■ ධනුෂි ලිහිණිකඩුව
ඉන්දීය රජය විසින් මෙරටට පරිත්යාග කරන ලද රුපියල් බිලියන 02කට අධික වටිනාකමකින් යුත් මානුෂීය ආධාර වතුකරයට බෙදීම ලංකා කම්කරු කොංග්රසය මැදිහත් වීමෙන් සිදුවන බව වාර්තා වේ.
ආධාර බෙදාහැරීමේ කටයුතුවලට කම්කරු කොංග්රසය මැදිහත් වීමේ චෝදනාව පිළිබඳව අප කළ විමසීමේ දී ලංකාවේ සියලු ම අඩු ආදායම්ලාභීන්ට ප්රමාණවත් තරම් ආධාර තොග මාසයක් වැනි කාලයක් තුළ දී ඉන්දියාවෙන් මෙරටට ලැබෙන බවත්, බෙදා හැරීම් කටයුතු සිදු වන්නේ ඒ ඒ ප්රදේශවල දිසාපතිවරු හරහා බවත්, තමා එහි දී සිදු කරන්නේ සම්බන්ධීකරණය පමණක් බවත් කම්කරු කොංග්රස් නායක සෙන්තිල් තොන්ඩමාන් ප්රකාශ කළේ ය. මේ වන විට ලංකාවේ දිස්ත්රික්ක 4ක හෝ 5ක ප්රමාණයකට නිශ්චිතවම ආධාර යවා ඇති බවත් ඉතිරි ප්රදේශවලට කඩිනමින් බෙදා හැරීම් කටයුතු සිදුකරන බවත් ඔහු වැඩිදුරටත් ප්රකාශ කරන ලදි.
මෙම ආධාර තොගයෙන් කොටසක් ශ්රී ලංකාවට පැමිණි අවස්ථාව ගැන ඉන්දියානු මහකොමසාරිස් කාර්යාලය විසින් නිකුත් කරන ලද නිවේදනයේ සඳහන් වන්නේ විදේශ අමාත්ය ජී. එල්. පීරිස්, අමාත්ය නිමල් සිරිපාල ද සිල්වා, වජිර අබේකෝන්, සාගල රත්නායක සමග ලංකා කම්කරු කොංග්රසයේ නායක සෙන්තිල් තොණ්ඩමන් ද මෙම අවස්ථාවට සම්බන්ධ වූ බවයි..
සහල් මෙට්රික් ටොන් 9000ක් කිරිපිටි මෙට්රික් ටොන් 50ක් සහ ඖෂධ ඇතුළු වෙනත් වෛද්ය සැපයුම් මෙට්රික් ටොන් 25කට අධික ප්රමාණයක් සහිතව මෙම ආධාර තොගය ලැබී තිබේ.■
