■ අමන්දිකා කුරේ
යෝජිත 21 වන ආණ්ඩුක්‍රම ව්‍යවස්ථා සංශෝධනයේ ඇතැම් කරුණුවලට සංශෝධන ගෙන ඒමට බලාපොරොත්තු වන බව ශ්‍රී ලංකා පොදුජන පෙරමුණේ ලේකම් නීතිඥ සාගර කාරියවසම් පවසයි.
අප කළ විමසීමක දී ඔහු පැවසුවේ එහි ඇති ඇතැම් යෝජනාවලට සිය පාර්ශ්වය එකඟ වූවත් රටේ ඒකීයභාවයට ප්‍රශ්න ඇති විය හැකි ඇතැම් වගන්තිවලට සිය මන්ත්‍රී කණ්ඩායම සංශෝධන ගෙන ඒමට බලාපොරොත්තු වන බවයි.
”විගණන කොමිසම යළි ඇති කිරීම වගේ යෝජනාවලට අපි එකඟයි. ජනතාව හිතනවා දේශපාලනඥයන් සොරකම් කරනවා කියලා. ඒ දේවල් පැහැදිලි කරගන්න පුළුවන් එවැනි කොමිසම් හරහා. නමුත් රටේ ඒකීයභාවයට හානි කරන කොන්දේසිවලට අපට එකඟ වෙන්න බෑ” යැයි ඔහු වැඩිදුරටත් පැවසුවේ ය.
ද්විත්ව පුරවැසිභාවය ඇති අයට පාර්ලිමේන්තුව නියෝජනය කළ නොහැකි ලෙස මෙම සංශෝධනයේ යොදා ඇති ප්‍රතිපාදනය පිළිබඳව අප විමසූ විට සාගර කාරියවසම් මහතා මෙවන් අදහසක් පළකළේ ය.”ප්‍රගතිශීලී කියලා හඳුන්වන 19 වන ව්‍යවස්ථා සංශෝධනය හරහා අවුරුදු 30 සම්පූර්ණ කෙනෙක්ට ජනාධිපතිවරණයට ඉදිරිපත් වීමේ හැකියාව අවුරුදු 35 දක්වා වැඩි කළා. බි්‍රතාන්‍යය, ජර්මනිය වගේ රටවල්වලත් ඒ වයස් සීමා තිබෙන්නේ අවුරුදු 18 යනුවෙන්. නාමල් රාජපක්ෂ මහතා ජනාධිපතිවරණයට ඉදිරිපත්වෙන එක වළක්වන්න එයින් උත්සහ කළත් ලක්ෂ ගානක් වුණු අපේ තරුණයන්ට තමයි එයින් අවස්ථාව අහිමි වුණේ. ඒ වගේ ම බැසිල් රාජපක්ෂ මහතාව එළවන්න ද්විත්ව පුරවැසිභාවය ප්‍රශ්නය ගන්නවා නම් එයින් පාඩුවක් වෙන්නේ ලක්ෂ පහක් විතර වුණු ලංකාවේ ජීවත් වන ද්විත්ව පුරවැසියන්ටයි”■
