No menu items!
21.8 C
Sri Lanka
28 March,2024

සංවේදී බෞද්ධයන්ගේ අවධානය පිණිසය
පන්සල අපයෝජන මධ්‍යස්ථානයක් වී තිබේද?

Must read

■ අරුණ ජයවර්ධන

සාමණේර හිමිවරුන් දෙදෙනකුට ලිංගික අපයෝජනයක් සහ වෙනත් හිරිහැර කිරීමේ චෝදනාවක් සම්බන්ධයෙන් රක්වාන ප්‍රදේශයේ භික්‍ෂුවක් රක්වාන පොලිසිය විසින් නොවැම්බර් 22 වැනිදා අත්අඩංගුවට ගත් බවට වාර්තා මාධ්‍යවල පළවී තිබිණ.


වයස අවුරුදු 10 සහ 14 වන මේ කුඩා සාමණේරවරුන් කාලයක සිටම නායක භික්‍ෂුවගේ ලිංගික සහ වෙනත් හිරිහැරවලට ලක්වී ඇති බව ඒවායින් වැඩිදුරටත් කියැවිණි. මෙලෙස පන්සලේ සිදුවන ලිංගික හා වෙනත් හිරිහැර නිසා සාමණේරවරුන් දෙදෙනා සිවුරු හරවා ඔවුන්ගේ මව විසින් නිවෙසට ගෙනයන ලද බවටද තවදුරටත් වාර්තා වී තිබේ.


සිද්ධිය සමථයකට පත්කර ගැනීම සඳහා භික්‍ෂුව රුපියල් පන්දහස බැගින් ළමයින් දෙදෙනාට ලබාදීමට යෝජනා කළ බවද දරුවන්ගේ මව පොලිසියට කළ පැමිණිල්ලේ දැක්වෙන බව කියැවෙයි.


මේ පන්සල්වල භික්‍ෂූන්ගෙන් දරුවන්ට හා සාමණේරවරුන්ට සිදුවන ලිංගික හා අනෙකුත් අපයෝජනයන් ගැන අතිසමීප සිදුවීමක අත්දැකීමකි. ඊට පෙර පාසලක විදුහල්පති භික්‍ෂුවක විසින් පාසල් දරුවන් අපයෝජනය කිරීමක් වාර්තා වුණු අතර, ඒ ගැන පොලිස් පරීක්‍ෂණ පැවැත්වෙද්දීත්, භික්‍ෂුව තවදුරටත් විදුහල්පති ධුරයේ කටයුතු කරමින් සිටි බවට ද වාර්තා පළවිය.


පුවත්පත්වල හා වෙනත් මාධ්‍යවල මෙවැනි සිදුවීම් වාර්තා වුණත්, ඒවා බැරෑරුම් දේ හැටියට නොසලකා සිටීමට සමාජය බෙහෙවින් පුරුදු වී තිබේ. එහෙත් පොලිස් වාර්තා අනුව සලකන විට, පන්සල්වලදී ළමුන්ට සිදුවන ලිංගික හා වෙනත් අපයෝජනයන් කොතෙක්ද යන්න ගැන කනගාටුදායක අදහසක් ලබාගත හැකිය.


මේ පොලිස් වාර්තාවලින් හෙළිවන ඒ අවලස්සන ඇත්තේ තොරතුරුය.


2019, 2020 යන වර්ෂවලදී සහ 2021 වර්ෂයේ අගෝස්තු මාසය දක්වා පොලිසියට වාර්තා වී ඇති පූජ්‍ය පක්‍ෂය විසින් සිදුකරනු ලබන අපයෝජන සම්බන්ධ මේ සංඛ්‍යාත්මක වාර්තාවට පදනම් කරගෙන ඇත්තේ පොලිස් කොට්ඨාසයන්ය.


2019 වසරේ අනුරාධපුර කොට්ඨාසයේ වාර්තා වුණු සිදුවීම් 2කි. කුරුණෑගල 2කි. මොනරාගල 4කි. නිකවැරටිය 4කි. ගම්පොළ 1කි. සීතාවකපුර 1කි. රත්නපුරය 2කි. කළුතර 4කි. තංගල්ල 3කි. හලාවත 2කි. නුගේගොඩ 4කි. ඇල්පිටිය 1කි. අම්පාර 1කි. ළමා ආරක්‍ෂක අධිකාරියේ පැමිණිලි 14කි. ළමා හා කාන්තා කාර්යාංශ මූලස්ථානයෙන් 7කි. වසරේ වාර්තා වුණු මුළු සිදුවීම් ගණන 52කි.


2020 වසරේ නිකවැරටිය 3කි. සීතාවකපුර 1කි. රත්නපුරය 1කි. ඇඹිලිපිටිය 11කි. කළුතර 2කි. තංගල්ල 6කි. ඇල්පිටිය 1කි. තෙල්දෙණිය 1කි. බදුල්ල 1කි. මහනුවර 1කි. ළමා ආරක්‍ෂක අධිකාරියේ පැමිණිලි 12කි. වාර්තා වුණු මුළු පැමිණිලි ගණන 40කි.
2021 වසරේ අගෝස්තු මාසය දක්වා නිකවැරටිය 2කි. සීතාවකපුර 1කි. රත්නපුරය 1කි. තංගල්ල 1කි. හලාවත 1කි. මහනුවර 1කි. ළමා ආරක්‍ෂක අධිකාරියේ පැමිණිලි 3කි. ළමා හා කාන්තා කාර්යාංශ මූලස්ථානයෙන් 1කි. වාර්තා වුණු මුළු සිදුවීම් ගණන 11කි.


මේ වාර්තාවලදී සැලකිල්ලට ගත යුත්තේ, පොලිසියට වාර්තා නොවන මෙවැනි සිදුවීම් තවත් බොහෝ තිබිය හැකි බවය. ඉහත රක්වාන සිදුවීමේදී මෙන්, සැකකරුවන් මුදල් ලබාදීම, ගොඩින් බේරාගැනීම, තර්ජනය කිරීම, පන්සලේ භික්‍ෂුවකට විරුද්ධව පොලිසියට පැමිණිලි කිරීමට ඇති බිය සහ පසුබෑම, සමාජ අපවාදයට තමන් ලක්වේ යැයි වින්දිත පාර්ශ්වයට ඇති බිය, නඩු කීමට ඇති නොහැකියාව සහ අකමැත්ත යනාදි බොහෝ හේතු කාරණා නිසා පැමිණිලි බොහොමයක් පොලිසියට වාර්තා නොවන්නට ඉඩ තිබේ.


මේ සිදුවීම්වල ගැඹුරු ඛේදවාචකය තවත් තහවුරු කරන අවස්ථාද ඇත.


එක් සාමණේර භික්‍ෂුවක්, පන්සලේ ලොකු හාමුදුරුවන්ගෙන් පමණක් නොව ඔහුගේ ගිහි මිතුරකු අතින්ද අපයෝජනයට ලක්වීම වාර්තා වුණු එවැනි එක් සිදුවීමකි. තමන් අපයෝජනයට ලක්කිරීමෙන් පසු මිතුරාටද, දරුවා ලබාදීම එම භික්‍සෂව සිදුකර තිබේ. තවත් සිදුවීමකදී වාර්තා වන්නේ, අපයෝජනය කළ භික්‍ෂුව නිසා දරුවාටද ලිංගාශ්‍රිතව බෝවන රෝග බෝවී තිබුණු බවයි.


මේ පොලිස් වාර්තාවලින් සහ වාර්තා නොවන සිදුවීම්වලින් මෙන්ම ඒ සිදුවීම්වල අපරාධකාරී ස්වභාවය නිසා තහවුරු වන්නේ පන්සල කුඩා දරුවන්ට සුදුසු තැනක් නොවන බවද?■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි