අතුරුදහන් කළා සේම දුමින්ද සිල්වාගේ හිසේ කොටස්වලටත් සිදුවූ දෙයක් නැත. ඔහුගේ හිසේ ඉවත් කරන ලද කොටස් ශ්‍රී ජයවර්ධනපුර රෝහලේ ඇත්නම් මෙම සටහන කියවන එම රෝහලේ වගකිවයුත්තෙකු ඒ බව අපට නිල වශයෙන් දැනුම් දෙන්නේ නම් හා එම අස්ථි කොටස් තිබෙන බව ඔප්පු කර පෙන්වන්නේ නම් අපගේ අදහස නිවැරදි කිරීමට අප සූදානම්ය.


භාරත ලක්ෂ්මන් ඝාතනය සම්බන්ධයෙන් නඩුව විභාගවන අවස්ථාවලදී දුමින්ද සිල්වාට අතීතය හැමදාම අමතකව තිබුණි. එහෙත් බන්ධනාගාර අපගේ ආරංචි මාර්ග නම් එම දිනවල දැනුම් දුන්නේ බන්ධනාගාර රෝහල තුළ කැරම් ක්‍රීඩා කරමින් හා අනෙකුත් කටයුතු කරමින් ඔහු ඉතා හොඳින් සිටින බවයි. එමෙන්ම කිසිදු අතීතය අමතක වීමක්වත්, පැරණි සම්බන්ධතාවලට අයත් පුද්ගලයින්ව හඳුනා ගැනීමේ ප්‍රශ්නයක්වත් ඔහුට නොතිබූ බවයි.


නමුදු මතකය පිළිබඳ එවන් ප්‍රශ්නයක් තිබුණේ යැයි කී දුමින්ද සිල්වාට ජනාධිපති සමාව ලැබීමෙන් පසු නිවාස සංවර්ධන අධිකාරියේ සභාපතිකම බාරගෙන වැඩ කිරීමට පුළුවන් වූ අතර ඔහුව පත්කිරීමේදී ඔහුගේ මතකය සම්බන්ධයෙන් ජනාධිපතිවරයාට ප්‍රශ්නයක් ඇති වූයේ නැත. ඔහුගේ මතකය හොඳ නිසාම පසුගිය දිනෙක මාධ්‍යවේදියෙකුට පවා පස් කැපීමේ ජාවාරමක් ගැන කළ වාර්තාවක් පළ නොකරන ලෙස කියමින් දූරකථන ඇමතුමක් ලබාදෙමින් වක්‍රාකාරයෙන් තර්ජනය කිරීමක්ද කර තිබුණි.


ගෝඨාභය රාජපක්ෂ හා දුමින්ද සිල්වා අතර පවතින සම්බන්ධය ඔහු මරණීය දඬුවම සම්බන්ධයෙන් සිරගේ සිටින කාලයේ පවා නොමැකී පැවතී ඇත්තකි. ඒ සඳහා තවත් උදාහරණයක් දැකගත හැකි වූයේ 2020 වර්ෂයේදීය. ඒ කොටහේන ශාන්ත බෙනඩික් විද්‍යාලයට අවුරුදු 155ක් හා එහි ආදි ශිෂ්‍ය සංගමයට අවුරුදු 115ක් පිරීම නිමිත්තෙන් පැවති මෝටර් රථ පෙළපාලිය හා අවසානයේ පැවති සැණකෙළියේදීය. එහි ප්‍රධාන ආරාධිත අමුත්තා වශයෙන් පැමිණියේ එම විද්‍යාලයේ ආදි ශිෂ්‍යයෙකු වූ නාගරික සංවර්ධන අමාත්‍යාංශයේ ලේකම් ලෙස පත්කර සිටි සිරිනිමල් පෙරේරාය. ඔහු ගෝඨාභය රාජපක්ෂගේ හිතේෂියෙකි. ඔහු ඊට පෙර ගෝඨාභය රාජපක්ෂ අමාත්‍යාංශ ලේකම් ලෙස සිටි කාලයේ නාගරික සංවර්ධන අධිකාරියේ සභාපතිවරයා ලෙස සිටි අතර හිල්ටන් හෝටලය අයත් හොටෙල් ඩිවලොපර්ස් සමාගමේ ප්‍රධානියා ලෙසද පත්කරනු ලැබීය. එම උත්සවයේ ඔහු සමඟ ගෞරවනීය ආරාධිත අමුත්තා ලෙස පැමිණියේ එම විද්‍යාලයේ තවත් ආදි ශිෂ්‍යයෙකු වූ ප්‍රේමලාල් සිල්වාය. මේ ප්‍රේමලාල් සිල්වා වූ කලී දුමින්ද සිල්වාගේ පියාය. මේ දෙදෙනාම එම උත්සවයට පැමිණියේ හමුදා ආරක්ෂාව ඇතිවය. ඔවුන් පැමිණි වාහනද හමුදාවට අයත් අයුරක් පෙන්නුම් කරනු ලැබීය.
සිරිනිමල් පෙරේරාට හමුදා ආරක්ෂාවක් ලබා දුන්නේ ඇයිද යන්න ප්‍රශ්නයක් වූවත්, ඔහු ඒ වනවිටත් අමාත්‍යාංශ ලේකම්වරයෙකු නිසා එම ප්‍රශ්න කිරීම පැත්තකින් තිබ්බත්, දුමින්ද සිල්වාගේ පියා වන ප්‍රේමලාල් සිල්වාට හමුදා ආරක්ෂාවක් ලබා දුන්නේ ඇයිද යන්න ප්‍රශ්න කළ යුත්තක්මය. එය දුමින්ද සිල්වා සමඟ ගෝඨාභය රාජපක්ෂගේ ඇති සබඳතාව නිසා සිදුවූවක් බව පැහැදිලිය.


එවැනි සමීප තත්වයක් තුළ ගෝඨාභය රාජපක්ෂ හැර දුමින්ද සිල්වාට සමාව දෙනු ඇත්තේ වෙන කවුරුන්ද? මන්ද එතරම්ම ඔවුන්ගේ සම්බන්ධය දැඩි බව පෙනේ.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි